Isaya 32
32
Bumambo gwe Ndulamo
1Bonani, mambo unowobusa nge ndulamo,
ne makulukota anowolaula nge kutambunuka.
2Mmwe ne mmwe wabo unowonga matizhilo e phepo,
banowonga mabgwatilo e dutu,
banowonga hwoba dze vula mu tjilambanyika,
bakanga ntutshi we shongwe hwulu mu shango yakawoma inopisa.
3Ipapo mesho ebanobona aanga zhalilike,
ne zebe dze banohwa dzowohwilila.
4Mikumbulo ye banopaparika inowohwisisa,
ne ndimi dze banokakang'wa dzolebeleka zubuyanana dzihwika.
5Tjilengwe atjitowobe tjitjadang'wa mpezha,
ne nthu mbiimbi angabe atjakudziwa.
6Ngoti zwilengwe zoleba bulengwe,
ne mikumbulo yazo inokumbula kutjinya.
Zothama kusakalulwama,
zwileba kusiiko ngekwa Yahwe.
Bana zhala zosiya basina tjinobagutsha,
bana nyota zobanyima vula.
7Babiibi banoshingisa mbipo se tjibhayano,
banothama ndongoloso dzakabipa
kulobesa bashayi nge matama e manyepkhwa,
nenguba kukumbila kwe nsheti kwakatambunuka.
8Koga bathu bapezha banothama ndongoloso dzakalulwama,
ngono nge zwakalulwama banoma bakasima muna tjabanoshinga.
Bomme be Jerusalema misi yakasima yaswika
9Imwi bakadzi bagedzikane
milikani muhwe tjandinoleba,
imwi bakololokadzi banogutshika,
teedzani ndebeleko yangu.
10Mu mazhuba mashomanana shule kwe gole,
mowotetema imwi bagedzikane,
ngoti mizhambi aitowozwala,
akutowobe ne nsi we kutjela mitjelo.
11Dziidzikani imwi bakadzi bagedzikane,
muteteme imwi banogutshika.
Mbulani zwiambalo zwenyu,
muzwipombe nge saka mu thunji.
12Lililani ngekwe minda dzakanaka,
ne ngekwe mitjelo ye mizhambi,
13ngekwe shango ye bathu bangu
yakamela mihwa ne mitinyana inobhaya,
ee lililani ng'umba dzose dze kushatha,
ne nzi nkulu uzhele kushatha.
14Ng'umba ye bumambo inowosiiwa,
nzi nkulu unazhoba unotizhiwa,
matizhilo ne ngadzi zowobe matongo tjatjose,
kowobe panoshathisa madonki e shango, mafulilo e ngubi
15kuswikila meya inodwa zhuzhugwi idigwa mutili,
tjilambanyika tjibe nnda una mavu akakola,
nnda una mavu akakola ube unga ishaka.
16Ipapo kutambunuka kowogala mu tjilambanyika,
ne ndulamo ikagala mu nnda una mavu akakola.
17Zwizwalo zwe ndulamo inowobe mbakiso,
ne mbuzilo ye ndulamo ikabe kunyalala ne kugalabgwe nge kusingapele.
18Bathu bangu banowogala mu magalo ana mbakiso,
mu magalo akabakililika,
mu magalo ana kunyaluluka kusina tjingabatshonyonga.
19Ishaka tjowothukudziwa nge buzhalo nge tjivulamabgwe,
nzi nkulu ukakolomogwa kukasisale tjimwe tjawo.
20Mowoshatha kukulukulu seni,
mudzwala mbewu mu hwunde dze lukoba,
ng'ombe dzenyu ne madonki enyu zwifula nge kusununguka.
Kalanga Bible © Bible Society of Botswana, 2008, 2018.