Jeremiya 47
47
Ndayidzo ngekwe Bafilisitiya
1 #
Isaya 14:29-31; Ezekiele 25:15-17; Jowele 3:4-8; Amosi 1:6-8; Zefaniya 2:4-7; Zakhariya 9:5-7 Dama la Yahwe lakazha kuna Jeremiya nlebesambeli ngekwe Bafilisitiya Faro asathu katapa nzi we Gaza liti,
2“Yahwe bakati,
‘Bonani vula inopubuka idwa ku bunandzwa,
ngono inowobe nkuku wakasizikana,
inowosizikana mu shango ne pamwe ne pamwe kwayo,
mu mizi mikulu na ibabo banogala muili.
Bathu banowomimila,
ne bagali bose be shango banowolila.
3Ku misindo ye kutshamba kwe mbizi ndume dzakalabuka,
mu kulabuka kwe koloyi dzidze dze ngwa,
mukupitukana kwe makumbgwana adzo,
botate abatowoshanduka bakalinga bana babo,
maboko abo anotetema koga,
4ngekwe zhuba laswika
kuwolobesa Bafilisitiya bose,
ne kubulaya kudwa mu Tire ne Sidoni
babhatshi bose bakasala.
Ngoti Yahwe banolobesa Bafilisitiya,
limbelimbe le tjekelo dze gungwa dze Khafithori.
5Gaza yatjibe bhalo loga,
Ashikeloni yalobesiwa.
Iwe limbelimbe le nkuku wabo,
unowozwitjeka kuswikila lini kene?
6“ ‘Yee mme wee thumo la Yahwe!
Lowotola tjibaka tjingapani kuti linyaluluke kene?
Bgwilila mu gobhodo lilo,
nyaluluka udzikame!’
7Koga linga nyaluluka tjini wali,
apa Yahwe bakalidwa,
bakali laula
kuti linginilile Ashikeloni ne gungwa kene?”
Kalanga Bible © Bible Society of Botswana, 2008, 2018.