Ezekiele 26
26
Ndebelombeli ngekwe Tire
1 #
Isaya 23:1-18; Jowele 3:4-8; Amosi 1:9, 10; Zakhariya 9:1-4; Matewu 11:21, 22; Luke 10:13, 14 Mu gole le bugumi lina ling'ompela, mu zhuba le kutanga le mwedzi, dama la Yahwe lakazha kundili liti, 2“Nkololo we nthu, nge kuti Tire yakati ngekwe Jerusalema, ‘Ahaa, nkoba unobhudila ku njudzi wakavunika ndizo mikoba yakandizhukila se Jerusalema ili matongo imi ndowowatshika.’ 3Ndizo She Yahwe bakati, Bona, imi ndobhayana nawe, Tire! Ndowokugwisanya nge njudzi njinji se gungwa gututudza mabundo e vula. 4Dzowokolomodza makuma e Tire dzikaligila pasi thungamakole dzayo. Ndowokukula mavu e Tire kukasala shongwe koga patjena. 5Inowobe panotambunudzigwa njanga mukati kwe gungwa. Ngoti ndaleba, kojalo She Yahwe. Inowobe thundu yatapiwa ku njudzi 6ngono mizi yayo muili inowobulawa nge thumo. Ipapo banowoziba kuti ndimi Yahwe.
7“She Yahwe bakati, Ndowozhisa Nebukadineza mambo we Bhabhiloni kudwa ku bunandzwa kubhayana ne Tire, mambo wabo mambo, ana mbizi ne koloyi dze ngwa, ana bataswi be mbizi ne ngwa hwulu ina masimba. 8Unowobulaya bakololokadzi mu minda nge thumo. Unowokupoteleka nge guma le ngwa kabaka matathilo kukupoteleka kakumilidzila zwiviko zwizwe. 9Unowolingisanya kukatsha kwe nyundo makuma awo ngono kapkhwanya thungamakole dzidzo nge mashathu awe. 10Mbizi dzidze dzowobe dzili njinji hwuluba yadzo inowokukwididza. Nsindo we mbizi dze ngwa newe zwileyi newe koloyi dze ngwa unowozunguza makuma awo. Unowongina mikoba iyo se bathu bengina mu nzi waligwa guma. 11Unowotshambatshamba zila dzidzo dzose nge thozo dze mbizi dzidze. Unowobulaya bathu babo nge thumo phanda dzidzo dzakasima dzowowila pasi. 12Banowotapa fumwa iyo bakatapa ne thundu yaunoseenya, banowoliga makuma awo bakakolomodza ng'umba dzidzo dzakanaka. Mabgwe awo ne makwasayile awo banowozwilashila mu gungwa. 13#Zumbunulo 18:22Ndowonyaladza nlidzo we njimbo dzidzo, nsindo we zwilidzo zwizo awutjowohwika kakale. 14Ndowokuthama lutombo gupatjena, unowobe panotambunudzigwa njanga. Awutowotjabakwa kakale, nge kuti imi Yahwe ndajalo, koleba She Yahwe.
15“Ndizo She Yahwe bakati ku Tire, Apa shango dzimu tjekelo dze gungwa adzitowotetema nge nsindo we kuwa kuko kene, panowobe bakubala begomela ne kubulawa kushingikala mukuli? 16#Zumbunulo 18:9, 10Ipapo makombgwa wose e shango dze tjekelo dze gungwa anowodeluka zwigalo zwawo zwe bumambo, banowombula hazu dzabo bakambula ne zwiambalo zwabo zwakanakisiwa. Banowozhala lutjo bakagala pasi betetema tjibaka tjose bakakukaabalila. 17Ngono banowokulilila beti, ‘Zila yawawa ndiyo iwe nzi nkulu unozibika wakatongobe wakasima mu gungwa iwe ne bakabaka mukuli wakabe utjisa bose bakabaka mu shango iyeyi! 18Ngwenu shango dzose dze tjekelo dze gungwa dzotetema mu zhuba le kuwa kuko zwigwizi mu gungwa zwapaluka moyo ngekwe kuwa kuko.’
19“She Yahwe bakati, Ha ndikuthama dongo le nzi nkulu se mizi mikulu isingatjagagwe, andipitsha vula dze gungwa pezhugwi kuko, ngono vula dzakangina dzikufukidza 20ipapo ndowokuyisa pasi naibabo banodelusigwa mu gomba, ku bathu bantolo. Ndowomuthama kuti mugale mu shango pasi se mumu matongo antolo muna ibabo banodelusigwa pasi mu gomba ngono amutowoshanduka kene kuli kutola magalo enyu mu shango ye batjili. 21#Zumbunulo 18:21Ndowomuzhisila bhelelo lakabipa ngono amutjowobepo kakale nenguba mungashakwa amungatjawang'we kakale, kojalo She Yahwe.”
Kalanga Bible © Bible Society of Botswana, 2008, 2018.