Jeremiya 48
48
Ndayidzo ngekwe Moabu
1 #
Isaya 15:1—16:14; 25:10-12; Ezekiele 25:8-11; Amosi 2:1-3; Zefaniya 2:8-11 Ngekwe Moabu.
Yahwe Masimbawose, Ndzimu we Iziraela bakati,
“Yee mme wee wapalala iwe Nebo ngoti unowobe dongo.
Kiriyathayimu yabhatisiwa shoni yatogwa,
dizhilo labhatisiwa shoni kakale laligwa,
2gudzo le Moabu alitjipo.
Mu Heshibhoni banon'lukila bubi beti,
‘Izhani ngatin'peleledzeni kuti asibe itjaba!’
Na webo, iwe Madimeni unowonyaladziwa,
thumo lowokutatamila.
3“Nsindo we buyendasi unodwa ku Horonayimi uti,
‘Kuthukudzika ne golomodzo gulu!’
4Moabu yakolomogwa,
siyang'wa dzayo dzolila.
5Dzotathila nge zila ye Luhiti,
dzilila kwakabangalala dzili mu zila,
mu zila inodelukila ku Horonayimi,
kulila kunopalusa moyo ngekwe golomodzo kohwika.
6Tizhani! Muzwitjidze!
Munge denjana mu tjilambanyika!
7Se mugalabgwe mishingo yenyu ne fumwa yenyu,
namwibo mowotogwa,
Khemoshi unowotapiwa,
kose ne bapirisiti babe ne makulukota.
8Nkolomodzi unowozha mu nzi nkulu mmwe ne mmwe,
ngono akuna nzi nkulu unowosiya,
nkuku unowoloba,
ne tjibata tjowokolomogwa,
Koga sekwa kaleba Yahwe.
9“Ipani Moabu mapapilo,
kuti ndizo awulukile kule,
mizi mikulu iye inowothukudziwa,
ikasala isina bagali muili.
10“Bhiso ngalibe mu nli una butjapa mu nshingo wa Yahwe!
Bhiso ngalibe mu nli unodziba thumo lile kutebula lopa!
11“Moabu yagala ili gele khenyenye kudwa mu butjetjana gwayo,
yakadzikama se madzongwe mu saka,
aizodusila madzongwe mu tjimwe tjija,
kene kuli kutapiwa,
ndizo igele sekwa yakabe ili iko,
kunohwa kwayo akuzoshanduka.
12“Ndizoke, bonani, mazhuba aswika, kojalo Yahwe, andinoti ayitumila balume banoswina nkumbi we zhambi, banowoyiswina, bakatebula zwithu zwayo, bakapkhwanya hali dzayo. 13Ipapo Moabu inowobhakhwa nge shoni ngekwa Khemoshi koga se ng'umba ye Iziraela yakatongo bhakhwa nge shoni pabakagalabgwe Bhetele.
14“Ini ungati, ‘Bangayi bakundi
ne balume bakasima be ngwa kene?’
15Nkolomodzi we Moabu ne mizi yayo mikulu wazha,
bazhuzha bayo bakashalugwa banobulawa,
kojalo Mambo, ibo zina labo linoyi Yahwe Masimbawose.
16Kuwa kwe Moabu kwasendela,
mbatsha dzoizhila tjinyolotjo.
17Mu ililile imwi banogala kuipoteleka,
imwi munoziba tjilumbi tjayo,
muti, ‘Swimbo ye bumambo yavunika,
ludozo gwe gudzo gwavunika seni!’
18“Deluka kudwa mu gudzo lilo,
ubuye wogala pasi pakakwakwalala,
iwe n'gali we Diboni!
Ngoti nkolomodzi we Moabu unobhayana nawe,
wakolomola matizhilo awo.
19Mila ntome ulingilile,
iwe n'gali we Aroeri!
Bhuzwa watizha kene wasiya,
uti, ‘Kwashingikalani?’
20Moabu yabhatisiwa shoni ngoti yapkhwanyiwa,
mimilani mulile!
Budzani be Arinoni,
kuti Moabu yathukudzika.
21“Kusumikilisiwa kwazha ku shango yakawala ne ku Holoni ne ku Jaza ne ku Mefaati 22ne ku Diboni ne ku Nebo ne ku Betidibilatayimu 23ne ku Kiriyathayimu ne ku Betigamuli ne ku Betimeyoni 24ne ku Keriyoti ne ku Bhozira ne mizi mikulu yose ye shango ye Moabu ipejo ne ikule. 25Simba le Moabu la lashigwa kutjena, ne luboko gwayo gwathubuligwa kutjena, kojalo Yahwe.
