Ezekiele 2
2
Kudang'wa kwa Ezekiele
1Kati kundili, “Nkololo we nthu, milika ume nge makumbo ngono ndowolebeleka nawe.” 2Ngono kati elebeleka nami, meya ikangina mu ndili ikandimisa nge makumbo ngono anhwa elebeleka nami. 3Kandidwa kati, “Nkololo we nthu, ndokutuma ku bathu be Iziraela, ku itjaba tjizhele bupanduki bakandipandukila, ibo na botate babo bakandipandukila kuswikila lino zhuba. 4Ludzi gwe misholo inopanda guna bukomba. Ndokutuma ku bali ngono ubadwe uti, ‘Koleba She Yahwe.’ 5Kene banohwa kene banolamba, ngoti ba itjaba tje bupanduki, koga banowoziba kuti nlebesambeli wakatongobe pakati kwabo. 6Koga iwe nkololo we nthu usibatje, ne matama abo usiatje. Usitongo tja kene zwishosho ne mihwa zwili pamwe ne pamwe kukupoteleka ugala pakati kwe phani, usitongotja matama abo kakale usitemiwe mafupa nge sekwa banolinga ngoti ba itjaba tje bupanduki. 7Koga iwe leba matama angu ku bali behwilila kene belamba, ngoti ba itjaba tje bupanduki. 8Koga iwe nkololo we nthu hwilila tjandinoleba nawe, usibe mpanduki se itjaba itjetji tje bupanduki, zhula nlomo uwo uje tjandinokupa.” 9#Zumbunulo 5:1Ndakati ndilinga, bonani, abona tjiazha tjakatambunudzigwa ku ndili ngono mutjili kuna lukwalo gwakakwagwa. 10Kaguzhula mbeli kwangu ngono gwakabe gwakakwagwa mukati na kuzhe matama e tjililo ne e guwo ne e kuhwazogwadza.
Kalanga Bible © Bible Society of Botswana, 2008, 2018.