Jobe 32
32
Ndebeleko ya Elihu
(32:1—37:24)
1Ndizo balume ibaba batatu bakamisa kushandudzana na Jobe, ngobe Jobe wakabe ezwibona akalulwama. 2Ipapo Elihu nkololo wa Bharakeli we Mbhuzi we nsha wa Ramu kazhala bushongola kwazo. Elihu wakabe azhadziwa bushongola ndi Jobe ngoti Jobe wakabe ezwibona akalulwama pa Ndzimu, 3kakale wakagwadzilabo moyo bazwalani ba Jobe batatu ngoti basakawanila Jobe dabilo koga bakabhata be ntilika nlandu. 4Elihu wakabe akalindila kuti balebeleke na Jobe kutanga ngobe ibo bakabe bali bahwola munnli. 5Koga wakati ebona kuti akuna balume ibaba batatu tjabanobhula mu ndebeleko dzabo, Elihu kazhala bushongola kwazo.
6Ndizo Elihu nkololo wa Bharakeli we Mbhuzi kashandula eti,
“Imi ndi ntjetjana nge makole, koga imwi mu bahwola,
ndizo ndabe nditja kumubudza nkumbulo wangu.
7Ndazwidwa nditi, ‘Mazhuba ngaalebeleke,
makole manjinji ngaadiye butjenjedu.’
8Koga i meya imu nthu,
meya ya Masimbawose inonthama kuti ahwisise.
9Ate bahwola koga bakatjenjela,
kene bosholotjena koga banohwisisa tjakalulwama.
10Ndizo nditi, ‘Munditeedze,
imani ndilebe nkumbulo wangu.’
11“Bonani ndabe ndakateedza matama enyu,
ndabe ndakabhulutana kwazo sekwa mabemulebeleka.
12Ndabe ndakamuteedza nge njele,
koga bonani, akuna walakidza nge buzhalo kuti Jobe u nlandu,
kene iye wadabila matama awe pakati kwenyu.
13Mubone musitongoti, ‘Tabona butjenjedu?
Ndzimu ndiwo unowotubula kusi nthu’
14Jobe aazobe akalingisanya matama awe nami,
kakale anditondabila nge matama anonga enyu.
15“Batemeka mafupa, abatjina dabilo,
abatjina ndodwa ne dama labangaleba.
16Apa ndilindile koga ibo basingatjalebeleke kene?
Ngoti babe mile koga abatjadabila.
17Ndowolebabo tjandakaalakana,
ndowomubudza nkumbulo wangu.
18Ndizhele matama andingaleba,
meya imu ndili ino ndisendedzela kulebeleka.
19Bonani, mukati kwangu kuzhelilane se nkumbi umu gukhwa,
ndodwa ndiphutuka tjibaka tjimwe ne tjimwe.
20Ndakafanila lebeleka kuti ndisununguke.
Ndakafanila zhula nlomo ha lebeleka.
21Akuna wandinolelekela kunli,
akuna wandinowozipisa ndebo ku nshathisa.
22Ngobe anditoziba zipisa ndebo ndishathisa bathu,
ngoti Mbumbi wangu ungadwa endipedzisa.
Kalanga Bible © Bible Society of Botswana, 2008, 2018.