Jobe 37
37
1“Ngekwako moyo wangu unoloba kwazo,
unotjuluka kudwa mu magalo awo.
2Bhulutanani kudidima kwe hwi le Ndzimu,
ihwani kubhonga kunodwa mu nlomo wawo.
3Lupenyo gugwe gwe vula gopenya gutendebukila ku zhuzhugwi
kudwa tjose ku phelelo dze shango.
4Kudwa ipapo kotobela nsindo we kubhonga kwawo,
unodadamula nge hwi lakasima
awutobgwilila shule ndodwa!
5Ndzimu unobomba kunotjenamisa,
unothama zwithu zwikulu zwatisingake tikahwisisa.
6Unoti ku kapuku, ‘Wila mu shango,’
ukadwa vula ukati, ‘Ina nge midumbi.’
7Ukamisa nthu mmwe ne mmwe kushinga,
kuti ndizo bathu bazibe ngekwe mishingo yawo.
8Phuka dze shango dzongina mu mazwimba adzo,
dzogala zwadzo mu makuwu adzo.
9Matutu anotutudza edwa ku burwa,
phepo inotothola inodwa ku bunandzwa.
10Lufemo gwe Ndzimu gothama makaa,
ne vula dzakawala dzikagamba.
11Unosengesa gole lakasima vula,
makole anoandamisa lupenyo gwawo.
12Zopoteleka zwikapoteleka zwilaugwa ndiwo,
kushingikadza ndaulo dzose dzaunozwipa,
mu shango yose koga.
13Ndzimu unozhisa makole kuloba bathu shamu,
kene ukainisa vula kulakidza ludo gwawo gusingazunguzike.
14“Ima kutanga Jobe, teedza,
kumbula mishingo ye Ndzimu inotjenamisa.
15Apa unoziba kuti Ndzimu unolaula makole tjini kene?
Apa unoziba kuti unothama tjini kuti lupenyo gupenye kene?
16Apa unoziba tjakabhata makole kuti asiwile pasi kene?
Apa unoziba makaabadzo aiye una zibo yakapelela kene?
17Iwe, we zwiambalo zwinokupisa,
ha phepo ye burwa i hwuhwudza mu shango,
18apa ungabhatsha Ndzimu kuthama zhuzhugwi kene?
Apa ungathama zhuzhugwi gwakasima se iponi tje phangula kene?
19Utibudze kuti tidwe Ndzimu titini,
titini ngoti iswi timuzhalima koga.
20Apa ubudziwe kuti ndilebeni kene?
Andidi, kuti ndiko ukowotini kene? Undilobese?
21“Koga ngwenu akuna ungalinga zhuba,
lipenya lili ku zhuzhugwi,
zhuzhugwi gwakatjena kusina ndodwa ne gole.
22Ku bunandzwa koboneka kupenya kwe golide,
Ndzimu unoboneka mu kupenya ikoku kukulu.
23Masimbawose atitobabona,
bakulu mu simba labo ne ndulamo,
kululwama kwabo kwakawanda abangabatshambilidze.
24Ndizo, bathu banoutja,
auna hanya na ibabo banozwidwa beti bakatjenjela.”
Kalanga Bible © Bible Society of Botswana, 2008, 2018.