Nsumikili 11
11
Zojiwa pezhugwi kwe vula
1Posela zojiwa zwizo mu vula,
ngobe unowozwiwana shule kwe mazhuba.
2Kobela bali kutendeka,
kene bali zhanakadzi dumbu,
ngobe autoziba bubi
gunga shingikala mu shango.
3Ha makole ali zhele vula,
anoitebulila mu shango,
ne nti ha ungawila ku burwa kene bunandzwa,
pa unowila unolala ipapo.
4Iye unogala akalingilila phepo sekwa inothama aatodzwala,
ne unoziba makole e vula sekwa anothama aangavune.
5Se usingazibe kuti meya inozha tjini ku mafupa a muntumbu we nkadzi wakazwisenga, ndizo autoziba mishingo ye Ndzimu wakabumba zwithu zose.
6Dzwala mbewu iyo mangwanana ne madekwana usiletje shinga, ngobe autoziba kuti inowokula ndiyipi eyi kene eya kene dzose dzowomela. 7Tjedza tjakanaka, kwakanaka ku mesho kulinga zhuba. 8Iko ha nthu etjila kwe makole manjinji, ngaashathe tjibaka tjose itjetjo, koga azibe kuti mazhuba e zhalima anowobe manji. Kose kunozha madatha.
Gumbuludzo ku batjetjana
9Pembela iwe nzhuzha mu buzhuzha gugo, uletje moyo uwo ukushathise mu mazhuba e butjetjana gugo, tobela zila ye tjinoda moyo uwo ne zwinobong'wa ne mesho awo. Koga ziba kuti mu zwithu zose izwezwi Ndzimu unowokusumikilisa. 10Dusa kudziyidzika mu nkumbulo uwo, usundile kutjena zogwadza kudwa pa mbili uwo, ngobe butjetjana ne buzhuzha madatha.
Kalanga Bible © Bible Society of Botswana, 2008, 2018.