Zwipo 4
4
Zwibhayilo zwe tjibi
1Yahwe bakadwa Mushe bakati, 2“Idwa bathu be Iziraela uti, ‘Ha kuna mmwe watjinya ngosaziba, mu tjimwe tje zwithu Yahwe zwabakalaula kuti zwisithamiwe, ngono kathama tjimwe tjazo ngaathame sahwoku:
3“ ‘Ha ali mpirisiti wakazhodziwa atjinya, kutjinya kukwe kozhisa nlandu mu bathu, ndizo ngaadusile tjibi tjaathama nkong'wana usina bulema kuna Yahwe tjili tjibhayilo tje tjibi. 4Ayise nkong'wana ihwoyo ku nkoba we nshasha we bushanganilo mbeli kwa Yahwe, abige luboko gugwe pezhugwi kwe nsholo we nkong'wana, abe eubhaya mbeli kwa Yahwe. 5Ngono mpirisiti wakazhodziwa atole mamwe e malopa e nkong'wana aayise ku nshasha we bushanganilo. 6Mpirisiti adubike tjinyala tjitje mu malopa, abe enyasa mamwe awo katendeka mbeli kwa Yahwe ali mbeli kwe tjisitilo tje bugalo gwakayengemala. 7Mpirisiti azhodze mamwe e malopa mu nyanga dze tjibeso tje motsha unonuhwa zwinozipa tjimu nshasha we bushanganilo mbeli kwa Yahwe, ngono malopa wose asala e nkong'wana aatebulile pa tjigadziko tje tjibeso tje tjibhayilo tjinopisiwa tjipa nkoba we nshasha we bushanganilo. 8Aduse mafuta wose mu nkong'wana we tjibhayilo tje tjibi, lizwizwi ne mafuta wose e zwimukati, 9ne so mbili ne mafuta adzo kudwila ku thunji ne mafuta apezhugwi kwe tjilopa, azwidusilanye ne so. 10Mpirisiti unowotola mafuta iyawa ebe eapisa mu tjibeso tjinopisigwa zwibhayilo tjagala tjipisigwa zwibhayilo zwinopisiwa, sekwa agala ethama nge mafuta adwa mu ithuwo tjabhayigwa tjibhayilo tje mbakisano. 11Koga ganda le nkono ne nyama kose ne nsholo wayo ne thozo dzayo ne zwamukati ne nswane wayo, 12ntumbu wose we nkong'wana usengegwe kuzhe kwe bukotokelo, ku bugalo bubuyanana ku tjizhalanlota, upisiwe mu moto we hwuni pezhugwi kwe tjizhalanlota.
13“ ‘Ha itjaba tjose tje Iziraela tjathama tjibi ngosaziba ngono kwakasumbikala mu mesho e gubungano, bebe bethama tjimwe tje zwithu Yahwe tjabakati tjisithamwe ngono bebe babe ne nlandu, 14ha tjibi tjabathama tjibe tjizibgwa, gubungano lodusa nkong'wana kube tjibhayilo tje tjibi, ngono banowouzhisa mbeli kwe nshasha we bushanganilo. 15Bakulu be gubungano babige maboko abo pezhugwi kwe nsholo we nkong'wana mbeli kwa Yahwe, ngono nkong'wana unowobhayiwa mbeli kwa Yahwe. 16Ndizo mpirisiti wakazhodziwa unowozhisa malopa mamwe e nkong'wana ku nshasha we bushanganilo, 17ngono mpirisiti unowodubika tjinyala tjitje mu malopa ebe eanyasa katendeka mbeli kwa Yahwe ali mbeli kwe tjisitilo. 18Ngono mpirisiti unowozhodza malopa mu nyanga dze tjibeso tjinopisigwa zwibhayilo tjimu nshasha we bushanganilo mbeli kwa Yahwe, ngono malopa wose asala unowoatebulila ku bhato le tjibeso tje tjibhayilo tjinopisiwa tjipa nkoba we nshasha we bushanganilo. 19Ngono mafuta e nkong'wana wose aaduse muuli abe eapisila mu tjibeso tjinopisigwa zwibhayilo. 20Sekwa akathama nge nkong'wana we tjibhayilo tje tjibi ndiko zwako kwaanowothama nge nkong'wana ihwoyu. Mpirisiti unowothama gadzano yabo na Yahwe, ngono Yahwe banowobazwiibhatigwa. 21Ntumbu wose we nkong'wana unowousengela kuzhe kwe bukotokelo kanoupisa sekwa akapisa nkong'wana we kutanga. Etji nditjo tjibhayilo tje tjibi tje gubungano.
