Isaya 2
2
Kunyalala kusingapele
(Mika 4:1-3)
1Tjakabong'wa ndi Isaya nkololo wa Amozi ngekwe Juda ne Jerusalema yetji,
2Kowoti mu mazhuba anozha
Dombo le Ng'umba ya Yahwe
lowothumbidziwa likabe gulu kupinda mamwe matombo,
lowokudzigwa pezhugwi kupinda matuthu
ngono zwitjaba zose zowokulumukila ku lili,
3ngono bathu banjinji banowozha beti,
“Buyani titathe dombo la Yahwe
tiyende ku Ng'umba ye Ndzimu wa Jakubo,
kuti utidiye zila dzawo,
kuti ndizo tiyende mu zijana dzawo.”
Ngoti nlayo unowodwa mu Ziyoni,
dama la Yahwe lowobhuda mu Jerusalema.
4 #
Jowele 3:10; Mika 4:3 Banowosumikilisa pakati kwe zwitjaba
bakagadzanya bathu banjinji.
Bathu banowothula mathumo abo beathama zwikara zwe mapadza,
ne makanu abo bezwithama mipanga inosunulila miti.
Itjaba atjitjawosengela tjimwe itjaba mathumo
kene kuli kuzwidiyila ngwa.
5Be nsha wa Jakubo buyani,
tiyende mu tjedza tja Yahwe.
6Ngoti makalasha bathu benyu,
be nsha wa Jakubo.
Ngoti bazhele bakandili banodwa ku bhezhuba,
banokandila se Bafilisitiya,
bakazwizwadzanya ne bataya.
7Shango yabo izhele siliva ne golide,
fumwa yabo ayitopela.
Shango yabo izhele mbizi,
koloyi dzabo dze ngwa adzitopela.
8Shango yabo izhele midzimu,
banothigamila zwabakathama nge maboko abo,
zwakabumbiwa nge zwinyala zwabo.
9Ndizo nthu unowoyisiwa pasi,
unowolengudziwa.
Musibazwiibhatigwe!
10 #
Zumbunulo 6:15; 2 Batesalonika 1:9 Ngina mu shongwe,
ubgwate mu hwuluba,
ubgwatila kutjisa kwa Yahwe,
ne tjedza tje bukulu gwabo.
11Banozwikudza banoyisiwa pasi,
ne banozwida banowolengudziwa,
Yahwe boga ndibo banowokudziwa,
mu zhuba ilelo.
12Ngoti Yahwe Masimbawose bana zhuba,
linowoti bose banozwida ne banozwiyisa pezhugwi,
bose koga banozwikudza banoyisiwa pasi,
13misida ye Lebanoni,
yakakula ikulila pezhugwi,
ne mioko ye Bhashani,
14ne matombo malefu,
ne matuthu akamilidzikila pezhugwi,
15ne thungamakole imwe ne imwe,
ne luswingo gumwe ne gumwe gwakasimisiwa,
16ne ikepe tjimwe ne tjimwe tje Tashishi,
ne ikepe tjimwe ne tjimwe tjibuya.
17Banozwikudza banoyisiwa pasi,
ne banozwida banowolengudziwa,
Yahwe boga banowokudziwa mu zhuba ilelo.
18Ngono midzimu inowolobesiwa tjoselele.
19Bathu banowotizhila mu makuhwu mu shongwe,
ne mu mimwina pasi,
betizha kutjisa kwa Yahwe,
ne tjedza tje bukulu gwabo,
ha bemilika kuzunguza shango.
20Mu zhuba ilelo bathu banowolashila
midzimu yabo ye siliva neye golide,
yabakathama kuithigamila,
ku fuku ne kuna bomanlembe.
21Banowotizhila mu makuhwu,
ne mu phaswa dze shongwe,
betizha kutjisa kwa Yahwe,
ne tjedza tje bukulu gwabo,
ha bemilika kuzunguza shango.
22Letjani kugalabgwe mu nthu,
iye una meya yaanofema mu zwimilo.
Nthu ungabaligwa muni kene?
Kalanga Bible © Bible Society of Botswana, 2008, 2018.