Jobe 31
31
1“Ndakathama tjidumano ne mesho angu,
kuti asitongolinga mwanadi.
2Gobe langu labelowobeni kudwa pezhugwi ku Ndzimu kene,
ne lukata gwangu kudwa kuna Masimbawose ba pezhugwi ini kene?
3Apa zwakabipa azwitowila babi kene?
Apa tjiga ate tja ibabo banothama mbipo kene?
4Apa autobona zila dzangu kene?
Apa autobala thambo imwe ne imwe yangu kene?
5“Ha kuli kuti ndakabe ndiyenda mu zila dze bupitipiti,
makumbo angu akalibilidzila kunotjinya,
6ngandiyegwe mu tjiyelo tjakalulwama,
kuti Ndzimu ubone kuti andina nlandu!
7Ha kuli kuti ndakatongo pambuka mu zila,
ne mesho angu kasala shule yemula dzangu,
kene kuna itoyi mu maboko angu,
8ha kwakajalo zwandakadzwala ngazwijiwe ne upoga,
ne zwijo zwe nnda wangu zwisimugwe.
9“Ha moyo wangu wakatongokuzhugwa ne nkadzi,
kene ndakatongolalila pa nkoba we mbakidzani wangu,
10ha kwakajalo, nkadzi wangu ngaakhwile mmwe nlume,
kakale nlume upoga ngaawalilane naye!
11Ngobe kuthama saikoku nlandu nkulu,
nlandu wakafanila kuti ulobegwe shamu ne basumikilisi.
12Moto unolotesa kose ku Golomodzo,
unowopisa kunoti ku midzi ya kose kwandakavuna.
13“Ha ndisakabe ne hanya kuteedza nlandalume wangu kene nlandakadzi wangu, beng'ong'ola nge kwangu,
14ndowothama tjini wali Ndzimu ha watjilingisana nami?
Ha undilingisa matama ndowoudabila nditini kene?
15Apa ate iwo wakandibumba ukababumba bo kene?
Apa ate iwo wakatibumba tose mu zwibumbilo zwa bomme bedu?
16“Apa ndakatongo nyima nshayi tjaakabe ekumbila,
ndakatongo tobosa tjilikadzi kene?
17Apa ndakatongoja tjiwunga ndili ndoga,
ndinyima siyangwa kene?
18Kudwa mu butjetjana gwangu ndakalela siyang'wa se kunoyita botate.
Kudwa ntolo ndagala nditjengeta tjilikadzi.
19Apa ndakatongolingilila nthu efa ngoshaya zwiambalo kene,
kene nshayi ngosheta tjaangasungila natjo kene?
20Apa aazondiboka kudwa mu moyo uwe,
apa andizompa zwiambalo zwakathamwa nge wulu,
yakabe idwa mu danga le pkhwizi dzangu kene?
21Apa ndakatongo bhayana ne siyamwa,
ngoziba kuti ndowobakunda ku lubazhe kene?
22Ha kwakajalo, luboko gwangu ngakushomoke mu thudzi,
ngaguvunike pa malunganilo e thudzi.
23Ngoti ndakabe nditja bushongola gwe Ndzimu,
akuna kuti ndingabe ndakathama tjithu tjakajali saikoku!
24“Ha ndakabiga kugalabgwe kwangu mu golide,
kene ndakadwa golide nditi, ‘Ndiwe kugalabgwe kwangu,’
25ha ndakashathila fumwa yangu hwulu,
ne thundu yandashaba nge maboko angu,
26ha ndakatongo linga zhuba lipenya
kene mwedzi uyenda wakanaka,
27kuli kuti zwakatongo nditjengela,
ha zwithigamila ha zwinamata,
28ikoku milandu yakafanila kuti isumikilisigwe,
ngobe kowobe kudwa kuti ndakanyepela Ndzimu masimbawose.
29“Ha kuli kuti ndakatongo shathila manikano dze tjita tjangu,
kene kuli kushatha ha tjawigwa nge mang'oni,
30andizotongo thama tjibi ngoleba nge nlomo wangu,
ndilonga bhiso ngekwe butjilo gwatjo.
31Apa bashingi bangu bakabe basingatongo bhuzwa beti,
‘Ndiani watongoja kasigute nyama iye?’
32Akuna n'yendi wakatongo lala kuzhe,
ngobe mikoba yakabe igala yakazhuligwa nzhi.
33Ha ndakasumbika matjinyo angu bathu bamwe sekwa banothama,
ngekusumbika jinyo langu mukati kwangu,
34ngoti ndakabe nditja mibunga,
nditja kubhatisa shoni njudzi dza kanyi kwedu,
kwakathama kuti ndigale ndakabgwata.
35Apa ndiani unowonditeedza kene?
Ndobiga tjinyala tjangu, ili butendeki gwe lebeswa langu,
Masimbawose ngabandidabile.
Handabe ndakabhata lukwalo gwakakwagwa
nge tjita tjangu ngekwe milandu yangu.
36Ndabe ndowoyenda ndakagusenga pamwe ne pamwe,
ndabe ndowogusenga ne mu nsholo dumbu se tjiala,
37Ndabe ndowoubudza ngekwe thambo dzangu dzose,
se nkololo wa mambo ndabe ndowolingisana nawo.
38“Ha kuli kuti nnda wangu unolila nge kwangu,
ne ngolo dzawo dzose dzinyolo nge mishodzi,
39ha kuli kuti ndakaja mitjelo yawo ndisingalipe,
ha ndakabulaya beni bawo,
40ipapo, mu bumo gwe mathunde ngaumele mihwa.”
Matama a Jobe anoma ipapa.
Kalanga Bible © Bible Society of Botswana, 2008, 2018.