2 Bomambo 15
15
Mambo Azariya we Juda
(2 Zwiyitikalo 26:1-23)
1Mu gole le bumakumi mabili ana ali kutendeka (27) e mbuso wa Jeroboamu mambo we Iziraela, Azariya nkololo wa Amaziya mambo we Juda katangisa busa. 2Wakatangisa busa ana makole ali gumi lina kutathatu (16) ngono kabusa makole ali makumi mashanu ana mabili (52) mu Jerusalema. Zina la mmeyabe lakabe liyi Jekoliya bedwa ku Jerusalema. 3Ngono wakathama tjakalulwama mu mesho a Yahwe kuyendidzana nge tjakathamiwa ndi tate babe Amaziya. 4Nenguba kwakajalo magalo akatuthumala akasiakolomodze, bathu bakadwilila be dusila zwibhayilo ne kupisila motsha mu magalo akatuthumala. 5Ngono Yahwe bakaloba mambo shamu kagwala mapele kuswikila zhuba lile le lufu, ngono kagala mu ng'umba yakathubukana ne dzimwe. Jothamu nkololo wa mambo kalinga zwe nsha wa mambo, ngono katungamila bathu be shango. 6Mimwe mishingo ya Azariya na zose zwaakathama zwakakwagwa mu lukwalo gwe Zwiyitikalo gwa bomambo be Juda. 7#Isaya 6:1Azariya kalala na botate babe ngono kabiganyigwa pabali mu nzi nkulu wa Dafite. Jonatani nkololo uwe kan'gala thaka.
Mambo Zakhariya we Iziraela
8Mu gole le bumakumi matatu ana ali zhanakadzi (38) le mbuso wa Azariya mambo we Juda, Zakhariya nkololo wa Jeroboamu kabusa Iziraela ali mu Samariya kwe mimwedzi ili kutathatu. 9Ngono kathama mbipo mu mesho a Yahwe sekwakathama botate babe. Kasishandukile zwibi zwa Jeroboamu nkololo wa Nebati, zwaakathamisa Iziraela tjibi nazo. 10Shalumu nkololo wa Jabheshi kalukila gwanga Zakhariya, kan'loba mbeli kwe bathu kambulaya ngono kan'tolela bumambo. 11Mimwe mishingo ya Zakhariya yakakwagwa mu lukwalo gwe Zwiyitikalo gwa bomambo be Iziraela. 12#2 Bomambo 10:30Ndizo dama lakalebgwa ndi Yahwe kuna Jehu beti, “Bakololo babo banowogala mutjigalo tje bumambo tje Iziraela kunoti kutjizekugwana tje bunna.” Ngono kwakashingikala.
Mambo Shalumu we Iziraela
13Shalumu nkololo wa Jabheshi wakatangisa busa mu gole le bumakumi matatu ana ali zhanalume (39) le mbuso wa Uziya mambo we Juda ngono kabusa mwedzi ng'ompela mu Samariya. 14Ndizo Menahimu nkololo wa Gadi kabhuda mu Tiriza kayenda ku Samariya ngono kaloba Shalumu nkololo wa Jabheshi mu Samariya kambulaya, ngono kan'tolela bumambo. 15Mimwe mishingo ya Shalumu ne gwanga gwaakaluka zwakakwagwa mu lukwalo gwe Zwiyitikalo gwa bomambo be Iziraela. 16Mu tjibaka itjetjo Menahimu kalobesa nzi we Tifisa na bose bakabe bali muuli, ne migathu yawo kutangisa ku Tireza, ngobe basakanzhulila iyo, kaulobesa, ngono katjeka mitumbu ye bakadzi bose bakabe bakazwisenga.
