Nsumikili 9
9
Bhelelo linofanana la bose
1Koga ikoku kose ndakakulingisisa, ha kushakisisa kose, kuti balulwami ne batjenjedu ne mishingo yabo bamu luboko gwe Ndzimu tjini, kungabe ludo kene lubengo koga nthu aatoziba tjimwe. Tjimwe ne tjimwe mbeli kwabo madatha, 2ngobe bhelelo labo bose ling'ompela, ku balulwami ne babiibi, ku babuya ne babiibi, kuna bakatjenapala ne kuna bakatemapala, kuna unodusa zwibhayilo ne kuna usingaduse zwibhayilo. Sekwa kuli iko ku nlulwami kwaka jalobo ku ntjinyi, ne unotuna unofanana koga ne usingatune. 3Ikoku bubi mu tjimwe ne tjimwe tjinoshingwa mu shango, kuti bhelelo le bathu ling'ompela, kakale kuti mimoyo ye bathu izhele bubi ne bupengo gumu mimoyo yabo ha batjatjila, kudwa ipapo banoyenda ku bafi. 4Koga iye unozwibhatshanya ne banotjila una kugalabgwe, mbgwa phenyu inoyita pa shumba yakafa. 5Bathu banotjila banoziba kuti banowofa, koga bafi abatoziba tjimwe, abatjina mbhayilo, akutjakumbugwa nge kwabo. 6Ludo gwabo ne benga kwabo ne yemula kwabo kwakadzima, abatjowobe ne gobe muna zwinoshingikala mu shango. 7Yenda, unoja zojiwa ne kushatha, ung'we nkumbi we zhambi nge moyo wakashatha, ngobe Ndzimu waka kudumila kale kwaunothama. 8Zwiambalo zwizo ngazwigale zwili zwitjena, usitongo letja kugala wakazhodza nsholo uwo mafuta. 9Zipigwa ne butjilo ne nkadzi uwo wa unoda, mazhuba wose asi a tjimwe awakapiwa ne Ndzimu mu shango, ngobe ndilo gobe lilo mu butjilo ne mu kushinga kwaunoshinga mu shango. 10Tjaunoshinga ne maboko awo, utjishinge ne masimba, ngobe akuna nshingo kene njalakang'wa kene luzibo kene butjenjedu ku bugalo gwe bafi, iko kwaunoyenda. 11Ndakabona kakale mu shango kuti lubilo ate gwe balelu kene kuti ngwa aitokundiwa ne bakasima kene zojiwa ku batjenjedu, kene fumwa kuna be luzibo gupezhugwi kene kudiwa kuna bana bunyambi, koga banowigwa bose ne zwinoyitikala. 12Nthu aatoziba tjibaka tjitje. Se hwobe dzinobhakwa ne gwanga gwakabangalala, kakale se nyuni dzinobhatshigwa ne bhuzhu, ndiko bakololo be nthu sekwa banoteyiwa ne dati nge tjibaka tjakabipa atjibawila.
Mikumbulo ye butjenjedu ne ye bulengwe
13Ndakabona ifaniso tje butjenjedu igogu mu shango, kukalingika kuli kukulu kwazo kundili. 14Kwakabe kuna ne nzi ntukununu una balume bashomanana, mambo mmwe nkulu kaunginilila kaukomba, akabaka makuma makulu e ngwa kuwopoteleka. 15Koga kwakawanika mu nzi iwoyo kuna nlume we nshayi wakatjenjela, ngono nge butjenjedu gugwe akasunungula nzi uwoyo. Koga akuna nthu wakadwapo kakumbula nlume iwoyo we nshayi. 16Imi ndinoti butjenjedu gopinda masimba, nenguba butjenjedu gwe nshayi gulingigwa pasi ne matama awe asingatjengetiwe. 17Matama e ntjenjedu ha eteedzegwa pasina zhoba anoyita kupinda kumimila kwe ntungamili pakati pe zwilengwe. 18Butjenjedu go pinda zwibhayano zwe ngwa, koga ntjinyi ung'ompela unopaladza bubuya gunjinji.
Kalanga Bible © Bible Society of Botswana, 2008, 2018.