Ezekiele 25
25
Ndebelombeli ngekwe Amoni
1 #
Jeremiya 49:1-6; Ezekiele 21:28-32; Amosi 1:13-15; Zefaniya 2:8-11 Dama la Yahwe likazha kundili liti, 2“Nkololo we nthu, lingisana ne Baamoni ulebesembeli ngekwabo. 3Ubadwe uti, ‘Ihwani dama la She Yahwe. Tjinolebgwa ndi She Yahwe etji, Nge kuti makati, “Ahaa!” ngekwe bugalo gwangu pagwakabe gwatemapala ne shango ye Iziraela payakabe yathukudziwa nenge ku bathu be Juda pabakabe batapiwa, 4ndizowali ndowomulonga mu maboko e bathu be ku bhezuba kuti bamukunde. Banowobaka pakati kwenyu bebaka mishasha yabo pakati kwenyu, banowoja mitjelo yenyu bakang'wa nkaka wenyu. 5Ndowothama Rabha mafulilo e kamela, Amoni ndowoithama danga le zwithuwo. Ipapo mowoziba kuti ndimi Yahwe. 6She Yahwe bakati, Nge kuti makaloba phande mukazanazana nge kushatha kubiibi mu moyo yenyu ngekwe shango ye Iziraela, 7ngekwako bonani ndowotambunudza luboko gwangu amukoba nge njudzi se thundu yatapiwa. Ndowomubulaya mu njudzi amulobesa mu shango. Ndowomulobesa. Ngono ipapo mowoziba kuti ndimi Yahwe.’ ”
Ndebelombeli ngekwe Moabu
8 #
Isaya 15:1—16:14; 25:10-12; Jeremiya 48:1-47; Amosi 2:1-3; Zefaniya 2:8-11 “She Yahwe bakati, ‘Se Moabu ne Seiri dzakati bonani, Juda inonga njudzi dzose koga, 9ndizo wali ndowozhula Moabu mu hwunde nditangisa nge mizi yawo yakamilidzika, Bhetijeshimoti ne Bhaalemeyoni ne Kiriyathayimu gudzo le shango. 10Ndowolonga Moabu kang'ompela ne Baamoni mu maboko e njudzi dze ku bhezhuba nge zila inowothama kuti Baamoni basitjakumbugwe kakale pakati kwe njudzi, 11ngono ndowolidza shamu mu Moabu. Ipapo banowoziba kuti ndimi Yahwe.’ ”
Ndebelombeli ngekwe Edomu
12 #
Isaya 34:5-17; 63:1-6; Jeremiya 49:7-22; Ezekiele 35:1-15; Amosi 1:11, 12; Obhadiya 1:1-14; Malaki 1:2-5 “She Yahwe bakati, ‘Se Edomu yakabgwilizila bathu be Juda, ngono bakabe nlandu nge kuthama saikoko, 13nge kwaikoko She Yahwe bakati, “Ndowotambunudza luboko gwangu kubhayana ne Edomu ndibulaya bathu bayo ne phuka dzabo. Ndowoithukudza, kudwa mu Temani kunoti ku Dedani banowobulawa nge thumo. 14Ndowobgwilizila Edomu nge luboko gwe bathu bangu Baiziraela, banoshingila Edomu kuyendidzana nge kugwadzamoyo kwangu ne bushongola gwangu, banowoziba kubgwilizila kwangu, koleba She Yahwe.” ’ ”
Ndebelombeli ngekwe Filisitiya
15 #
Isaya 14:29-31; Jeremiya 47:1-7; Jowele 3:4-8; Amosi 1:6-8; Zefaniya 2:4-7; Zakhariya 9:5-7 “She Yahwe bakati, ‘Se Bafilisitiya bakabgwilizila nge meya yakabipa beshingisa lubengano gwa ntolo kukolomodza Juda, 16ndizo wali She Yahwe bakati, “Ndowotambunudza luboko gwangu kubhayana ne Bafilisitiya ngono ndowobulaya Bakereti alobesa basala mu tjekelo dze gungwa. 17Ndowobabgwilizila kunolema ndibaloba nge shamu izhele kugwadzamoyo. Ipapo banowoziba kuti ndimi Yahwe ha ndibabgwilizila.” ’ ”
Kalanga Bible © Bible Society of Botswana, 2008, 2018.