Esita 6
6
Mambo unokudza Modekayi
1Mu busiku igogu mambo aazotongo izela, ndizo kalaula kuti kuzhisiwe lukwalo gwakakwagwa zwiyitikalo, ngono akagubaligwa. 2Ngono kwakawanika kwakakwagwa sekwa Modekayi akadziba shingikadziwa kwe gwanga gwakalukiwa nge ngomwa dza Mambo Bhigithani na Tereshi kuti dzibulaye mambo. 3Ngono mambo wakabhuzwa kati, “Modekayi wakathamigwani asinoshinga nshingo iwoyo kene?” Koga balanda ba mambo bakadabila beti, “Akuna tjaakathamigwa.” 4Ngono mambo kabe ebhuzwa eti, “Ndiani umu ng'umba hwulu?” Mu tjibaka itjetjo Hamani kwakabe kuli iko atjangina mu ng'umba hwulu awokumbila mambo kuti Modekayi asungiligwe mu thungamakole yaakabe abaka. 5Ndizo nlanda wa mambo kashandula mambo eti, “Ndi Hamani. Unoshaka kumubona.” Mambo kabe eti, “Undwe angine.” 6Ndizo Hamani kangina ngono mambo kandwa kati, “Ini wale tjandinga thamila nthu wandinoshakakudza?” Ngono Hamani kakumbula kati, “Ndiani wale ungakudziwa ndi mambo ha kusi imi koga?” 7Hamani kashandula mambo eti, “Nthu wamunoshakakudza, 8itini mmwe anzhisile imwe ye hazu dzenyu dzamakatongo ambala ne imwe ye mbizi dzenyu yamakatongo tatha iyo yakaambadziwa tjiala tje bushe mu nsholo wayo, 9ngono muthame kuti makulukota enyu makulu baambadze nthu iwoyo hazu yenyu ngono bantungamile mu zila dze nzi nkulu akatatha mbizi yenyu bamwe bakabhata bemimila beti, ‘Woku ndiko sekwa mambo banokudza nthu unobashathisa!’ ” 10Ipapo mambo kadwa Hamani kati, “Saku wale! Tola hazu ne mbizi sekwa waleba, uthamile Modekayi we Njuta unogala pa nkoba we bugalo gwangu zose zwawaleba usitongo siya ndodwa ne kung'ompela kwe zwithu zwawaleba.” 11Ndizo Hamani katola hazu ya mambo ne mbizi. Kaambadza Modekayi ngono ka ntungamila kupalama nzi nkulu akatatha mbizi. Hamani wakabe akabhata e mimila eti, “Etji nditjo tja mambo tjabanothamila nthu unobashathisa!” 12Shule kwa ikoku Modekayi kabgwilila ku nkoba wa mambo koga Hamani iye tjinyolotjo kalibilidzila ku nzi uwe elila akabhakhwa nge shoni. 13Ngono Hamani kazibisa nkadzi uwe Zereshi ne bakwiya babe tjashwa tjanshingikalila. Ngono bakumbuludzi babe ne nkadzi uwe bakandwa bakati, “Ha Modekayi ali Njuta athamwa saikoku, aungatjatubule, simba lilo lapela, nge malebeswa wokukunda.” 14Bakati batjalebeleka, ngomwa dza mambo dzikazha dzikatola Hamani tjinyolotjo ben'yisa ku mabhikwa akalulwamisiwa ndi Esita.
Kalanga Bible © Bible Society of Botswana, 2008, 2018.