Jobe 1
1
Satani unolika Jobe
1Kwakati kukabe ne nlume mu shango ye Uzi, zina lile kuyi Jobe, wakabe ali nthu usina nlandu, wakatambunuka, unotja Ndzimu kakale unoleya mbipo. 2Jobe wakabe ana bakololo bali kutendeka ne bakololokadzi bali batatu, 3wakabe ana pkhwizi dzili zwiwulu zwili kutendeka (7 000) ne kamela dzili zwiwulu zwili zwitatu (3 000) ne majokwi e ng'ombe ali mazana mashanu (500) ne madonki makadzi ali mazana mashanu (500) ne balanda bali banjinji kwazo. Ndizo wakabe ali nthu wakafuma kwazo mu bathu bose baku bhezhuba.
4Bakololo ba Jobe bakabe begala belabana kuthama nzano mu misha yabo, ngono bakabe bekoka hazwadzi dzabo kuti bawoja ne kung'wa nabo. 5Kwakabe kuti mazhuba e nzano awila Jobe wakabe etumila bathu kuti bana babe badang'we kuti abatjenapadze, wakabe ebinduka mangwanana edusila mmwe ne mmwe wabo tjibhayilo tjinopisiwa ngobe wakabe ekumbula kuti bangadwa bakathama tjibi kakale bakatuka Ndzimu mu mimoyo yabo. Jobe wakabe ethama sa ikoku zwibaka zose.
6 #
Kutangisa 6:2
Ngono kwakati limwe zhuba bakololo be Ndzimu#1:6 bakololo be Ndzimu: Mu Tjidumano tjikulukugwi kodwiwa batumwa be kudzimu. bakazha kuwozwilakidza mbeli kwa Yahwe, Satani kazhabo nabo. 7Yahwe bakabhuzwa Satani beti, “Unodwa ngayi?” Satani kadabila Yahwe eti, “Ndodwa kuyendayenda mu shango ne kupotelekapoteleka muili.”
8Ngono Yahwe bakabhuzwa Satani beti, “Apa wabe ne hanya ngekwe nlanda wangu Jobe kene? Akuna nthu unonga iye mu shango, nthu usina nlandu, wakatambunuka kakale unotja Ndzimu kakale unoleya mbipo.”
9 #
Zumbunulo 12:10
Ipapo Satani kadabila eti, “Apa moti Jobe unomutjila suli kene? 10Apa amuzombakilila nge bhakasa iye nebe nsha uwe nenge tjimwe ne tjimwe tjaanatjo kene? Makakombolela tjimwe ne tjimwe tjaakashinga nge maboko awe kakale makampa zwithuwo zwinjinji zwizhele shango. 11Koga tambunudzani luboko gwenyu mubulaye tjimwe ne tjimwe tjaanatjo, unowomutuka patjena!”
12Ngono Yahwe bakati kuna Satani, “Kwakalulwama, tjimwe ne tjimwe tjaanatjo ndotjilonga mu luboko gugo koga iye nge kukwe usitongobuya ukankutha nge tjinyala tjitjo!” Ndizo Satani kadwa mbeli kwa Yahwe kayenda.
Kolomogwa kwe thundu ya Jobe
13Kwakati limwe zhuba bakololo ne bakololokadzi ba Jobe bakabe bali mu nzano beja beng'wa nkumbi we zhambi ku nsha we hwola yabo, 14kukazha ntumwa kuna Jobe kabe eti, “Ng'ombe dzabe dzilima ngono madonki efula tjapejo, 15ngono bathu be Sheba bazha bakadzinginilila bakadzitakula bakayenda nadzo. Babulaya balanda bose nge thumo. Ndimi ndonga ndasiya kuwomuzibisa!”
16Ntumwa wakati asathu awidza matama awe mmwe ntumwa kazha kati, “Moto we Ndzimu waloba pkhwizi ne balisi bose. Ndimi ndoga ndapudzumuka kuzha ndiwomuzibisa.”
17Ntumwa wakati atjalebeleka mmwe ntumwa kazha eti, “Bakhaladiya bazha bakazwibumba makupo matatu bakanginilila dzikamela bakadzitola bakayenda nadzo. Babulaya balanda bose nge thumo ndimi ndoga ndasala kuwomuzibisa!”
18Nlanda wakati atjalebeleka mmwe nlanda kazha eti, “Bakololo ne bakololokadzi benyu babe beja beng'wa nkumbi we zhambi bali ku nsha we hwola yabo, 19tjinyolotjo kukazha dutu lidwa ku tjilambanyika likavuna phanda nna dze ng'umba, ngono ng'umba ikabawila ngono bafa bose, ndimi ndoga ndasala kuwomuzibisa.”
20Ipapo Jobe kamilika kapalula zwiambalo zwizwe, katesela#1:20 kapalula…kutesela: Tjilakidzo tjekuti nthu umu tjililo. nsholo uwe, kawila pasi kanamata. 21Ngono kati, “Ndakazwagwa ndili mbujo, ndowobgwilila ndili mbujo, Yahwe bakapa, Yahwe batola. Ngakukudziwe zina la Yahwe!”
22Muna ikoku kose Jobe ha aazotjinya kene kuli kutendeka Ndzimu nge tjinyala.
Kalanga Bible © Bible Society of Botswana, 2008, 2018.