Esita 5
5
Esita unokoka Hamani
1Mu zhuba le butatu Esita kaambala zwiambalo zwizwe zwe bumambokadzi ngono kanoma mukatikati kwe ng'umba mbeli kwe ng'umba hwulu ya mambo. Mambo wakabe ali gele mu tjigalo tjitje mu ng'umba hwulu ye bushe akalingisana ne nkoba. 2Wakati ebona Nfumakadzi Esita ali mile pakati kwe ng'umba kanshathisa kwazo ngono katambunudza swimbgwana iye ye bushe yaakabe akabhata yakathamiwa nge golide, ngono Esita kasedzela kaibhata ku nsholo. 3Ipapo mambo bakandwa beti, “Kwatini Nfumakadzi Esita? Unoshakani kene? Leba koga, ndowokupa kunolizana ne gwamu le bushe gwangu.” 4Esita wakashandula eti, “Tetshi wangu, apa kumushathisa, ndokumbila kuti muzhe ku mabhikwa na Hamani andinowomululwamisa nasi.” 5Ngono mambo bakabe beti, “Danani Hamani abuye tjinyolotjo kuti azhe tithame tjinoshakiwa ndi Esita.” Ndizo mambo na Hamani bakayenda ku mabhikwa kuna Esita. 6Ngono bakati batja ng'wa nkumbi we zhambi, mambo kabe eti kuna Esita, “Ini tjaunoshaka ndikuthamile itjo? Leba koga ndowokupa kunolizana ne gwamu le bushe gwangu.” 7-8Ngono Esita kashandula eti, “Tetshi wangu apa kumushathisa, ndomukumbila kuti mushingikadze tjandinowokumbila, ndokumbila kuti muzhe na Hamani ku nzano we mabhikwa andinowomululwamisila kakale mangwana, mu tjibaka itjetjo ndipo pandinomubudza tjandinoshaka.” 9Zhuba ilelo Hamani wakayenda etshambila pezhugwi akashatha kwazo, koga wakati ebona Modekayi ali pa nkoba wa mambo, asingamilike kene kunlakidza zila imwe koga ye kunteta kazhala bushongola kwazo, 10koga kazwibhata kasilebe tjimwe ngono kayenda ku nzi uwe kanodana bakwinya babe ne nkadzi uwe Zereshi. 11Ngono Hamani katangisa kuzwikudza mbeli kwabo ngekwe fumwa iye nenge bakololo babe bose. Kababudza ngekwe zila dzose dzaakakudziwa ndi mambo ne nge mamo awe anopinda e makulukota wose ne bashingi bose ba mambo ne kuti bamwe bashingi banafanilo dze kunteta kungapani. 12Ngono Hamani kadwilila eti, “Bonani koga na Nfumakadzi Esita akuna mmwe waakoka kuti azhe na mambo ku nzano we mabhikwa kuzhe kwangu koga, ndizo takakokiwa imi na mambo ku zojiwa zwe mangwana. 13Nenguba kwakajalo ikoku kose akutondishathisa apa nditjabona Modekayi we Njuta atjipa nkoba we bugalo gwa mambo.” 14Ngono bakwinya babe ne nkadzi uwe Zereshi bakandwa bakati, “Iti kuthamwe thungamakole ye bulefu gunga bhata makumi mabili ana bubili, ngono mangwana mangwanana ukumbile mambo kuti Modekayi asungiligwe muili, kuti ndizo shule unoja mabhikwa na mambo wakashatha.” Ngono matama iyawa kashathisa Hamani ngono thungamakole ikabakwa.
Kalanga Bible © Bible Society of Botswana, 2008, 2018.