Mambo Menahimu we Iziraela
17Mu gole le bumakumi matatu ana ali zhanalume le mbuso wa Azariya mambo we Juda, Menahimu nkololo wa Gadi katangisa busa Iziraela ngono kabusa makole ali gumi mu Samariya. 18Kathama mbipo mu mesho a Yahwe, mu mazhuba awe wose kasishandukile zwibi zwa Jeroboamu nkololo wa Nebati, izo zwaakathamisa Iziraela tjibi nazo. 19Puli mambo we Asiriya ka nginilila shango ngono Menahimu kampa talenta dze siliva dzili tjiwulu (1 000), kuti a bhatshe mu kusimisa mbuso uwe. 20Ngono Menahimu kalipisa Baiziraela, nlume mmwe ne mmwe wakafuma wakabe edusa shekele dze siliva dzili makumi mashanu (50) kuti dzipiwe mambo we Asiriya. Ndizo mambo we Asiriya kabgwilila, kasigale mu shango ye Baiziraela. 21Mimwe mishingo ya Menahimu na zose zwaakathama zwakakwagwa mu lukwalo gwe Zwiyitikalo gwa bomambo be Iziraela. 22Ngono Menahimu kalala na botate babe ngono Pekahiya nkololo uwe kan'gala thaka.
Mambo Pekahiya we Iziraela
23Mu gole le bumakumi mashanu (50) le mbuso wa Azariya mambo we Juda, Pekahiya nkololo wa Menahimu katangisa busa Iziraela ali mu Samariya, ngono kabusa makole mabili. 24Kathama mbipo mu mesho a Yahwe, kasishandukile zwibi zwa Jeroboamu nkololo wa Nebati, zwaakathamisa Iziraela tjibi. 25Ngono Peka nkololo wa Remaliya ali mmwe we batungamili babe, kanlukila gwanga ana balume bali makumi mashanu (50) be Bagiliyadi ngono bakambulayila mu Samariya, mu matizhilo e ng'umba ye bushe kambulaya ngono kan'tolela bumambo. 26Mimwe mishingo ya Pekahiya na zose zwaakathama zwakakwagwa mu lukwalo gwe Zwiyitikalo gwa bomambo be Iziraela.
Mambo Peka we Iziraela
27Mu gole le bumakumi mashanu ana mabili (52) le mbuso wa Azariya mambo we Juda, Peka nkololo wa Remaliya katangisa busa Iziraela ali mu Samariya ngono kabusa makole ali makumi mabili (20). 28Kathama mbipo mu mesho a Yahwe, kasishandukile zwibi zwa Jeroboamu nkololo wa Nebati, zwaakathamisa Iziraela tjibi. 29Mu tjibaka tja Peka mambo we Iziraela, Tigilati Pilesa mambo we Asiriya katapa Ijoni ne Abelibetimaka ne Janoya ne Kadeshi ne Hazori ne Giliyadi ne Galili, shango yose ye Nafutali ngono kasengela bathu mu busungwa ku Asiriya. 30Ngono Hoseya nkololo wa Ela kalukila gwanga Peka nkololo wa Remaliya kanloba kambulaya, kan'tolela bumambo mu gole le bumakumi mabili (20) le mbuso wa Jothamu nkololo wa Uziya. 31Mimwe mishingo ya Peka na zose zwaakathama zwakakwagwa mu lukwalo gwe Zwiyitikalo gwa bomambo be Iziraela.
Mambo Jothamu we Juda
(2 Zwiyitikalo 27:1-9)
32Mu gole le bubili le mbuso wa Peka nkololo wa Remaliya mambo we Iziraela, Jothamu nkololo wa Uziya mambo we Juda katangisa busa. 33Wakatangisa ana makole ali makumi mabili ana mashanu (25) ngono kabusa makole ali gumi lina ali matathatu mu Jerusalema. Zina la mmeyabe lakabe liyi Jerusha bali nkololokadzi wa Zadoki. 34Ngono kathama tjakalulwama mu mesho a Yahwe, kuyendidzana nge tjakathamiwa ndi Uziya tate babe. 35Nenguba kwakajalo magalo akatuthumala kasikolomodziwe, bathu bakadwilila bedusila zwibhayilo, be pisila motsha mu magalo akatuthumala. Kabaka Nkoba Utjapezhugwi we ng'umba ya Yahwe. 36Mimwe mishingo ya Jothamu na zose zwaakathama zwakakwagwa mu lukwalo gwe Zwiyitikalo gwa bomambo be Juda. 37Mu mazhuba iyawo Yahwe bakatangisa kutuma Rezini mambo we Siriya na Peka nkololo wa Remaliya ku nginilila Juda. 38Jothamu kalala na botate babe ngono kabiganyigwa pabali mu nzi nkulu wa Dafite tate babe, ngono Ahazi nkololo uwe kan'gala thaka.
Kalanga Bible © Bible Society of Botswana, 2008, 2018.