Esita 4
4
Modekayi unokumbila bhatsho kuna Esita
1Kwakati Modekayi asinoziba ngekwe zose zwakashingwa, kapalulanya zwiambalo zwaakambala, kazhola nlota, kaambala zwiambalo zwakathamwa nge saka, ngono kapalama nzi nkulu emimila guwo linohwisa zogwadza, 2kayenda tjose akajalo kudzina enoti pa nkoba we ng'umba ya mambo ngobe yakabe isi fanilo kuti nthu ungangina akaambala tjiambalo tje saka. 3Pamwe ne pamwe pakabe kwabikwa ndaulo ya mambo, Bajuta bakasala bali mu tjililo tjinotjenamisa, bezwinyima zojiwa, bunji gwabo bakaizela mu masaka bakaawala mu nlota.
4Kwakati balandakadzi ba Esita ne ngomwa basinobudza Esita tjakabe tjinothamwa ndi Modekayi kazhalilana kwazo, ngono kadusa zwiambalo kuti zwipiwe Modekayi aambale izo mu bumo gwezwe saka, ngono iye kazwilamba. 5Ngono Esita kadana Hathaki mmwe we ngomwa dza mambo, Hathaki wakabe adusiwa ndi mambo kuti ashingile Esita, kantuma kuna Modekayi kuti ambuzwe kuti koshingikalani. 6Hathaki wakayenda kuna Modekayi pa tjibata tji mbeli kwe nkoba we bugalo gwa mambo mu nzi nkulu, 7ngono Modekayi kambudza kose kwakanshingikalila nenge kuti Hamani wakagadzabgwe kulipa be dula la mambo bungana ha Bajuta balobesiwa. 8Modekayi wakampa ntutshi we ndaulo yabakadusigwa kudwa ku Susa kuti balobesiwe kuti ndizo anoilakidza Esita. Wakankumbila kuti aswike atjenesele Esita tjimo ngono andwe anokumbila mambo kuti babahwile zogwadza kuti ndizo bahwile bathu babe zogwadza. 9Ngono Hathaki akayenda kanobudza Esita tjalebgwa ndi Modekayi. 10Ipapo Esita katuma Hathaki kuna Modekayi kuti anondwa ati 11“Bakumbuludzi bose ba mambo ne bathu be bushe banoziba kuti apa nlume kene nkadzi anganginila ku ng'umba ya mambo asadang'wa, kuna nlayo nng'ompela koga wakanlingisana unoti, ‘abulawe,’ kuzhe kwe kuti mambo bangamilidzila swimbgwana yabo ye bushe yakathamwa nge golide mu nthu wakajalo ndizo kasibulawe. Koga imi ndipano ndakagala mazhuba ali makumi matatu andithu adanigwa ku ng'umba ya mambo.” 12Bakati bebudza Modekayi tjalebgwa ndi Esita, 13Modekayi kabadwa kati bayende banozibisa Esita yetji: “Usitongo kumbula kuti ne kuti unogala mu ng'umba ya mambo wakabakililika kupinda Bajuta bamwe. 14Apa unganyalala koga mu tjibaka tjino, sununguko ne jidzo le Bajuta zowodwa ntome koga iwe ne be nsha wa tate babo mukalobesiwa. Ndiyani dumbu ungaziba, bamwe nditjo tjawakabigigwa Nfumakadzi itjetji.” 15Ngono Esita wakashandula eti, 16“Yenda unokubunganya Bajuta bose bamu Susa, muzwinyime zojiwa. Musitongoja kene kung'wa kwe mazhuba matatu ne masiku matatu, ngono imi ne babhatshi bangu towozwinyimabo zojiwa namwi. Ngono kudwapo ndowoyenda kuna mambo nenguba kusi mu mpanga, koga ha ndifa ndowofa koga.” 17Ngono Modekayi kamilika kanothama tjimwe ne tjimwe tjaadwiwa ndi Esita.
Kalanga Bible © Bible Society of Botswana, 2008, 2018.