2 Bomambo 16
16
Mambo Ahazi we Juda
(2 Zwiyitikalo 28:1-27)
1Mu gole le bugumi lina ali kutendeka (17) le mbuso wa Peka nkololo wa Remaliya, Ahazi nkololo wa Jothamu mambo we Juda katangisa busa. 2Ahazi wakatangisa kubusa ana makole ali makumi mabili (20) ngono kabusa makole ali gumi lina ali matathatu (16) mu Jerusalema. Ngono kathama tjisakalulwama mu mesho a Yahwe Ndzimu uwe, kusi sa tate babe Dafite, 3#Matama 12:31koga katola zila ya bomambo be Iziraela, kabuya kapisa mwana uwe kuli tjibhayilo, kuyendidzana nge zwiyito zwinoshimisa zwe njudzi dzakatatiwa ndi Yahwe mbeli kwe Baiziraela. 4Ngono kadusa zwibhayilo kapisila ne motsha mu magalo akatuthumala ne mu matombo na kusi kwe nti mmwe ne mmwe ntala. 5#Isaya 7:1Ipapo Rezini mambo we Siriya na Peka nkololo wa Remaliya mambo we Iziraela, bakayenda bakanonginilila Jerusalema ngono bakakomba Ahazi nge ngwa koga bakasinkunde. 6Nge tjibaka itjetjo Rezini mambo we Siriya kabgwiliza nzi we Elati ku Siriya nge kutata Bajuta, ngono Baedomu bakazha ku Elati kwabagele na nasi. 7Ndizo Ahazi katuma batumwa kuna Tigilati Pilesa mambo we Asiriya eti, “Ndi nlanda uwo ne nkololo uwo. Buya undisunungule mu maboko a mambo we Siriya ne mu maboko a mambo we Iziraela banondinginilila.” 8Ngono Ahazi katola siliva ne golide yakawang'wa mu ng'umba ya Yahwe ne mu matula e ng'umba ya mambo kazwitumila kuli tjipo kuna mambo we Asiriya. 9Ngono mambo we Asiriya kadumilana naye kanginilila Damasiko kaitapa, katapila bagali bayo ku Kiri ngono kabulaya Rezini.
10Kwakati Mambo Ahazi ayenda ku Damasiko kunoshangana na Tigilati Pilesa mambo we Asiriya, kabona tjibeso tjinopisigwa zwibhayilo tjakabe tjili mu Damaseko katumila ntutshi we tjibeso tjinopisigwa zwibhayilo ne tjilakidzo tjekuti tjibakiwe tjini kuna Uriya we mpirisiti. 11Ngono Uriya we mpirisiti kabaka tjibeso tjinopisigwa zwibhayilo kuyendidzana na sekwa akalakidziwa ndi Mambo Ahazi kudwa ku Damasiko ngono katjifidza Mambo Ahazi asathu kashanduka ku Damaseko. 12Ngono kwakati mambo edwa ku Damasiko kabona tjibeso tjinopisigwa zwibhayilo, kasedzela pejo natjo ngono katjitatha, 13ngono kapisila tjibhayilo tjitje tjinopisiwa ne tjibhayilo tje tjipo tje mathunde ngono katebula tjibhayilo tje tjing'o kanyasa malopa mu tjibhayilo tjitje tje mbakisano mu tjibeso tjinopisigwa zwibhayilo. 14#Kufuluka 27:1, 2; 2 Zwiyitikalo 4:1Tjibeso tjinopisigwa zwibhayilo tje phangula tjakabe tjili mbeli kwa Yahwe katjidusa mbeli kwe ng'umba pakati kwe tjibeso tjitje tjinopisigwa zwibhayilo ne ng'umba ya Yahwe, katjibiga ku bunandzwa gwe tjibeso tjitje tjinopisigwa zwibhayilo. 15Mambo Ahazi kadwa Uriya we mpirisiti kati, “Mu tjibeso tjinopisigwa zwibhayilo tjikulu u pise tjibhayilo tjinopisiwa tje mangwanana ne zwipo zwe madekwana zwe mathunde ne tjibhayilo tja mambo tjinopisiwa ne tjipo tjitje tje mathunde ne zwipo zwabo zwe zwing'o, malopa wose e zwibhayilo zwinopisiwa ne e zwibhayilo zwimwe u anyase mu tjibeso tjinopisigwa zwibhayilo, koga tjibeso tje phangula ndowotjishingisa kushaka gumbuludzo.” 16Uriya we mpirisiti kathama tjalebgwa ndi Mambo Ahazi.
17 #
1 Bomambo 7:23-39; 2 Zwiyitikalo 4:2-6 Mambo Ahazi kadusa makwasayile e tjigadziko, kadusa ne bhavu mu tjili, ngono kadusa tanka ye vula mu ngabe dze phangula dzakabe dzili kusi kwayo ngono kayibiga pezhugwi kwe thiwa dze mabgwe. 18Kadusa zijana ye Sabata yakabe yakathuligwa yabakwa mu ng'umba ye bushe, ne nkoba utjakuzhe wa mambo we ng'umba ya Yahwe, ngekwa mambo we Asiriya. 19Mimwe mishingo ya Ahazi ne zwaakathama zwakakwagwa mu lukwalo gwe Zwiyitikalo gwa bomambo be Juda. 20#Isaya 14:28Ahazi kalala na botate babe ngono kabiganyigwa pa bali mu nzi nkulu wa Dafite. Hezekiya nkololo uwe kan'gala thaka.
Kalanga Bible © Bible Society of Botswana, 2008, 2018.