Jobe 28
28
Detembelo le butjenjedu
1“Nge lebeswa kuna kunotshiwa siliva,
ne kunokuyungiwako golide.
2Butali gotshiwa mu mavu,
khopa inokuyungiwa kudwa mu mabgwe.
3Nthu unopeleledza zhalima,
eshaka phangula kule kule kwakanginilila,
mu mabgwe akusi kusi.
4Unotsha mukatikati kusingagale bathu,
kusina ndodwa ne nthu wakatongo tshambako,
unoshinga ali mu bushoma akanganika,
akalembelekela yeno na yeno ali misungo ye migodi.
5Shango iyo inomela zojiwa
kusi kwayo kotshindunugwa nge moto.
6Mabgwe ayo bugalo gwe mabgwe e safire#28:6 safire: Mabgwe akanaka e ntengo upezhugwi kwazo.
ne hwuluba yayo ina golide.
7“Dzu alitoziba zila inoyenda ko
ne luphangu aguthu kuka ibona.
8Akuna tjibandana tjakatongo yenda muili,
ne shumba ayithu ikatongo yenda muili bo.
9“Luboko gwe nthu goswika ku mabgwe akasima,
gutshindinula matombo nge midzi yawo.
10Unozhula ngolo mu mabgwe,
mesho awe anobona zose zwakanaka.
11Unoshakisisa misenya kuti vula isiunge
ne tjakasumbikala unotjidusila pa tjena.
12“Ngono kanti butjenjedu gobong'wa ngayi,
ne bugalo gwe hwisiso gobong'wa ngayi kene?
13Nthu aatoziba zila#28:13 zila: Dzimwe hwalo dzoti “themba.” inoyenda kuguli,
agutowang'wa mu shango ye batjili.
14Kwakangina kukati, ‘Agupo mundili,’
gungwa naigobo gukati, ‘Agupo mundili.’
15Agutotengwa nge golide mbuyanana,
ne themba yago aingalizanyiwe ne siliva.
16Agungatengwe ne themba ye golide ye Ofi,
nanga ili Onikisi ye safire iyo i pezhugwi kwazo.
17Golide ne halasi azwingafanidzanyiwe nago,
kene kuli kugutenganya nge jegwa le golide.
18Apa kuli mabgwe e khorala#28:18 khorala: I bgwe lakanaka le ntengo upezhugwi kwazo. ne safire
akuna tjingalebgwa nge kwawo,
themba ye butjenjedu ipezhugwi kwazo kupinda ndalama.
19Topazi ye Khushi#28:19 Topazi ye Khushi: I nsoroto we ndalama. aingafanidzanyiwe nayo,
ne golide mbuyanana aingagutenge.
20“Dumbu ngono bhalule le butjenjedu ini?
Hwisiso yakabaka ngayi ngono?
21Gwakasumbikala mu mesho e zwitjili zose,
gwakasumbikala ne mu nyuni dzinowuluka dumbu.
22Golomodzo ne lufu zoti,
‘Takahwa makwayi koga nge zebe dzedu.’
23“Ndzimu ndiwo unoziba zila inoyenda kuguli,
ndiwo woga unoziba kwagunogala.
24Ngoti ndiwo unobona kunoti ku phelelo dze shango,
unobona zose zwipasi kwe zhuzhugwi.
25Wakati upa phepo simba,
ukakala vula, udzipa tjilizanyo,
26ukadusila vula nlayo,
ukathamila lupenyo gwe vula zila,
27ndipo kee, pawakagubona ukaleba nge kwago,
ukagusisithila, ukagulika.
28 #
Njimbo 111:10; Makungulupeswa 1:7; 9:10 Ngono Ndzimu ukadwa nthu uti,
‘Bona, kutja She ndigo butjenjedu,
kuleya mbipo ndiko hwisiso.’ ”
Kalanga Bible © Bible Society of Botswana, 2008, 2018.