Ezekiele 3
3
1 #
Zumbunulo 10:9, 10 Ngono bakandidwa bakati, “Nkololo we nthu, ija tjaunobona, ija lukwalo igogu ube uyenda unolebeleka ne itjaba tje Iziraela.” 2Ndizo aashama ngono bakandipa lukwalo kuguja. 3Ipapo bakati kundili, “Nkololo we nthu, ija lukwalo igogu gwandinokupa uzhadze ntumbu uwo ndigo.” Ndizo aguja ngono mu nlomo wangu guzipa se butji gwe nyutji. 4Ipapo bakabe beti kundili, “Nkololo we nthu, tjiyenda ngwenu ku itjaba tje Iziraela uswike ulebe matama angu ku bali. 5Ngobe anditokutuma ku bathu be ndebeleko isingazibgwe ne lulimi gwakasima, koga ndokutuma ku itjaba tje Iziraela. 6Anditokutuma ku bathu banjinji be ndebeleko isingazibgwe ne lulimi gwakasima, bana matama ausingake ukahwa. Nge malebeswa ha ndabe ndakutuma kuna bakajalo, ibo babe bangakuhwilila. 7Koga itjaba tje Iziraela atjingakuhwilile, ngoti atjitoda kundihwilila se tjili itjaba tje misholo inopanda ne tjina bukomba. 8Bona, ndowosunganya buso gugo sekwa bakasunganya njiso dzabo, ndowothama kuti usime moyo bo sekwa bakasima moyo. 9Phazha iyo ndathama kuti isime se bgwe lakasima kupinda hwulungwana, usibatje kene ukapaluka moyo nge kwabo nenguba bali itjaba tje bapanduki.” 10Kakale bakandidwa bakati, “Nkololo we nthu, matama wose andinokudwa ualonge mu moyo uhwe nge zebe dzidzo. 11Ndizo yenda ku bathu bakanyi kwenyu ba mu kutapiwa ulebeleke nabo. Ubadwe uti, ‘Koleba She Yahwe,’ kusingati tjimwe kene banohwilila kene abatohwilila.”
Ezekiele pa gwizi gwe Kheba
12Ipapo meya ikandimilidzila pezhugwi, ngono ahwa hwi gulu shule kwangu liti, “Gudzo la Yahwe ngalikudziwe mu bugalo gwabo.” 13Ngono ahwa nsindo we mapapilo e zwibumbiwa zwinotjila ekuthana ahwa ne nsindo we makumbgwana amu hwunde yazo, nsindo unodidima nge simba. 14Meya ikandimilidza ikandisenga ngono ayenda ndilizhele shungu ndakagwadza moyo, luboko gwa Yahwe gwakandibhata nge simba. 15Ndakanoswika ku batapiwa ku Tele Avivi ne gwizi gwe Kheba. Ngono agala pakati kwabo ndakakaabala mazhuba ali kutendeka ikoko kwabakabe begala. 16Shule kwe mazhuba ali kutendeka dama la Yahwe likazha kundili liti, 17“Nkololo we nthu, ndakuthama ntjengeti we itjaba tje Iziraela, ndizo wali ihwa dama landinoleba nge nlomo ubatjenjedze nge tjinodwa ku ndili. 18Ha ndingadwa nthu mbiimbi ati, ‘Nge malebeswa unowofa.’ Iwe ube usingantjenjedze, kene usingalebe wakasima kubhatsha mbiimbi kuthubukana ne bubi gugwe kuti atjile, mbiimbi iwoyu unowofila zwibi zwizwe, koga malopa awe ndowoashaka mu kuli. 19Koga ha ungatjenjedza nthu mbiimbi koga ebe asingathubukane ne bubi gugwe kene zila dzidze dzakabipa, unowofila jinyo lile, koga iwe unowobe wazwitjidza.
20“Kakale ha nthu wakalulwama eshanduka mu kululwama kukwe ebe etjinya ndibe ndibiga ikuthi mbeli kukwe, unowofa. Se usakankumbuludza, unowofa efila mu zwibi zwizwe. Zwakalulwama zwaakashinga azwitowokumbugwa, koga lopa lile ndowolishaka mukuli. 21Koga ha ungatjenjedza nthu wakalulwama kuti asitjinye ebe asingatjinye unowotjila ngoti waamutjila butjenjedu, ngono iwe wazwitjidza.”
Ezekiele unobe mbebebe
22Luboko gwa Yahwe gwakabe gwakandibhata ikoko, ngono bakandidwa bakati, “Milika uyende ku lubala ngono ndowolebeleka nawe ikweno.” 23Ndizo amilika ayenda ku lubala. Bonani, tjedza tja Yahwe tjakabe tjilimile ipapo tjinga tjedza tjandakabona pa gwizi gwe Kheba, ngono awila pasi nge buso.
24Ipapo Meya ikangina mu ndili ikandimilidza ama nge makumbo. Ngono Yahwe bakalebeleka nami bakati, “Yenda unozwizhalilila mu ng'umba iyo. 25Ngono iwe nkololo we nthu, bona, banowokusunga nge mitjili, unowosungwa ukasiboneke uyendayenda pakati kwe bathu. 26Ndowothama kuti lulimi gugo gunamatile mu bgwasha ndizo unyalale usitubule ku batjemela nenguba bali itjaba tje bapanduki. 27Koga ndowoti ndilebeleka nawe ndowozhula nlomo uwo ngono unowobadwa ukati, ‘She Yahwe bakati.’ ” “Iye unowohwa ngaahwe, naiye unowolamba kuhwilila ngaalambe, ngoti ba itjaba tje bupanduki.”
Kalanga Bible © Bible Society of Botswana, 2008, 2018.