26“Unlaladzise ngoti akazwikudza kupinda Yahwe, kuti ndizo Moabu ibumbuluke mu matho ayo, ngaibe tjithu tje madado koga. 27Apa Iziraela aizobe tjithu tje madado kukuli kene? Apa yakawanika ili pakati kwe mbava, kwakabe kuyita kuti uti ulebeleka nge kwazo uzunguze nsholo uwo kene?
28“Siyani mizi mikulu munogala pakati kwe shongwe,
imwi bagali be Moabu!
Ibeni se njiba dzi mu mashaka,
dzi ku lubizho kwe guwu.
29“Takahwa kuzwikudza kwe Moabu,
kuti inozwikudza kwazo,
nge kuzwitolela pezhugwi kwayo ne kuzwida ne kuzwibona,
ne kube mashungwa ndibongwe kwayo.
30Ndoziba bushongola gwayo
ne kuzwiloba ifuba kwayo kuti madatha,
kojalo Yahwe.
Kuzwiloba ifuba kwayo atetjimwe koga.
31Ndizo ndolilila pezhugwi ngekwe Moabu,
ndolilila Moabu yose koga,
ngoti balume be Kiriheresi ndi mu buyendasi nge kwabo.
32Ndomulilila kupinda Jazeri,
iwe nzhambi we Sibima!
Imwi matabi akapasulila ku gungwa,
kunoti ku gungwa gwe Jazeri.
Nkolomodzi wawila
pezhugwi kwe mitjelo ne zhambi dzenyu dzakabidwa.
33Kushatha ne mpululu azwitjipo,
kudwa mu minda dze mitjelo ne minda dze Moabu.
Ndakamisa kuwunga kwe nkumbi we zhambi,
kudwa mu maswinilo,
akuna unowoswina nge kushatha,
Nenguba kuna misindo,
ate misindo ye kushatha.
34“Misindo ye tjililo tjabo inokulila pezhugwi,
kudwa mu Heshibhoni kunoti ku Elealehi ne ku Jahazi,
kudwa mu Zoari kunoti ku Horonayimi ne ku Egilati Shelishiya,
ngoti ne vula dze Nimirimu dzakapkhwa.
35Ku Moabu ndowozhisa bhelelo,
kuna ibabo banodusa zwipo mu magalo a pezhugwi,
bepisila motsha midzimu yabo,
kojalo Yahwe.
36Ndizo moyo wangu unolilila Moabu se nyele,
unolila se nyele ulilila balume be Kirihareseti.
Fumwa yabakashaba yakapela.
37Nsholo mmwe ne mmwe wakatesegwa,
ndedu dzose dzakathubugwa,
luboko gumwe ne gumwe gwakatjekiwa,
thunji dzose dzakapombiwa nge jila le saka.
38Mu matenga wose mu Moabu
ne ku zwibata,
akuna tjimwe kuzhe kwe tjililo koga,
ngoti ndavunilila Moabu,
se jegwa lisina unolishaka,
koleba Yahwe.
39Yapaladziwa seni! Banolila seni!
Moabu wakalonga nsholo seni nge shoni!
Moabu watjibe tjithu tje madado,
tjithu tjino tjisa kuna bose bakan'poteleka.”
40Ngoti Yahwe bakati,
Bonani, tjita tjowowuluka se dzu,
tjikafukidza mapapilo atjo pezhugwi kwe Moabu.
41Keriyoti inowotogwa,
ne matizhilo ayo anowotogwa.
Mu zhuba ilelo mimoyo ye babhayani be Moabu,
inowonga moyo we nkadzi umu zwibhayo zwe kutshibama.
42Moabu inowokolomogwa ikasitjibe itjaba,
ngoti yakazwikudza mbeli kwa Yahwe.
43Paluka moyo ne gomba ne bhuzhu zwakamulinda
imwi bathu be Moabu,
kojalo Yahwe.
44Iye unotizha kupaluka moyo,
unowila mu gomba,
iye unobhuda mu gomba,
unowobhapkhwa nge bhuzhu,
ngoti ndowozhisila Moabu
gole le kulobgwa shamu,
kojalo Yahwe.
45Mu ntutshi we Heshibhoni,
batizhi banowoma basina simba,
ngoti moto wapubuka mu Heshibhoni,
bhuba kudwa pakati kwe Sihoni,
lopisa phazha dze Moabu,
ne zwipepe zwe bavanganyi.
46Yee mme wee wapalala iwe Moabu!
Bathu be Khemoshi balobesiwa,
bakololo babo batapiwa
ne bakololokadzi babo batolegwa ku busungwa.
47“Nenguba kwakajalo ndowobgwiliza fumwa ye Moabu,
mu mazhuba anozha,
kojalo Yahwe.”
Ipapa ndipo panopelela kusumikilisiwa kwe Moabu.
Kalanga Bible © Bible Society of Botswana, 2008, 2018.