2 Bomambo 14
14
Mambo Amaziya we Juda
(2 Zwiyitikalo 25:1-24)
1Mu gole le bubili la Jehoashi nkololo wa Jehoyazi mambo we Iziraela, Amaziya nkololo wa Joashi mambo we Juda katangisa busa. 2Wakatangisa busa ana makole ali makumi mabili ana mashanu (25), ngono kabusa makole ali makumi mabili ana ali zhanalume (29) mu Jerusalema. Zina la mmeyabe kuli Jehoyadini bedwa ku Jerusalema. 3Kathama tjakalulwama mu mesho a Yahwe koga kusi sa tate babe Dafite, mu zwithu zose wakashinga sa tate babe Joashi. 4Koga magalo akatuthumala kasidusiwe, bathu bakadwilila bedusila zwibhayilo ne kupisila motsha mu magalo akatuthumala. 5Kwakati simba le bumambo latjidzikama mu maboko awe, kabulaya makombgwa awe akabulaya mambo tate babe. 6#Matama 24:16Ngono kasibulaye bana be babulayi kuyendidzana nge tjakakwagwa mu lukwalo gwe nlayo gwa Mushe, Yahwe pa bakalaula beti, “Botate basibulawe ngekwe bana, ne bana basibulawe ngekwa botate babo, koga mwe ne mwe afile zwibi zwizwe.” 7Ndiye wakabulaya Baedomu bali zwiwulu zwili gumi (10 000) ku Nkuku we Mwenyu ngono katapa nzi we Sela mu ngwa, kaudana eti Jokoteli, zina lawo nanasi. 8Ipapo Amaziya katuma batumwa kuna Jehoashi nkololo wa Jehoyahazi ali nkololo wa Jehu mambo we Iziraela eti, “Buya ti lingisane.” 9Koga Jehoashi mambo we Iziraela kashandula Amaziya mambo we Juda eti, “Kungubo tjimu Lebanoni tjatumidzila ku nsida umu Lebanoni tjiti, ‘Lobodza nkololokadzi uwo ku nkololo wangu,’ ngono tjibandana tjimu Lebanoni tjakapinda tjikatshamba ikungubo. 10Nge malebeswa wakakunda Baedomu ngono ngwenu unozwikudza. Uzwikudze nge kukunda kuko koga ugale ku nzi. Ini uzwidanila mbatsha kuti uwe kose ne Juda?” 11Koga Amaziya kasiteedze, Jehoashi mambo we Iziraela kamilika, ngono iye na Amaziya mambo we Juda bakalingisana mu ngwa ku Bhetishemeshi ye Juda. 12Juda kakundiwa ne Iziraela ngono mmwe ne mmwe katizhila ku nzi uwe. 13Jehoyashi mambo we Iziraela katapa Amaziya mambo we Juda kuli nkololo wa Joashi ali nkololo wa Ahaziya ku Bhetishemeshi. Ipapo Joashi kayenda ku Jerusalema ngono kaliga guma le Jerusalema kudwa ku nkoba we Ifureimi kunoti ku Nkoba we Kundzibo kungabe thambo dzili mazana mabili. 14Katola golide yose ne siliva yose ne zwija zose zwakabe zwili mu ng'umba ya Yahwe ne mu matula e ng'umba ya mambo kose ne batapiwa ngono kabgwilila ku Samariya. 15Mimwe mishingo ya Jehoyashi ne zwaakathama ne zwaakatubula na sekwa akagwa na Ahaziya mambo we Juda zwakakwagwa mu lukwalo gwe Zwiyitikalo gwa bomambo be Iziraela. 16Jehoyashi kalala na botate babe ngono kabiganyigwa mu Samariya na bomambo be Iziraela, Jeroboamu nkololo uwe kan'gala thaka.
Lufu gwa Mambo Amaziya we Juda
(2 Zwiyitikalo 25:25-28)
17Amaziya nkololo wa Joashi mambo we Juda, wakatjila makole ali gumi lina mashanu (15) shule kwe lufu gwa Jehoyashi nkololo wa Jehoyahazi mambo we Iziraela. 18Mimwe mishingo ya Amaziya yakakwagwa mu lukwalo gwe Zwiyitikalo gwa bomambo be Juda. 19Ngono bakanlukila gwanga mu Jerusalema, katizhila ku Lakhishi, koga bakantumila balume ku Lakhishi bakambulayila ko. 20Wakazhisiwa nge mbizi ngono kabiganyigwa mu Jerusalema pana botate babe mu nzi nkulu wa Dafite. 21Bathu bose be Juda bakatola Azariya wakabe ana makole ali gumi lina matathatu (16) bakambiga mambo mu bumo gwa tate babe Amaziya. 22Ndiye wakabaka Elati kaibgwilizila Juda, shule kwekuti mambo balale na botate babo.
Mambo Jeroboamu we bubili we Iziraela
23Mu gole le bugumi lina makole ali mashanu (15) le mbuso wa Amaziya nkololo wa Joashi mambo we Juda, Jeroboamu nkololo wa Joashi mambo we Iziraela katangisa busa mu Samariya, ngono wakabusa makole ali makumi manna ana gole (41). 24Kathama mbipo mu mesho a Yahwe, kasiletje zwibi zose zwa Jeroboamu nkololo wa Nebati, izo zwaakathamisa Iziraela tjibi. 25#Jona 1:1Ndiye wakabgwilizila Iziraela migathu kudwa ku nkoba we Hamati kunoti tjose ku Gungwa gwe Araba kuyendidzana nge dama la Yahwe Ndzimu we Iziraela labakaleba nge nlanda wabo Jona nkololo wa Amitayi we nlebesambeli unodwa ku Gatihefa. 26Ngobe Yahwe bakabe babona kudziyila kwe Baiziraela kugwadza, kwakabe kusina basala, basungwa kene bakasununguka ngono kwakabe kusina ungaba bhatsha. 27Koga Yahwe bakabe basaleba kuti banowodzimidza zina le Iziraela pasi kwe zhuzhugwi, ndizo bakabatjidza nge luboko gwa Jeroboamu nkololo wa Joashi. 28Mimwe mishingo ya Jeroboamu na zose zwaakathama ne zwaakatubula ne sekwa akagwa na sekwa akabgwilizila Iziraela Damasiko ne Hamati yakabe ili ye Juda, zwakakwagwa mu lukwalo gwe Zwiyitikalo gwa bomambo be Iziraela. 29Ngono Jeroboamu kalala na botate babe bomambo be Iziraela, Zakhariya nkololo uwe kan'gala thaka.
Kalanga Bible © Bible Society of Botswana, 2008, 2018.