Isaya 31
31
Egipiti inowobhakhwa nge shoni
1Yee mme wee! Mapalala imwi banoyenda ku Egipiti beshaka bhatsho
kakale begalabgwe mu mbizi,
banogalamoyo mu koloyi dze ngwa ngoti dzili njinji
kakale begalamoyo mu babhayani banotaswa mbizi ngoti bakasima,
koga basingalinge kuna Wakayengemala we Iziraela
kene kuli kushaka gumbuludzo muna Yahwe.
2Ipapa naibo bakatjenjela kakale bangazhisa mbatsha,
kakale abatoshandukila tjabaleba,
koga banowobhayana ne nsha we bashingi be mbipo
ne banobhatsha ibabo banotjinya.
3Baegipiti bathu, ate bali Ndzimu,
mbizi dzabo i nyama ate dzili meya.
Yahwe abetambunudza luboko gwabo,
mbhatshi unowodengayila,
ngono unobhatshiwa unowowila pasi
ngono bose banowolobesiwa.
4Yahwe tjabanondidwa etji,
Kofanana ne shumba kene shumbana ibomba yakabhata tjayabhata,
kene gupo le balisi likadang'wa likagwisana nayo,
ayitotja mima dzabo kene kuli kutshonyongiwa nge zhoba yabo,
saikoko Yahwe Masimbawose banowodelukila kugwa
pezhugwi kwe Dombo le Ziyoni na pezhugwi kwe duthu lalo.
5Kofanana ne nyuni iwuluka pezhugwi,
Yahwe Masimbawose banowobakilila Jerusalema,
banoyibakilila bakayisunungula,
banowoyitjidza bakayigwila.
6Imwi bathu be Iziraela bgwililani ku bali ibo bamakapandukila kwazo. 7Ngoti mu zhuba ilelo mose koga mowolasha midzimu yenyu ye siliva ne midzimu ye golide, yamakathama nge maboko enyu azhele tjibi.
8Ipapo Asiriya inowoligwa nge thumo, koga lisi le nthu,
thumo lisi le bathu lowon'ja.
Inowotizha thumo,
bazhuzha bayo banowothamiwa balanda.
9Dizhilo layo lowokolomogwa, inowozhigwa ngotja
ne makulukota ayo anowotizha ngwa ngotja.
Koleba Yahwe bana moto wabo mu Ziyoni,
bana bhuba mu Jerusalema.
Kalanga Bible © Bible Society of Botswana, 2008, 2018.