Jobe 26
26
1Ipapo Jobe kashandula eti,
2“Wambhatsha seni iye usina matatabuko!
Wambhatsha seni iye una maboko asakasima!
3Wakumbuludza seni usina butjenjedu!
Naiko hwu zibisisa kungapani kwawalakidza kene!
4Apa ndiani wakubhatsha kuti ulebe matama iyawa kene?
Apa i meya yaani inolebeleka idwa mukuli kene?
5Bafi banotetema bali kusi kwe vula
ne zose zwinogala muili.
6Bugalo gwe bafi gwakaambuka mbeli kwe Ndzimu
ne Golomodzo alizozwimbiwa.
7Unotalabudza zhuzhugwi liku bunandzwa kusina tjimwe,
ukalembeledza shango mu phepo kusina tjimwe.
8Unopetela vula mu makole awo,
ngono koga makole atophutukana ngolema kwayo.
9Unozwimba kuboneka kwe mwedzi uzhele,
nge kuukwididza nge gole lawo.
10Unotala n'gathu pezhugwi kwe vula,
kuthama n'gathu unothubukanya tjedza ne zhalima.
11Phanda dze kudzimu dzotengenyeka
dzotjenamisiwa ngotjemela kwawo.
12Nge simba lawo unodzikamisa gungwa,
nge hwisiso yawo unotemelela zhithu le gungwa linoyi Rahabu.
13Nge meya yawo zhuzhugwi kwakaambuka,
nge luboko gwawo unobhaya nyoka imu kutizha.
14Bonani, yezwi butukununu koga gwe zila dzawo,
tohwa kutukununu seni zwinyebezegwa nge kwawo!
Ndiani ungahwisisa nsindo we simba lawo kene?”
Kalanga Bible © Bible Society of Botswana, 2008, 2018.