Jobe 27
27
1Ngono Jobe kadwilila nge ndebeleko iye eti,
2“Se Ndzimu unotjila, iwo wakadusila kutjena fanilo dzangu,
Masimbawose bakathama kuti ndilabile kugwadzika kwangu,
3ha meya yangu itjimundili,
ne meya ye Ndzimu ili mu zwimilo zwangu,
4nlomo wangu aungafe waleba bubi,
kakale lulimi gwangu agungafe gwaleba butjebeli.
5Ngakube kutjena nami kuti nditi molebesa
kudzina ndifa andingazane nge kube ne ntutshi kwangu.
6Ndowobhatilila mu ndulamo yangu, andingafe ndaletja ikayenda,
hana yangu i mbuyanana, moyo wangu aungandisole.
7“Tjita tjangu ngatjifanane ne nthu mbi,
unondimukila ngaafanane ne nthu usina ndulamo.
8Ngobe kugalabgwe kwe usina Ndzimu ini,
ha Ndzimu utola butjilo gugwe kene?
9Apa Ndzimu unoteedza tjililo tjitje
ha kudziyidzika kwazha munli kene?
10Apa unowowana kushatha muna Masimbawose?
Apa unowodana Ndzimu misi yose kene?
11“Ndowomudiya ngekwe simba le Ndzimu,
zwimuna Masimbawose andingazwisumbike.
12Bonani, mose imwi makazwibonela nge mesho enyu,
ini ngono ndebo dzenyu dzili madatha koga kene?
13“Ileli ndilo gobe le nthu mbi ku Ndzimu
ne lukata gwe wakabipa moyo gwaanoamutjila kudwa muna Masimbawose.
14Ha bana babe bangawanda, banowandila thumo koga,
bana babe abatofa baja zojiwa bakaguta.
15Malimbelimbe awe anobulawa nge bugwele,
tjilikadzi dzabo adzitobalilila.
16Nenguba ekubunganya siliva se hwuluba,
ezwitjekela zwiambalo zwinjinji se duluthulu le vu,
17unowozwitjekela izo koga zowoambagwa ne nlulwami,
usina nlandu unowokoba siliva.
18Ng'umba yaanobaka inonga ludandi gwe tjibubi
inonga nshasha wathamwa ne nlindi.
19Unonoizela akafuma, koga kowopela
unoti ezhula mesho awe kawana fungwa iye isipo.
20Lutjo gon'wila gukankulila se nkubila
mu busiku unolala asengwa nge tjampupudze.
21Phepo ye bhezhuba inontutudzila kutjena kasibepo,
inontutudzila kutjena ne nzi uwe,
22inontutudza isina ngoni,
akabhata egwisa kwazo kutizha.
23Phepo inonlobela phande,
inonsumila kudwa mu bugalo gwayo.
Kalanga Bible © Bible Society of Botswana, 2008, 2018.