Nsumikili 12
12
Kumbula Mbumbi uwo
1Kumbula Mbumbi uwo mu mazhuba e butjetjana gugo, mazhuba e bubi asathu aswika ne makole wosedzela pa unowobe uti, “Andina kushatha muali,” 2kusathu zhuba ne tjedza ne mwedzi ne nyenyedzi dzatundubala ne makole apadza, vula isinona, 3ipapo batjengeti be ng'umba betetema ne balume bakasima batjigogonyala, bakwiyi be gwiyo bemisa nshingo ngobe bali bashomanana ne banoshozhela ne mafesitere badzimigwa 4ne mikoba inobhudila ku dzizila yazhaligwa ne nsindo we gwiyo wabe pasi ne nthu e papadzuswa ne nlidzo we nyuni ne lumbo gwe bakololokadzi guli pasi, 5banotja ne zwipezhugwi ne zwinotjisa zwimu zila, nti we alimondi unothinila, bhombo lozwikweba ne kuyemula kokona ngobe nthu unoyenda ku nzi uwe we bupelo ne balili bano pungaila koga mu dzizila, 6kowoti kusathu kwatabhuka nsungo we siliva kene tjilongo tje golide tjipkhwanyika kene hali ye vula ipkhwanyikila ku tshime kene gumbgwana livunikila pa tshime 7ne hwuluba ibgwilila mu mavu mayakadwa ne meya ibgwilila ku Ndzimu wakaipa. 8Madatha e madatha, koleba Nsumikili, kose madatha.
Bhelelo
9Kuzhe kwe kutjenjela, Nsumikili wakadiya bathu luzibo, kuyela zwithu ne kuzwidiya ne kulongolosa makungulupeswa nge njele hwulu. 10Nsumikili wakashaka kuti awane matama anoshathisa nge ndulamo wakakwala matama e malebeswa. 11Ndebeleko dze batjenjedu dzofanana ne hwombo dzinobhaya ne mbambo dzakakothomegwa ndiko koga se matama akakubunganyiwa anopiwa ne Nlisi nng'ompela. 12Nkololo wangu, ube ne njele nge zwithu zwinopinda izwezwi. Kukwala hwalo njinji akutopela ne kuzwidiya kwakapindilila konyadza mbili.
13Bupelo gwe ndebo, kose kwahwika: Itja Ndzimu ulondolodze milayo yawo, ngobe ndiko koga nthu kwaakafanila shinga. 14Ngoti Ndzimu unowothama kuti nshingo mmwe ne mmwe usumikilisiwe, zose zwakasumbikala zwakanaka kene zwakabipa.
Kalanga Bible © Bible Society of Botswana, 2008, 2018.