Jobe 2
2
Satani unolika Jobe kakale
1Kukazha limwe zhuba kakale bakololo be Ndzimu bakazha kuwozwilakidza mbeli kwa Yahwe, Satani kazhabo nabo. 2Ipapo Yahwe bakabhuzwa Satani beti, “Unodwa ngayi?”
Satani kadabila Yahwe eti, “Ndodwa kuyendayenda mu shango ne kupotelekapoteleka muili.” 3Ngono Yahwe bakadwa Satani bakati, “Apa wabe ne hanya ngekwe nlanda wangu Jobe kene? Akuna nthu unonga iye mu shango, nthu usina nlandu, wakatambunuka una ntutshi unotja Ndzimu kakale unoleya mbipo. Nenguba wakathama kuti ndinlobe shamu asina nlandu aazolashikigwa ngolulwama kukwe.” 4Satani kashandula eti, “Nthu ungakoba tjimwe ne tjimwe tjaanatjo kuti ndizo atjengete butjilo gugwe. 5Koga tambunudzani luboko gwenyu ngwenu muhwise mbili uwe ne mafupa awe zogwadza unowomutuka patjena!”
6Yahwe bakadwa Satani beti, “Kwakalulwama, ndokupa iye, koga butjilo gugwe igo usitongo gukuma.”
7Ndizo Satani kamilika mbeli kwa Yahwe ngono kathama kuti Jobe abhudiwe nge malonda mbili wose kudwa mu nsholo kunoti ku makumbo. 8Jobe kamilika kanogala pa tjizhalanlota ngono katola tjiyenga kazwing'wanga natjo. 9Ipapo nkadzi uwe kandwa kati, “Apa utjakabhatilila mu kululwama kuko? Tuka Ndzimu ufe.”
10Koga Jobe kanshandula eti, “Unolebeleka se tjilengwe tje nkadzi. Apa takafanila amutjila zwakanaka koga kudwa ku Ndzimu kene? Zwibiibi izo atizofanila kuzwiamutjila kene?” Muna zose izwezwi Jobe aazothama tjibi nge nlomo uwe.
Bakwinya ba Jobe banonshola
11Kwakati bakwinya ba Jobe batatu Elifazi we N'temani na Bhilidadi we N'shuhi na Zofa we N'namathi behwa kuti Jobe wawigwa nge mang'oni mangapani, bakadwa mu magalo akasiyana siyana bakashangana kunon'nyaladza. 12Ngono bakati be milidza mesho bali thambgwana bakasibhate kuti ndiani, ngono bakamilidza mahwi abo bakalila kwazo, bakapalula zwiambalo zwabo bakazwidila hwuluba mu misholo yabo. 13Ngono bakagala naye pasi mazhuba ali kutendeka ne masiku ali kutendeka, koga kwakasheta ne nng'ompela wabo wakan'dwa dama, ngobe bakabe bebona kuti umu kugwadzika kukulu kwazo.
Kalanga Bible © Bible Society of Botswana, 2008, 2018.