Jobe 3
3
Jobe unong'ong'ola ku Ndzimu
1 #
Jeremiya 20:14-18
Shule kwa ikoku, Jobe kazhula nlomo uwe ngono kalonga bhiso zhuba laakazwagwa nalo. 2Jobe kalebeleka eti,
3“Ungati zhuba landakazwagwa nalo lingaloba,
kose ne busiku gwakayi, ‘Mwana we mbisana wazwisengwa!’
4Thamani kuti zhuba ilelo libe zhalima,
Dzene Ndzimu upezhugwi ungakangang'wa nge kwalo,
dzene kukasibe ne tjedza tjinopenya mulili.
5Dzene zhalima ne dutshi zwingati zwi mulili.
Dzene makole kalikwitidza.
Dzene zhalima lingakulila tjedza tjalo.
6Busiku igoguje ngagukuligwe nge zhalima!
Ngalisibaligwe mu mazhuba e gole kene kuli kugubalila mu mimwedzi.
7Dzene busiku igoguje gukabe balumbila,
dzene kukasihwike nsindo we mpululu muguli.
8Budzani ibabo banolonga bhiso mazhuba balonge bhiso zhuba ilelo,
ibabo banoziba kumusa zhithu le gungwa linoyi Livatani.#3:8 zhithu…Livatani: Bamwe banotola kudwiwa ngwena.
9Thamani kuti nyenyedzi ye masasi itundubale,
dzene gungalindila suli tjedza tje zhuba
ngagukong'we ngobona mazazi ekutanga e zhuba mangwanana.
10Ngobe aguzozhalila mikoba ye tjibumbilo tja mmeyangu,
gukasumbikila mesho angu mang'oni.
11“Ini ndisakafa nditjazwagwa koga,
kene ndakatjinyikila mu tjibumbilo?
12Ini kwakabe ne zwidwi kundiamutjila kene?
Ini kwabe ne mazhamu kundimwisa kene?
13Ngobe ngwenu ndingabe ndililele nge mbakiso zwangu,
ndingabe ndililele ndakanyaluluka zwangu,
14ndina bomambo ne bakumbuludzi be shango,
bakazwibakila magalo ngono ngwenu abe matongo,
15kene ndina bakololo be bushe bakabe bana golide,
ibo bakabe bana ng'umba dzizhele siliva.
16Kene ini ndisakabiganyiwa se wazwagwa asingatjile kene?
Se lushabana gusathu gukabona tjedza tje zhuba kene?
17Ikweno babi bamisa kudziyidzika,
ikweno bakanyala bakanyaluluka.
18Basungwa bagele bose bakaliga makumbo,
abatohwa hwi le nshingisi.
19Batukunu ne bakulu bayikweno,
balanda bakasununguka muna botetshi babo.
20“Ini tjedza tjipiwa umu kudziyidzika,
ne butjilo gupiwa una meya dzakagwadzika kene?
21 #
Zumbunulo 9:6
Ibabo banoyemula lufu ngono gusipo,
ibo banogushaka kupinda fumwa yakasumbikika,
22ibo banoshatha kwazo ha bebona gomba le lufu.
23Ini butjilo gupiwa nthu we zila dzakasumbikala,
iye wakabakiligwa bhakasa nge Ndzimu?
24Ngoti shungu yangu yatjibe zojiwa zwangu,
ndotshinda ngo gomela kwangu kunonga vula inowunga.
25Ngoti tjandagala nditja tjandishingikalila,
tjandagala nditja tjandiwila.
26Andizo gadzikana, andina kunyaluluka,
kuzhe kwe mang'oni koga.”
Kalanga Bible © Bible Society of Botswana, 2008, 2018.