Nsumikili 10
10
1Thuzi dzakafa dzonuhwisa zwizholo zwakabipa,
saikoko bulengwe butukununu gokulila butjenjedu ne gudzo.
2Moyo we ntjenjedu unolinga zwakalulwama,
koga we tjilengwe unolinga zwakabipa.
3Nenguba tjilengwe tjiyenda mu zila, atjina mano,
koga tjoyenda tjilakidza mmwe ne mmwe kuti tjilengwe.
4Ha mbusi ekugwadzila moyo, usibhude pa uyapo,
ngoti kugadzikana kozwimba milandu mikulu.
5Kuna bubi gwandakabona mu shango,
godwa pa kuleyanya kwe babusi,
6bulengwe gowanika mu mamo manjinji a pezhugwi,
koga bafumi bali mu mamo a pasi.
7Ndakabona balanda bakatatha mbizi,
ne makulukota betshamba ne gumbo se balanda.
8 #
Njimbo 7:15; Makungulupeswa 26:27 Iye unotsha gomba unowowila mu lili,
ne nyoka inowoluma iye unowothuka guma.
9Iye uno pkhwanya mabgwe unowokubadziwa ndiwo,
naiye unophapha hwuni unowokubadziwa ne mbatsha dze hwuni.
10Shathu ha lakapuma, ngono nthu asakalikuswa,
wakafanila kushingisa masimba,
koga butjenjedu gobhatsha nthu kubhudilila.
11Ha nyoka ingaluma isathu ikalapiwa,
nlapi haatjina nshingo.
12Matama e nlomo we ntjenjedu anompa gudzo,
koga milomo ye tjilengwe inotjibulaya.
13Tjotanga ne kuleba bulengwe tjikanopedza tjileba bubi
gwe bupengo.
14Tjilengwe tjobalabala, akuna unoziba kuti mangwana kowobeni,
hakuna ungaleba kuti kowoshingikalani shule kwatjo.
15Kushinga kwe tjilengwe kotjinyadza kwatjinopelela
tjisingatjazibe zila inoyenda ku nzi nkulu.
16Yee mme wee! Mapalala imwi shango ha mambo wenyu ali itojana,
ne makulukota enyu ana nzano mangwanana.
17Wakakombolegwa iwe shango, ha mambo uwo akazwagwa mu nsha we bushe,
ne makulukota enyu ebe ne nzano mu tjibaka tjakalingisana,
kuti ba sime, kusikuti balaladze.
18Nge busimbe denga le ng'umba lowila,
ne kusazwibhatila ne maboko ng'umba ino na.
19Nzano wakathamigwa kushatha,
ne nkumbi we zhambi wakathamigwa zipisa butjilo,
ne mari i dabilo ye tjimwe ne tjimwe.
20Ne mu nkumbulo uwo, usitongolonga mambo bhiso,
kene uli mu ng'umbana iyo ye bulalo usilonge bafumi bhiso,
ngobe nyuni ye phepo inga senga hwi lilo,
kene tjimwe tjina mapapilo tjingasenga matama awo.
Kalanga Bible © Bible Society of Botswana, 2008, 2018.