Jeremiya 46
46
Ndayidzo ngekwe Egipiti
1Dama la Yahwe lakazha kuna Jeremiya nlebesambeli ngekwe zwitjaba. 2#Isaya 19:1-25; Ezekiele 29:1—32:32Ngekwe Egipiti, lakalingisana ne babhayani ba Faro Neko, mambo we Egipiti, bakakundiwa ku Karikhemishi pa Gwizi gwe Yufuratesi ndi Nebukadineza mambo we Bhabhiloni mu gole le bunna le mbuso wa Jehoyakimu nkololo wa Josiya mambo we Juda liti,
3“Lulwamisani zwivikisi zwikulu ne zwitukunu,
mutshambe makazwilulwamisila ngwa!
4Sungani mbizi dzenyu,
mudzitathe imwi bataswi be mbizi!
Imani zubuyanana makaambala hwutshe dze ngwa,
kuswani mathumo enyu,
ambalani zwivikisi zwenyu zwe ifuba!
5Ndobonelani ikoku?
Batemeka mafupa,
babgwilila shule.
Babhayani babo bakundiwa,
batizha tjinyolotjo,
basingatjebuke shule,
lutjo gumu mbizho dzose!
Koleba Yahwe.
6Unalubilo angatubule kutizha,
mbhayani aangatubule kusiya,
ku bunandzwa ku Gwizi gwe Yufuratesi,
bakuthiwa bakawa.
7“Ndiani iwoyu unosuma se Naili,
se gwizi gwakatuta matanda kene?
8Egipiti inosuma se Naili,
se gwizi gwakatuta matanda.
Inoti, ‘Ndowomilika, ndowofukidza shango,
ndowokolomola mizi mikulu ne bagali bayo.
9Endilani mbeli imwi mbizi,
labukani makasima imwi koloyi dze ngwa!
Tshambilani mbeli imwi babhayani,
balume be Khushi ne Puti bakabhata zwivikisi,
balume be Ludi nyambi dze matati.’
10“Zhuba ilelo i zhuba la She Yahwe Masimbawose,
zhuba le kubgwilizila,
be zwibgwilizilila ku zwita zwabo.
Thumo lowoja kudzina lagutshika,
likang'wa malopa kudzina laguta malopa abo.
Ngoti Yahwe Ndzimu Masimbawose bakabhata tjibhayilo,
ku shango ye bunandzwa pa Gwizi gwe Yufuratesi.
11Tathila ku Giliyadi unotola nyonje,
iwe mwanadi we Egipiti!
Wakashingisila suli miti minjinji,
auna bhodzo.
12Zwitjaba zwakahwa ngekwe shoni dzidzo,
shango izhele tjililo tjitjo,
ngoti mbhayani wakabhayana ne mbhayani,
ngono bakanowa bubili gwabo.”
Nebukadineza mambo we Bhabhiloni waswika
13 #
Jeremiya 43:10-13
Dama la Yahwe labakaleba kuna Jeremiya nlebesambeli ngekwe kuzha kwa Nebukadineza mambo we Bhabhiloni kunginilila Egipiti ndelinoti,
14“Leba mu Egipiti kakale uzibise ku Migidolo,
zibisa ku Memifisi ne Tahefanesi,
uti, ‘Imani muzwilulwamise,
ngoti thumo lawoja kumupoteleka.’
15Ini bakasima babo baligwa kene?
Abatotubula kuma ngoti Yahwe babaliga.
16Babaliga nge bunji, banowa,
banowilana pezhugwi.
Banodwana beti,
‘Milikani, ngatibgwilileni ku bathu bedu,
ku shango yatakazwaligwa,
titizhe thumo le ntshambilidzi.’
17Ikoko banowomimila beti,
‘Faro mambo we Egipiti ba nsindo we ngwa koga
ngono baleya tjibaka tjakalingisana.’
18“Nge malebeswa anditjatjila, koleba Mambo,
be zina labo linoyi Yahwe Masimbawose,
se Tabori pakati kwe matombo,
se Karimeli pa gungwa mmwe unowozha.
19Lulwamisani zwitolombaje zwenyu kutapiwa,
imwi bagali be Egipiti!
Ngoti Memifisi inowothukudziwa,
akabe dongo lisina bagali.
20“Egipiti i ng'ombe yakanaka kwazo,
ngoti thuzi ye ng'ombe kudwa ku bunandzwa yaswika ku ili.
21Ne babhayani babe bakahiriwa bayapo pakati kwayo,
banonga phulu dzakakodziwa,
na ibobo bashanduka batizhabo,
abazotubula kuma,
ngoti zhuba le mbatsha labawila,
tjibaka tje kulobgwa shamu kwabo.
22“Egipiti inothama nsindo unonga we nyoka itizha,
ngoti zwita zwizwe zotshamba zwakasima,
zozha kubhayana naye nge mashathu,
sa ibabo banotema miti,
23banowotema miti yayo.
Koleba Yahwe,
kene ikabe yakamandana kwakatini,
ngoti banjinji kupinda phashu,
abatobalika.
24Nkololokadzi we Egipiti unowobhatisiwa shoni,
kalongwa mu maboko e bathu banodwa ku bunandzwa.”
25Yahwe Masimbawose Ndzimu we Iziraela bakati, “Bonani, ndabe pejo ne loba shamu Amoni ndzimu we Thebesi na Faro ne Egipiti ne midzimu yayo na bomambo bayo, na Faro na bose banogalabgwe mu nli. 26Ndowobalonga mu maboko aibabo banoshaka kubabulaya, mu maboko a Nebukadineza mambo we Bhabhiloni ne makulukota awe. Shule kwa ipapo Egipiti inowogagwa koga se mu misi ya ntolo,” kojalo Yahwe.
27 #
Jeremiya 30:10, 11 “Koga usitje, iwe Jakubo nlanda wangu,
kene ili kutemeka mafupa, iwe Iziraela,
ngoti nge lebeswa ndowokutjidza uli kulekule,
ne bana babo baku shango ye kutapiwa kwabo.
Jakubo unowobe ne mbakiso ne kubakililika kakale,
akuna unowon'thama kuti atje.
28Usitje iwe Jakubo nlanda wangu,
koleba Yahwe,
ngoti ndinawe.
Ndowozhisa bhelelo lizhele ku zwitjaba zose,
zwandakakutatila ku zwili,
koga nge kuko anditowozhisa bhelelo lizhele.
Ndowokutjemela koga nge kwakatambunuka,
anditowokuletja koga ndisakuloba shamu.”
Kalanga Bible © Bible Society of Botswana, 2008, 2018.