Isaya 33
33
Kusunungugwa mu zwita
1Yee mme wee, wapalala iwe nkolomodzi,
koga iwe usathu ukakolomodziwa,
iwe unowonga,
koga iwe kusina unokuwonga.
Unowoti umisa kukolomodza,
iwe ukakolomodziwa,
ha umisa kuwonga
iwe unowowongiwa.
2Yahwe mutihwile ngoni,
takalinga kumuli.
Ibeni masimba edu mangwanana mamwe ne mamwe,
mube jidzo ledu mu nsi we manikano.
3Nsindo we kudzongeka ha uhwika,
bathu banotizha,
ha mumilika,
zwitjaba zopalala.
4Thundu yenyu inowokubulugwa itapiwa,
kukanga papinda mashonja eja asingasiye tjimwe,
kukafanana ne papinda phashu.
5Yahwe ngabakudziwe,
banogala pezhugwizhugwi,
banowowatsha kutambunuka
ne ndulamo mu Ziyoni.
6Ndibo kudzikama kwe misi yenyu,
jidzo ne butjenjedu ne zibo,
kutjika kwa Yahwe ndiko fumwa ye Ziyoni.
7Bonani, ngamula dzabo dzolila mu dzizila,
thumwa dze mbakiso dzolila kunogwadza.
8Zila hwulu dzatizhiwa,
bayendi akuna wabo umu zila.
Tjidumano tjatjinyika,
batendeki batjo banolengudziwa,
akuna unotetiwa.
9Shango inolila inotimbama,
Lebanoni yakahwumana inowoma,
Sharoni iyo yanga tjilambanyika,
ku Bhashani ne Karimeli mazhani anoshashamuka.
10“Ndowomilika ngwenu,
ndowokudziwa ngwenu,
Koleba Yahwe.
Ndowolakidza bukulu gwangu.
11Mowozwisenga bunye,
mukatshibama malala,
meya yenyu moto unowomupisa.
12Bathu banowotshwa bakasala benga suko,
benga mihwa yatemegwa pasi ibe ipisiwa nge moto.”
13Imwi bakulekule, ihwani tjandakashinga,
namwi bapejo dumani masimba angu.
14Batjinyi mu Ziyoni banolobgwa nge hana,
basina Ndzimu banotetema.
“Ndiani mu tili ungatjila ne moto unopisa kene?
Ndiani mu tili ungatjila ne mithuto isingapele?”
15Ibabo banotjila zwakalulwama beleba tjakatambunuka,
ibabo banolambana ne kutshambilidza,
be wuzwila kutjena tjizwimbanlomo basingatjiamutjile,
bezwina zebe dzabo kuti dzisihwe ngekwe kutebula malopa
ne mesho abo be avululwata kuti asibone tjakabipa,
16ndibo banowogala mu magalo apezhugwi.
Matizhilo abo anowobe matombo akasima.
Banowopiwa zojiwa zwabo ne vula abangaishete.
17Mesho enyu anowobona mambo mu bubuya gwabo,
mowobona shango yakatalabudzika.
18Mowokumbula ngekwe kutja kwakatongobepo.
Mowozwibhuzwa muti, “Ungayi wakatongobe ana simba,
iye wakabe elipisa lukhetho?
Ungayi wakabe ebala dzithungamakole?”
19Akuna sada dzamutjawobona,
bathu be lulimi gusingahwike gwausingake uka guziba,
lulimi gunonga nthu ekakang'wa, gusingahwike.
20Linga Ziyoni, nzi nkulu we mizano yedu yabigwa.
Mesho enyu anowobona Jerusalema,
magalo ana kunyalala, nshasha ugele usina tjingaazunguza,
una phanda dzisingasimuke,
ne misungo yakawusunga ayingathubuke.
21Ngono ikweno Yahwe banowobe bali ibo Bakasima,
magalo ana njizi phabi ne woba,
kusina migoro ye zwita ingayenda mu dzili,
kene zwikepe zwakasima zwingapinda po.
22Ngoti Yahwe ndibo nsumikilisi wedu,
Yahwe ndibo mbusi wedu,
Yahwe ndibo mambo wedu ngono banowotitjidza.
23Misungo ye ikepe tjenyu yakanyeba,
ingatubule kumisa bhangwana le ikepe mu magadziko alo,
ingatubule ne kutambunudza saile le ikepe.
Ngono ipapo towotapa thundu njinji tikaikobana,
ne tjilema tjowotapabo thundu.
24Bagali be Ziyoni akuna unowotongoti, “Imi ndogwala.”
Bathu banogala ikoko banowozwiibhatigwa matjinyo abo.
Kalanga Bible © Bible Society of Botswana, 2008, 2018.