Jobe 38
38
Yahwe banodabila Jobe
1Ipapo Yahwe bakadabila Jobe bali mu tjampupudze beti,
2“Apa ndiani iwoyu unodudumwa gumbuludzo langu,
nge matama asina luzibo kene?
3Uzwilulwamise se nlume.
Ndowokubhuzwisisa, ngono undidabile.
4“Wakabe ulingayi andisika shango?
Undidabile ha una hwisiso nge kwako.
5Apa ndiani wakateya shango kuti ibe bukulu gungapa kene?
Kene ndiani wakatala tjilizanyo tjayo kene?
6Thiwa dzayo dzigele muni kene?
Ndiani wakabiga bgwe layo le ndzibo kene,
7ha nyenyedzi dze mangwanana dzimba dzose,
ne bakololo bose be kudzimu bemimila nge kushatha kene?
8 #
Jeremiya 5:22
“Kene ndiani wakazhalila gungwa nge zwizhalilo kene,
pagwakaphutuka kudwa mu tjibumbilo tje shango kene?
9Wakabe ulingayi ndifukidza gungwa nge makole,
ndikalipetela nge zhalima kene?
10Wakabe ulingayi ha ndibiga migathu ye gungwa,
ndilonga zwizhalilo zwago zwiberaberi kene?
11Wakabe ulingayi ha ndidwa gungwa nditi, ‘Unopelela ipapa,
ne mapundu awo e vula anozwikudza anomisiwa ipapa?’
12“Jobe, apa wakatongo laula mangwanana
kene ukalakidza mazhokuyedza magalo awo kene?
13Wakatongo laya mazhokuyedza kuambadza mbizho dze shango,
kuti babiibi babhude mu ali kene?
14Shango inobumbika se ntapkhwi ukusi kwe ntondo
inotakika se tjiambalo.
15Babiibi bawana tjedza tjabo tjatogwa,
luboko gwabo gwakamilidzigwa tjinya govung'wa.
16“Apa wakatongo noti ku misenya ye gungwa kene,
kene ukayenda mu budzilo gwe gungwa kene?
17Apa wakatongo lakidziwa mikoba ye lufu,
kene ukabona mikoba ye zhalima gulu?
18Apa unoziba kuti shango yakashatha kungapani kene?
Undibudze ha uziba kose ikoku.
19“Apa unoziba kuti tjedza tjodwa ngayi kene,
apa unoziba bugalo gwe zhalima kene?
20Apa ungazwiyisa ku magalo azo kene?
Apa unoziba zila inoyenda ku magalo azo kene?
21Nge malebeswa unoziba ngobe wakabe watjizwagwa kale!
Wakatjila makole ali manji kwazo!
22“Apa wakatongo ngina mu matula e kapuku kene?
Kene kuli kubona matula e tjivulamabgwe kene?
23Iwo andakabigila nsi we phipiti kene,
nsi we kumukilana ne ngwa.
24Apa unoziba zila inoyenda ku magalo anodwa lupenyo gwe vula,
kene magalo iwo anotutudzila phepo dze kubhezhuba mu shango kene?
25“Apa ndiani wakatsha ngolo dze vula nji kene?
Apa ndiani wakathama zila ye lupenyo gwe vula kene?
26Apa ndiani unonisa vula kusinga gale bathu kene?
Apa ndiani unonisa vula mu tjilambanyika kusina ndodwa ne nthu kene?
27Apa ndiani unodilidzila shango yakathukudzika yakawomelela,
kuti ndizo bushwa guthinile kene?
28“Apa vula ina tate kene?
Kene ndiyani wakazwala madokhwe e khawa kene?
29Apa makaa akadwa mu tjibumbilo tjaani kene?
Apa ndiani wakazwala kapuku tjinowa kudzimu kene?
30Itjo tjinoshandula vula ikabe bgwe kene,
tjinogambisa gungwa kene?
31 #
Jobe 9:9; Amosi 5:8 “Apa ungasunganya ketani dze Tjiyendan'gwi kene?
Kene kuli kusunungula misungo ye Ngulube kene?
32Apa ungazhisa nyenyedzi dze burwa nge zwibaka zwazo kene?
Kene kutungamila nyenyedzi hwulu ne tukununu dze Ngulube kene?
33Apa unoziba milayo inoyendisa mazhuzhugwi kene?
Apa ungabiga ndaulo yawo mu shango kene?
34“Apa ungamilidza hwi lilo ukalaula makole kene?
Kuti nkubila we vula ukufukidze kene?
35Apa ungatumila lupenyo kuti gulobe,
igo gube guti, ‘Tipano towothama’ kene?
36Apa ndiani wakapa makole butjenjedu kene,
kene ndiani wakapa fulele hwisiso kene?
37Apa ndiani una butjenjedu gwe kubala makole kene,
kene ndiani ungatebula makukhwa e zhuzhugwi kene?
38Ha hwuluba iwomelela,
ibe duthu le mavu kene?
39“Apa ungavimila shumbakadzi tjaingaja kene?
Apa ungagutsha shumbana kene,
40ha dzakalindila dzakabgwata mu makuwu,
kene dzililele dzakalinda mu zwishaka kene?
41Apa ndiani unopa makungubo zojiwa,
ha bana bawo belilila ku Ndzimu,
beyenda yenda beshaka zojiwa kene?
Kalanga Bible © Bible Society of Botswana, 2008, 2018.