Jobe 36
36
1Elihu kadwilila eti,
2“Ibe ne moyo nlefu kutukununu koga, ndowokulakidza tjimwe,
nditjina tjimwe tjandingalebelekela Ndzimu.
3Ndowonotola luzibo gwangu kusipano,
kukulakidza kuti Mbumbi wangu wakalulwama kungapani.
4Nge malebeswa matama angu aateali manyepkhwa,
iye una luzibo umbeli kuko.
5“Bona Ndzimu nkulu seni, koga akuna waunolingila pasi,
wakasima, una simba le hwisiso.
6Autoletjedzela babi bakatjila,
koga banodziyila unobapa fanilo dzabo.
7Unogala wakabakilila balulwami,
ngono unobatolela pezhugwi sa bomambo,
ukathama kuti bakudziwe tjatjose.
8Koga ha bathu bakasungwa nge ketani,
bebe bebhakhwa nge misungo ye kudziyila,
9unobabudza zwabakathama,
kuti batjinya, bakazwibhata kwakabipa.
10Unobathama kuti bauteedze haubatjemela
ngono ukabadwa kuti bashandukila bubi gwabo.
11Ha beuteedza beushingila,
banowidza mazhuba abo bakabhudilila
ne makole abo bali mu kushatha.
12Koga ha basingauteedze,
banowofa nge thumo
ngono befa basina luzibo.
13“Usina Ndzimu mu moyo unogala akalamwa koga,
aatokumbila bhatsho nenguba un'loba shamu.
14Banofa bali mu butjetjana gwabo,
bhelelo le matjilo abo lobhatisa shoni.
15Unosunungula unodziyidzika mu kudziyidzika kukwe,
uzhula zebe dzabo kuti bahwisise nge zogwadza.
16Nawe unokudana kuti ukuduse mu mang'oni,
kukuyisa kwakazhuka kusina zwinodzibilidza,
ukakupa zose zojiwa zwinozipa.
17“Koga ngwenu unolobgwa shamu ngekwe bubi,
sumikiliso ne kululwamisiwa zwakakudzinga.
18Ngono ubone bushongola gusikutjengele ukatuka Ndzimu,
usiletje tjizwimba nlomo tjikulu tjikakupambusa.
19Apa fumwa iyo ne masimba awo,
zowokubhatsha aukumbila bhatsho kene?
20Dumbu usiyemule kuti busiku,
panowoti bathu bakalobesiwa mu magalo abo
21Ibe nge njele, usiwile mu bubi,
gonga igo gwaunoda kupinda kudziyila.
22Bona, Ndzimu unokudziwa mu simba lawo,
ndiani ungadiya saiwo kene?
23Ndiani ungadwa Ndzimu kuti uthameni,
kene ungati, ‘Mathama kwakabipa kene?’
24“Kumbula kukudza mishingo yawo,
bathu yabakakudza beimba
25Bathu bose bakabona tjawakayita,
bathu banoilingila kule!
26Bona, Ndzimu nkulu, kwatisingake tikauhwisisa!
Mbalo ye makole awo akuna ungaiziba.
27Unotola madokhwe e vula,
ukaathama fulele ye vula inona.
28Unothama kuti vula ine idwa mu makole,
ili njinji inila bathu bose.
29Apa kuna unoziba kuti makole anoyenda tjini kene?
Apa kuna unoziba kuti tari inodadamula tjini kene?
30Bona, unopaladza lupenyo gwe vula kuupoteleka,
ukazwimba thiwa dze gungwa.
31Ngoti ndiko sekwa unosumikilisa bathu,
upa zojiwa zwili zwinjinji.
32Unozhadza maboko awo nge lupenyo gwe vula,
ngono ukagudwa kuti gulobe pakalingisana.
33Zhoba yago inoleba nge kwawo,
ne ng'ombe dzoziba ngekwe kuloba kwago.
Kalanga Bible © Bible Society of Botswana, 2008, 2018.