Ezekiele 24
24
Hali inobila
1Mu gole le buzhanalume, mu mwedzi we bugumi, mu zhuba le bugumi le mwedzi we bugumi, dama la Yahwe lakazha kundili liti, 2#2 Bomambo 25:1; Jeremiya 52:4“Nkololo we nthu, kwala nasi kuti mwedzi nngana nasi zhuba lino nge kuti mambo we Bhabhiloni wakomba Jerusalema nge ngwa. 3Leba ngopesa ku bapanduki ibaba uti, ‘She Yahwe banolebeleka bakati,
“ ‘Biga hali pa moto, uibige pa moto
udile vula muili.
4Ulonge muili thango dze nyama,
thango dzose dzakanaka,
tjidzwa ne bhandabuko,
uizhadze nge mafupa akanaka.
5Ushalule inodzipinda dzose mu ngubi
ulobele hwuni kusi kwe hali,
ukapaidze thango dze nyama dzimu ili
ubhike kose ne mafupa muili.
6“ ‘Ndizo wali Yahwe banolebeleka bakati,
“ ‘Yee mme wee iwe nzi nkulu unotebula malopa
hali ina bulala muili,
isakatongo sukiwa bulala.
Dusa nyama muili thango ne thango
usingashalule.
7Nge kuti malopa aakatebula amuili
wakaitebulila pezhugwi kwe shongwe,
aazoitebulila pasi
kuti aivukidze nge mavu.
8Ku musa bushongola gwangu, kuti ndibgwilizile,
ndakadila malopa aakatebula
pezhugwi kwe shongwe
kuti asivukidziwe.
9“ ‘Ndizo wali tjinoleba She Yahwe ndi etji,
“ ‘Yee mme wee wapalala iwe nzi nkulu uzhele malopa.
Imi namibo ndowothama swinga gulu le hwuni.
10Ndizo tathikanya hwuni njinji,
ubhatidze moto
Bhika nyama zubuyanana,
uyishanganye ne zwinoizipisa
mafupa apisiwe.
11Uyigadze pa masimbe isina tjimukati,
kuita kuti ipise, khopa yayo ipenye,
shambgwa yayo inyawuke, bulala gutshwe gupele.
12Ndakazwinyadzila suli,
bulala gwayo bukodu agutopedziwa nge moto.
13Shambgwa iyo bupombgwe gugo,
ndakati ndokutjenapadza ndikudusa mu bupombgwe gugo
koga auzotjenapala mu shambgwa iyo,
aungatongo tjenapala kakale
kuswikila bushongola gwangu gwagutshika mukuli.
14“ ‘Imi Yahwe ndalebeleka. Tjibaka tjabe itjo tjekuti nditole thambo. Anditowononoka, anditowohwila zogwadza kene kuli kuzwidziba. Unowosumikilisiwa kuyendidzana ne mazwiibhato awo nenge mishingo iyo. Koleba She Yahwe.’ ”
Nkadzi wa Ezekiele unofa
15Dama la Yahwe likazha kundili liti, 16“Nkololo we nthu, bona nge hwada ing'ompela ndowodusa mukuli tje moyo uwo. Koga usitongo lila kene kuli kutebula mishodzi. 17Ususuthike nge kunyalala, usitongo lilila nfi. Mbala tjiala tjitjo mu nsholo ne shangu dzidzo mu makumbo, usitongo zwimba buso gugo ne zojiwa zwe balili usitongo zwija.”
18Ndizo ndakalebeleka ne bathu mangwanana ngono madekwana nkadzi wangu kafa. Tjimuka mangwanana ashinga sekwa ndakadwiwa.
19Ipapo bathu bakandibhuzwa bakati, “Apa aungatibudze kuti zwithu izwezwi zodwani ku tili kene?”
20Ndizo abadwa ati, “Dama la Yahwe lazha kundili likati, 21Idwa bathu be Iziraela uti, ‘Tjinolebgwa ndi She Yahwe etji, Bona ndipejo nge kulengudza bugalo gwangu gwakayengemala, mbako yakasima yamunozwikudza ndiyo, shathiso ye moyo yenyu, tje ludo gwenyu. Bakololo ne bakololokadzi bamakasiya banowonofa nge thumo. 22Ngono mowothama sekwa ndathama. Amutowozwimba njiso dzenyu kene kuli kuja zojiwa zwe balili. 23Mowombala zwiala zwenyu mu misholo yenyu ne shangu dzenyu mu makumbo enyu. Amutowolila koga mowokorotela ngekwe zwibi zwenyu, mowosusuthika pakati kwenyu. 24Ndizo Ezekiele unowobe tjilakidzo kumuli, imwi mowothama sekwa athama. Ikoku kowoti kushingikala mowoziba kuti ndimi She Yahwe.’
25“Ngono iwe nkololo we nthu, mu zhuba ilelo landinowobatolela ng'umba yabo yakasima, nditola kushatha kwabo ne gudzo labo, shathiso yabo ne tje moyo yabo ne bakololo babo ne bakololokadzi babo naibobo, 26mu zhuba ilelo, wasiya unozha kuwomubikila tjashingikala. 27Mu zhuba ilelo nlomo wenyu unowozhuka ngono mukalebeleka naye ngono mukasinyalale. Ndizo unowobe tjilakidzo ku bali, ngono banowoziba kuti ndimi Yahwe.”
Kalanga Bible © Bible Society of Botswana, 2008, 2018.