22“ ‘Ha ntungamili athama tjibi ngosaziba mu tjimwe tje zwithu Yahwe Ndzimu uwe tjabalaula kuti tjisithamwe, ngono abe nlandu, 23ngono ha tjibi tjaathama atjizibisiwa, unozhisa tjipo tjitje ili mbudzi ndume isina bulema. 24Ngono abige luboko gugwe pezhugwi kwe nsholo we mbudzi, abhaye mbudzi iyeyo panobhayigwa tjibhayilo tjinopisiwa mbeli kwa Yahwe, itjetji nditjo tjibhayilo tje tjibi. 25Ndizo mpirisiti unowotola mamwe e malopa e tjibhayilo tje tjibi nge tjinyala tjitje ebe eabhoma mu nyanga dze tjibeso tje tjibhayilo tjinopisiwa, ebe etebulila malopa asala pa bhato le tjibeso tje tjibhayilo tjinopisiwa. 26Ngono mafuta wose aapisile mu tjibeso tjinopisigwa zwibhayilo sekwa akapisa mafuta e tjibhayilo tje mbakisano. Sa ikoko, mpirisiti unowonthamila kugadzana ngekwe tjibi tjitje, ngono Yahwe banonzwiibhatigwa.
27 #
Mbalo 15:27, 28 “ ‘Ha mmwe we bathu koga angatjinya ngosaziba, ngoti athama tjimwe tje zwithu Yahwe tjabakalaula kuti tjisithamwe, ngono abe nlandu, 28ha azibisiwa tjibi tjaathama, azhise tjipo tje mbudzi hadzi isina bulema, edusila tjibi tjitje tjaathama. 29Ngono ntjinyi abige luboko gugwe pezhugwi kwe nsholo we tjibhayilo tje tjibi, abhaye tjibhayilo tje tjibi panobhayigwa tjibhayilo tjinopisiwa. 30Mpirisiti atole mamwe e malopa atjo nge tjinyala tjitje aabhome mu nyanga dze tjibeso tje tjibhayilo tjinopisiwa, abe etebulila malopa asala pa bhato le tjibeso tjinopisigwa zwibhayilo. 31Wakatjinya aduse malopa wose sekwa akaadusa mu tjibhayilo tje mbakisano, ngono mpirisiti unowopisa tjibhayilo mu tjibeso tjinopisigwa zwibhayilo kube nnuhwo unonuhwa zwinozipa kuna Yahwe. Sa ikoko, mpirisiti unonthamila gadzano na Yahwe, ngono Yahwe banowonzwiibhatigwa.
32“ ‘Ha nthu angazhisa pkhwizi kube tjipo tjitje tje tjibi, azhise ili hadzi isina bulema. 33Abige luboko gugwe pezhugwi kwe nsholo wayo, abe ebhaya pkhwizi ili tjibhayilo tje tjibi pa bugalo gunobhayigwa tjibhayilo tjinopisiwa. 34Ndizo mpirisiti unowotola mamwe e malopa e tjibhayilo tje tjibi nge tjinyala tjitje, ebe eabhoma mu nyanga dze tjibeso tje tjibhayilo tjinopisiwa, ebe etebulila malopa asala pa bhato le tjibeso tjinopisigwa zwibhayilo. 35Ngono unowodusa mafuta ayo wose sekwa kunodusiwa mafuta e pkhwizana ye tjibhayilo tje mbakisano, ngono mpirisiti unowoapisila mu tjibeso tjinopisigwa zwibhayilo, pezhugwi kwe zwipo zwinopisiwa mu moto kupisigwa Yahwe. Sa ikoko mpirisiti unowonthamila kugadzana na Yahwe ngekwe tjibi tjaathama, ngono Yahwe banonzwiibhatigwa.’ ”
Currently Selected:
Zwipo 4: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
