Esita 7
7
Hamani unobulawa
1Ngono mambo na Hamani bakayenda ku zojiwa zwakabe zwalulwamisiwa ndi Esita. 2Bakati batjang'wa nkumbi we zhambi mambo kabhuzwa Esita gwe bubili eti, “Ini tjaunoshaka Esita? Leba koga ndowokupa itjo! Ndowokupa kungapa gwamu le bushe gwangu!”
3Nfumakadzi Esita kashandula eti, “Tetshi wangu, apa kumushathisa, ndokumbila kuti munditjidze imi ne bathu bangu, itjetji nditjo tjikulu tjandinokumbila. 4Ngobe imi ne bathu bakanyi kwangu takatengesiwa kuti ndizo tibulawe tilobesiwe tjoselele. Tetshi wangu ha ingabe kuli kuti takatengesiwa kube basungwa be balume ne bakadzi kusi kubulawa ndingabe ndisingalebe tjimwe ngobe ikoku kusi tjimwe koga tjingathama kuti ndidziyidze mambo.” 5Ngono Mambo Ahasurusi kabhuzwa Esita kati, “Ndiani iwoyo una tjilopa tjingapa tjekuthama saikoku kene? Ungayi?” 6Esita kashandula eti. “Tjibandana ne tjita tjedu yetjetji! Nlume iwoyo, we mbiimbi unoyi Hamani!” Hamani kapaluka moyo mbeli kwa mambo ne Nfumakadzi. 7Mambo kamilika alizhele bushongola bukulu akasiya zojiwa zwizwe kayenda ku nnda we maluba, koga Hamani iye kasala ezwikumbilila muna Nfumakadzi Esita kuti asibulawe, ngobe wakabe ebona kuli kale kuti mambo wazwipedza nkumbulo. 8Ngono kwakati koga mambo ebuya kudwa ku nnda ezha ku ng'umba ye zojiwa kawana Hamani akasendama tjigalo tjakabe tjili gegwe ndi Esita, ngono mambo kalebeleka kati, “Apa unodzula Nfumakadzi wangu mbeli kwangu, mu ng'umba yangu kene?” Mambo wakati asathu kaligila kulebeleka tjinyolotjo ngomwa dzidze dzikabe dzisunga Hamani mesho. 9Mmwe we ngomwa dza Mambo Habona kabe eti kuna mambo, “Tetshi wangu, Hamani wakabaka thungamakole ye bulefu gwe makumi ali kutendeka ne bushanu (75) kubapa ne ng'umba iye, kuti ndizo asungilile Modekayi muili.” 10Ngono mambo kabe eti, “Mu nsungilile muili.” Ndizo Hamani kasungiligwa mu thungamakole yaakabe alulwamisila Modekayi. Ndizo mambo kawiligwa.
Kalanga Bible © Bible Society of Botswana, 2008, 2018.