Isaya 1
1
1 #
2 Bomambo 15:1-7; 2 Zwiyitikalo 26:1-23;
2 Bomambo 15:32-38; 2 Zwiyitikalo 27:1-9;
2 Bomambo 16:1-20; 2 Zwiyitikalo 28:1-27;
2 Bomambo 18:1—20:21; 2 Zwiyitikalo 29:1—32:33 Mbono ya Isaya nkololo wa Amozi yaakabona ngekwe Juda ne Jerusalema mu misi yakabe kubusa Uziya ne ya Jothamu ne ya Ahazi ne ya Hezekiya bomambo be Juda.
Itjaba tje bapanduki
2Hwilila iwe kudzimu, nawe shango zhula zebe,
ngoti Yahwe balebeleka bakati,
“Ndakalela bana abakudza,
koga bakandipandukila.
3Ngabe inoziba mweni wayo,
donki ikaziba painojisigwa nge mweni wayo.
Koga Baiziraela abatoziba,
bathu bangu abatohwisisa.”
4Yee mme wee! Mapalala imwi ludzi gunotjinya,
bathu banolemegwa nge zwibi,
ludzi gwe bashingi be bubi,
bana bakazwipa mbipo.
Bakafupatila Yahwe,
belasha Wakayengemala we Iziraela,
be ufupatila tjose.
5Apa ini mungabe mutjalobgwa kene?
Ini mudwilila mupanduka kene?
Nsholo wose unogwadza,
ne moyo wose unotimbama.
6Kudwila mu tshambo le gumbo kunoti ku nsholo uwo
akuna tjipenyu,
kuzhele mbonje ne kusubuka,
ne malonda akapubuka asakasukiwa,
kene kuli kuzwimbiwa nge tjimwe,
asina tjaakazhodziwa.
7Shango yenyu yakashakadziwa,
mizi yenyu mikulu yakapisiwa nge moto,
minda yenyu inothukudziwa nge bataya mu mesho enyu,
yakashakadzika mukanga semakundiwa,
nge badwakule.
8Nkololokadzi we Ziyoni wakasiyiwa
se nshasha umu nnda we mizhambi,
se thumba imu nnda we mabisi,
se nzi nkulu wakakombiwa nge zwita.
9 #
Kutangisa 19:24; Baroma 9:29 Kuzhe kwe kuti Yahwe Masimbawose
babe bakatisiyila malimbelimbe,
tingabe takanga Sodoma,
tikafanana ne Gomora.
10Ihwani dama la Yahwe,
imwi babusi be Sodoma,
muteedze nlayo we Ndzimu wedu,
imwi bathu be Gomora.
11 #
Amosi 5:21, 22 Yahwe bakati,
“Bunjinji gwe zwibhayilo zwenyu godwani kundili kene?
Ndakaamutjila kunopinda tjilizanyo kwe zwibhayilo zwinopisiwa,
zwe nyundo ne tshulo dze zwithuwo zwakakodziwa.
Anditoshathila malopa e mikono
ne pkhwizi ne mbudzi.”
12Amuzha mbeli kwangu,
ndiyani wakakushaka ikoku,
kutshamba tshamba misha yangu kene?
13Misani kuzhisa zwibhayilo zwisina nshingo.
Motsha wenyu unoshimika kundili.
Mizano yenyu ye Mwedzi ugala,
ne mazhuba enyu e Sabata,
ne mishangano yenyu mibiibi andingamilane nayo.
14Ndoshima Mizano yenyu ye Mwedzi ugala,
ne mimwe mizano yakabigwa mu misi yayo.
Yabe mitolo kundili,
ndanyala ngosengana nayo.
15Mowoti mumilidza maboko enyu,
mutembezela ndowozwimba mesho angu,
kene mukatembezela mitembezelo minjinji,
anditowoteedza,
ngoti maboko enyu azhele malopa.
16Ngulani mube babuyanana.
Dusani mishingo yenyu yakabipa,
mu mesho angu.
Misani kuthama mbipo,
17muzwidiye kushinga zwakanaka,
shakani kutambunuka,
mubhatshe banotshambilidziwa.
Mumile fanilo dze siyang'wa,
ne tjilikadzi mudzilebelekele.
18“Izhani sakuno tilebeleke koleba Yahwe.
Zwibi zwenyu kene zwili zwishaba se malopa,
zowobe zwitjena se kapuku,
kene zwili zwishaba kwakabondelela,
zowonga wulu.
19Ha muda kakale muhwa,
mowoja zwibuya zwe shango,
20koga ha mulamba mu panduka,
mowolobesiwa nge thumo,
ngoti Yahwe baleba.”
Nzi mbiimbi
21Bonani nzi wakabe ugalikabgwe,
washanduka tjini ukabe fukula.
Wakatongobe una kusumikilisa nge malebeswa,
ndulamo yakatongobe ili yapo muuli,
koga ngwenu babulayi koga.
22Siliva iyo yabe malala,
nkumbi uwo we zhambi washanganyiwa ne vula.
23Babusi babo babe bapanduki,
babe bakwinya be mbava,
banoda kupiwa tjizwimba nlomo,
bakada kupiwa zwipo.
Abatobhatsha siyang'wa,
kene kuli kukumbula tjilikadzi.
24Ndizo wali She, Yahwe Masimbawose,
ibo Masimbawose be Iziraela banolebeleka beti,
“Ee, ndowolakidza bushongola mu zwita zwangu,
ndowozwibgwilizilila mu zwita zwangu.
25Ndowokutolela thambo,
ndowodusa manyiri awo nge buzhalo,
adusa shambgwa iyo yose.
26Ndowobuza basumikilisi babo bakanga ibabaje be kutanga,
bakumbuludzi babo babe se be kutanga.
Shule kwa ipapo unowodang'wa nzi nkulu we ndulamo,
nzi nkulu unogalamoyo.”
27 Ziyoni unowodzutunugwa nge kwakatambunuka,
muuli banoshanduka banowodzutunugwa nge ndulamo.
28Koga bapanduki ne babi banowolobesiwa,
naibabo banosiya Yahwe banowopedzisiwa.
29Mowobhakhwa nge shoni ngekwe mioko,
yamunoshathila,
mowobhatisiwa shoni ngekwe minda,
ya makashalula.
30Mowofanana ne n'oko
unobuna mazhani,
mukanga nnda usina vula.
31Nthu wakasima unowonga bushwa gwakawoma,
mishingo iye ikanga sasi,
ndizo kose kowotshwa,
kusina unokudzima.
Kalanga Bible © Bible Society of Botswana, 2008, 2018.