2 Bomambo 13
13
Mambo Jehoyahazi we Iziraela
1Mu gole le bumakumi mabili ana matatu (23) le mbuso wa Joashi nkololo wa Ahaziya mambo we Juda, Jehoyahazi nkololo wa Jehu katangisa kubusa Iziraela ali mu Samariya, ngono kabusa makole ali gumi lina ali kutendeka (17). 2Wakathama mbipo mu mesho a Yahwe ngono katobela zwibi zwa Jeroboamu nkololo wa Nebati, zwaakathamisa Iziraela tjibi nazo, aazozwilasha. 3Bushongola gwe Ndzimu gukapisikila Baiziraela ngono ukabalonga mu maboko a Hazaele mambo we Siriya ne mu maboko a Bhenihadadi nkololo wa Hazaele tjibaka ne tjibaka. 4Ngono Jehoyahazi kakumbila bhatsho kuna Yahwe ngono Yahwe bakanteedza. Ngobe wakabe ebona Iziraela itshambilidziwa kwazo ndi mambo we Siriya. 5Yahwe bakazhisila Iziraela ntjidzi, ngono bakasunungugwa mu simba le Siriya. Baiziraela bakagala mu mizi yabo sekwakamuka kuliiko. 6Koga bakasiletje zwibi zwe be nsha wa Jeroboamu, zwaakathamisa Iziraela tjibi ndizo, bakadwilila balimuzwili ngono ne bhango le Ashera lakasala lilimile mu Samariya. 7Akuna tjakabe tjatjisalila Jehoyahazi kuzhe kwe bataswi be mbizi bali makumi mashanu (50) ne koloyi dze ngwa dzili gumi ne babhayani banoyenda nge makumbo bali zwiwulu zwili gumi (10 000), ngobe mambo we Asiriya wakabe abalobesa bakasala benga hwuluba mu nsi we kupula. 8Imwe mishingo ya Jehoyahazi na zose zwaakathama ne zwaakatubula zwakakwagwa mu lukwalo gwe zwiyitikalo gwa bomambo be Iziraela. 9Jehoyahazi kalala na botate babe ngono kabiganyigwa mu Samariya, ngono Joashi nkololo uwe kan'gala thaka.
Mambo Jehoyashi we Iziraela
10Mu gole le bumakumi matatu ana ali kutendeka la Joashi mambo we Juda, Jehoyashi nkololo wa Jehoyahazi katangisa busa Iziraela ali mu Samariya ngono kabusa kwe makole ali gumi lina ali kutathatu. 11Wakathama mbipo mu mesho a Yahwe, aazoletja zwibi zose zwa Jeroboamu nkololo wa Nebati, zwaakathamisa Iziraela tjibi nazo ngono waka yenda muzwili. 12Mimwe mishingo ya Joashi na zose zwaakathama ne zwaakatubula, kose nenge simba laakagwisa Ahaziya mambo we Juda ndilo, zwakakwagwa mu lukwalo gwe Zwiyitikalo gwa bomambo be Iziraela. 13Ndizo Joashi kalala na botate babe ngono kabiganyigwa mu Samariya na bomambo be Iziraela. Jeroboamu kan'gala thaka.
Lufu gwa Elisha
14 #
2 Bomambo 2:12
Kwakati Elisha egwala bugwele gwakambulaya, Jehoyashi mambo we Iziraela kayenda kunli, kalilila mbeli kukwe eti, “Tate bangu, Tate bangu, koloyi dze ngwa dze Iziraela ne bataswi be mbizi.” 15Ngono Elisha kandwa kati, “Tola dati ne misebe.” Ndizo katola dati ne misebe. 16Ipapo kadwa mambo we Iziraela eti, “Kweba dati.” Ngono kalikweba. Ngono Elisha kabiga maboko awe pezhugwi kwe maboko a mambo, 17kandwa kati, “Zhula fesitere tjekubhezhuba,” Ngono kalizhula. Ipapo Elisha kandwa eti, “Posa.” Ngono kaposa. Kandwa kati, “Nsebe wa Yahwe wa kunda, nsebe wa kunda Basiriya, unowogwa ne Basiriya ngono ukabalobesa ku Afeki.” 18Elisha kabe eti, “Tola misebe.” Ngono kaitola. Ngono kadwa mambo we Iziraela kati, “bhaya pasi nayo.” Ngono kabhaya katatu kabe ema. 19Nlume we Ndzimu kazhala bushongola nge kukwe kandwa kati, “Unobe wabhaya kashanu kene katathatu, ndiko kwawabe wowokunda Basiriya ukabalobesa tjoselele, koga unowobakunda katatu koga.” 20Ndizo Elisha kafa ngono kabiganyiwa. Ngono kwakabe kuna goko le Bamoabu lakabe linginilila shango mu tjibaka tje nyauko. 21Kwakati limwe zhuba Baiziraela batjabiganya nthu, tjinyolotjo bakabona goko le babhayani, ndizo bakalashila itumbu mu ikumbu tja Elisha bakatizha. Ngono kwakati itumbu tjikutha mafupa a Elisha, tjikamuka tjikama nge makumbo.
Baiziraela banogwa ne Basiriya
22Hazaele mambo we Siriya wakabe e tshambilidza Baiziraela mu tjibaka tjose tja Jehoyahazi. 23Koga Yahwe bakabe nge ngoni mu bali ne ludo ngono bakashandukila kubali ngekwe tjidumano tjabo na Abhurahama na Isaki na Jakubo ngono bakasibalobese nanga iko kubatata mbeli kwabo kuswikila nasi. 24Hazaele mambo we Siriya kafa ngono Bhenihadadi nkololo uwe kan'gala thaka. 25Ngono Jehoyashi nkololo wa Jehoyahazi katolela Bhenihadadi nkololo wa Hazaele mizi mikulu yakabe ya togwa muna tate babe Jehoyahazi mu tjibaka tje ngwa. Jehoyashi kankunda katatu, ndiko sekwa akabgwiliza mizi mikulu ye Iziraela.
Kalanga Bible © Bible Society of Botswana, 2008, 2018.