Jobe 30
30
1“Koga ngwenu ndosekwa ne batjetjana mundili,
ibo botate babo bandakabe ndilingila pasi,
ndisingake abashanganya ne mbgwa dze pkhwizi dzangu.
2Naiko ndobuyigwa neni mu simba le maboko abo,
ngoti simba labo lapela mubali.
3Bakapeleledziwa nge kusheta nenge zhala,
bepupuna mu shango yakawomelela ye tjilambanyika.
4Betjela mazhani ana mwenyu mu matenjana
bebesa nti unoyi ntshwayilo kuzwidziyisa.
5Banotatigwa kutjena pakati kwe bathu,
banomimiligwa sekunomimiligwa mbava.
6Bakapelela begala mu phili dze mikukwana yakawoma,
mu mimwina ye shango ne mu makuwu.
7Banomimila bali pakati kwe matenje,
bezwikubunganya mu mibabashulo.
8Bana be zwilengwe! Bana be banolingigwa pasi,
bakatatigwa kutjena mu shango belidzigwa tjimi.
9“Ngono ngwenu ndatjibe lumbo gwabo,
anditobhuda pa milomo yabo.
10Banondishinyata, banomila kule kule nami,
abatotja naiko kundithwila mate mu buso.
11Ngoti Ndzimu wakatoba nshongonshongo wangu ndikawobama,
bandishandukila, bakaposela tomo mbeli kwangu.
12Ku luboko gwangu gwe luji banolingigwa pasi banomilika bendinginilila,
bebiga mapuzhu kuteya makumbo angu,
banobaka makuma anotathila kundinginilila.
13Banokolomola zila yangu.
Banobhudilila mukundikolomodza,
akuna unobadziba.
14Banongina se ungati nkoba wakazhuka,
banokomba bezha bekunguluka.
15Lutjo gwakandiambala,
Gudzo langu latatigwa kutjena se phepo,
kubhudilila kwangu kwapadza se makole.
16“Ngono ngwenu butjilo gwangu gobipila mbeli,
mazhuba angu e kudziyidzika anondikulila.
17Busiku mafupa angu anopanda,
panda kunondipanda akutoma.
18Nge masimba makulu zogwadza zotjinga tjiambalo tjangu,
zondipomba se iphika tje tjiambalo tjangu.
19Wakandilashila mu dope,
ndotjinga hwuluba ne nlota.
20Ndolilila kumuli, koga amutondidabila,
Ndoma mbeli kwenyu ngono amuna hanya nami.
21Makandishandukila kube nkukutu mundili,
nge simba le luboko gwenyu mogwa nami.
22Mondimilidzila mu phepo, munditathisa iyo,
mondihwuhwunganya mu matutu.
23Dumbu, ndoziba kuti mondiyisa ku lufu,
ku ng'umba yakabigigwa bose banotjila.
24“Dumbu, akuna ungamilidza luboko gugwe ali mu duluthulu le dongo,
mu kudziyidzika kukwe elila ekumbila bhatsho kene.
25Apa andizolilila ibabo bakamanikana kene?
Andizohwila ngoni nshayi kene?
26Koga ndakalindila bubuya, kukazha mbipo,
ndikati ndakamilila tjedza kukazha zhalima.
27Moyo wangu wakati tshi! Andizodzikama.
Mazhuba e buyendasi anozha kundili.
28Ndabe ntema koga kusi ngekutshwa ne zhuba,
ndomilika mu gubungano ndililila bhatsho.
29Ndatjibe hama ye phungubgwe,
nkwinya we fukumudzi!
30Ganda langu labe demadema, lokwakwanyuka,
mafupa angu anopisa nge nthuto.
31Tjilidzo tjangu tje laya tjatjibe tje tjililo,
ne lunyanga gwangu gwabe nlidzo kuna bamu tjililo.
Kalanga Bible © Bible Society of Botswana, 2008, 2018.