Isaya 3
3
Kusumikilisiwa kwe Jerusalema ne Juda
1Ngono bonani, She, Yahwe Masimbawose
bapejo ngodusa mu Jerusalema ne Juda
zwinotjidza,
zojiwa zose ne vula yose,
2nlume wakasima ne mbhayani,
nsumikilisi ne nlebesambeli,
nkandili ne nkulu,
3ntungamili we ngwa ye bali makumi mashanu
ne una mamo,
nkumbuludzi ne nyambi ye mishingo
ye maboko ne ng'anga.
4Ndowothama bayisana bakabe makulukota abo,
shabana dzowobabusa.
5Bathu banowotshambilidzana,
nthu etshambilidza mmwe nthu,
mbakidzani etshambilidza mbakidzani uwe.
Batjetjana banowodeyelela bahwola,
bathu basi betjimwe bakadeyelela bana mamo.
6Nthu unowotola hama iye,
mmwe we ludzi gwa tate babe ebe eti,
“Iwe una jasi, ibe ntungamili wedu, ube iwe unolaula matongo iyawa.”
7Koga mu zhuba ilelo unowomilidza hwi eti,
“Anditowobe mpodzi.
Andina zojiwa kene jasi mu ng'umba yangu,
usindithame ntungamili
we bathu.”
8Nge malebeswa Jerusalema inodzunguluka,
Juda iyo yawa,
ngobe ndebeleko dzabo ne mishingo yabo inobhayana na Yahwe,
banolandula bukulu gwe kubeyapo kwabo.
9Ndingiko ye njiso dzabo dzoleba tjibi nge kwabo.
Dzoleba tjibi tjabo se Sodoma,
abatosumbika.
Yee mme wee! Bapela!
Ngoti bazwizhisila mbatsha nge kwabo.
10Budza balulwami kuti kowoyenda zubuyanana nge kwabo,
ngekuti banowoshathila mbuyilo ye mishingo yabo.
11Yee mme wee! Batjinyi! Mbatsha dzinabo.
Ngoti tjakashingwa nge maboko abo nditjo tjabanowothamigwa.
12Bana batshambilidzi be bathu bangu,
bakadzi banobabusa.
Bathu bangu, batungamili benyu banomutungamilila ntome,
banomudzimidza mu zilana dzenyu.
13Yahwe batola magalo abo mu lubazhe,
bamilika kusumikilisa bathu.
14Yahwe bawosumikilisa
bakulu ne makulukota e bathu babo belebeleka beti:
“Ndimwi makathukudza nnda wangu we mizhambi,
zwamakatapa mu bashayi zwizhele mu ng'umba dzenyu.
15Modwani kene nge kukhwa bathu bangu
mugaya njiso dze bashayi?” Kolebeleka She Yahwe Masimbawose.
16Yahwe bakati,
“Ngoti bakololokadzi be Ziyoni banozwida,
bebe beyenda bakadongolodza mitshibha,
belingalinganya nge mesho abo,
betshamba nge thambo futshwanana benyezukila,
bakaambala maseka anoyenda elonga zhoba mu makumbo.
17Ndizo wali She banowodusa malonda
mu misholo ye bakololokadzi be Ziyoni,
Yahwe banowothama misholo yabo kube ne mapalo.”
18Mu zhuba ilelo She banowodusa mubali minakiso yabo: inombagwa mu makumbo ne inombagwa mu misholo ne mu mitshibha, 19mang'ina ne ndalama ne masiri, 20tukwi ne maseka ne ngumbgwana dzinobigwa mu mathudzi ne mabokisi emafuta anonuwisa zwinozipa ne zwitshweku, 21ring'i dzabanoambala mu zwinyala ne mu zwimilo, 22zwiambalo zwe mizano ne kepesi ne hazu ne zwikwama; 23ne zwiboni, zwiambalo zwe matyila ne hwutshe ne tyali.
24Mu bumo gwe nnuhwo unozipa kowobe ne nnuhwo wakabipa,
mu bumo gwe mwandabula, kowobe ne ntjili,
mu bumo gwe mavudzi akakamiwa zwakanaka, kowobe ne bhalo,
mu bumo gwe zwiambalo zwakanaka, kowobe ne tjiambalo tje saka,
mu bumo gwe bubuya, kowonga kwababugwa nge tshipi ye lutjwayo.
25Balume banowofa gwe thumo,
babhayani banowofa mu ngwa.
26Mikoba ye Ziyoni inowolila ikakuwa,
asitjina waanaye, unowogala pasi.
Kalanga Bible © Bible Society of Botswana, 2008, 2018.