1 Samuele 9
9
Saulo unoshangana na Samuele
1Kwakabe kuna nlume wakabe akafuma zina lile liyi Kishi, Kishi ali nkololo wa Abiele, Abiele ali nkololo wa Zero, Zero ali nkololo wa Bhekorati, Bhekorati ali nkololo wa Afiya, Afiya ali nkololo we Nbhenjamini. 2Wakabe ana nkololo uwe zina lile liyi Saulo, ali nzhuzha mbuya. Kwakabe kusina nlume pakati kwe balume be Iziraela mbuya kumpinda, ali nlefu mmwe ne mmwe wakabe emmila pa thudzi.
3Ipapo madonki a Kishi tate ba Saulo, akabe amila. Ndizo Kishi kadwa nkololo uwe Saulo kati, “Tola mmwe we balanda munoshaka madonki.” 4Bakapalama shango ye matuthu ye Ifureimi bakapalama ne shango ye Shalisha, koga bakasiabone. Ngono bakapalama shango ye Shaalimu naikobo bakaasheta ndizo bakapalama ntuthu we Bhenjamini, naiko bakasiabone. 5Bakati beswika ku ntuthu we Zufu, Saulo kadwa nlanda waakabe anaye kati, “Ngatibgwilile kanyi, tate banowodwa basingatjakumbule ngekwe madonki, bebe bodziyidzika ngekwedu.”
6Koga iye kanshandula eti, “Bona, kuna nlume we Ndzimu mu nzi iwoyu, nlume unokudziwa kwazo. Tjimwe ne tjimwe tjaanoleba tjobe malebeswa. Ngatiyendeko sangwenu, pamwe ungatipa nkwala we kwatingashakila.”
7Ndizo Saulo kati ku nlanda, “Apa ha tiyenda ku nlume uwoyo towonompani kene? Zojiwa zwabe zwili mu hwomo dzedu zwapela, atina tjipo tjatinganopa nlume we Ndzimu, apa ini tjatinatjo kene?”
8Nlanda kan'dabila kakale kati, “Ipapa ndina butukununu gwe loso le siliva, towonolipa nlume we Ndzimu kuti atipe nkwala.”
9Mu Iziraela kwakabe kuti unobe eyenda kunobhuzwa Ndzimu, kabe eti, “Ngatiyende tinobona mboni,” ngobe nlebesambeli ntolo wakabe edang'wa mboni. 10Ndizo Saulo kadwa nlanda uwe kati, “Kwakalulwama, izha tiyende.” Ndizo bakayenda ku nzi kwakabe nlume we Ndzimu aliko. 11Bakati betathila pezhugwi kwe duthu ku nzi, bakashangana ne baanadi bebhuda benotjela vula, ngono bakababhuzwa bakati, “Mboni uyapo kene?”
12Bakadabila beti, “Ee, uyapo, ndiye iwoje umbeli kwenyu. Tjimbidzani ndiko kwaabe eswika ngwenu ku nzi, ngobe bathu bana tjibhayilo nasi ku bugalo gu pezhugwi. 13Kowoti koga mungina mu nzi, mowon'wana asathu katathila ku bugalo gu pezhugwi kunoja. Bathu abangatangise kuja kuswikila eswika, se akafanila kuyengemadza tjibhayilo, kowoti shule bakokiwa bebe beja. Ndizo tathilani tjinyolotjo monon'wana.” 14Bakatathila pezhugwi ku nzi, kwakati koga bengina mu nzi, bonani bakashangana na Samuele eyenda ku bugalo gu pezhugwi.
15Yahwe bakabe balala bazumbunulila Samuele, Saulo asathu kazha beti, 16“Kowoti mangwana nge tjibaka itjetji, ndowotumila ku kuli nlume unodwa ku shango ya Bhenjamini, ngono unzhodze kuti abe ntungamili we bathu bangu Baiziraela, unowosunungula bathu bangu mu maboko e Bafilisitiya, ngobe ndabona kudziyidzika kwe bathu bangu, ne tjililo tjabo ndatjihwa.”
17Kwakati Samuele ebona Saulo, Yahwe bakandwa bakati, “Oyu ndiye nlume wandakalebeleka nawe nge kukwe, ndiye unowobusa bathu bangu.” 18Ndizo Saulo kasedzela kuna Samuele pa nkoba kati, “Ndokumbila bhuzwa, ng'umba ye mboni iponi kene?”
19Samuele kadabila eti, “Ndimi mboni, pindani tiyende ku bugalo gu pezhugwi, ngobe nasi mowoja nami, ngono tjimuka mangwanana ndowomubudza kose kumu mimoyo yenyu, ndibe ndimupa zila muzwiyendigwa zwenyu. 20Ngekwe madonki enyu akamila zhulolija, musidziyidzike nge kwawo, ngobe akabong'wa. Apa njemulo dzose dze Iziraela dzakalinga kuna ani, ha dzisi mukuli ne nsha wose wa tate babo kene?” 21Saulo kashandula kati, “Apa andite ndili Nbhenjamini we ludzi gutukunu tjose mu Iziraela, apa nsha wangu ate iwo we ntukunu tjose mu misha yose ye ludzi gwe Bhenjamini kene? Apa ini mulebeleka zwithu zwakajali nami kene?” 22Ipapo Samuele katola Saulo ne nlanda uwe kabayisa ku ng'umba inojigwa, kabagadza mu magalo ambeli kwabo bose bakabe bakokiwa, bakabe bangabe makumi matatu (30). 23Samuele kadwa mbhiki kati, “Undipe nyama yandakupa, iyeyi yandakudwa nditi uibigile ntome.” 24Ndizo mbhiki katola mpimbila ne tjidzwa kazwibiga mbeli kwa Saulo. Ngono Samuele kabe eti, “Ezwi, ndizo zwamabe mabigigwa. Ijani, ngobe zwabe zwabigigwa ntome zwili zwenyu mu nzano iwoyu, kuti muzwije mu tjibaka itjetji ne bakokiwa.”
Ndizo Saulo kaja na Samuele mu zhuba ilelo. 25Kwakati basinobe badeluka mu bugalo gu pezhugwi bezha mu nzi, kukawaligwa Saulo kayizela pezhugwi kwe denga le ng'umba.#9:25 pezhugwi kwe denga le ng'umba: Mu tjibaka itjetjo ng'umba mu Iziraela dzakabe dzina denga lakawala bathu beizela pezhugwi kwalo.
Samuele unobiga Saulo kube mambo
26Ndizo kwakati zhuba libhuda Samuele kadana Saulo ku denga le ng'umba, kandwa kati, “Muka ndikupe zila uyendezo.” Saulo kamuka, bakabhudila kuzhe bose na Samuele. 27Bakati bedelukila ku bupelo gwe nzi, Samuele kadwa Saulo kati, “Idwa nlanda ayendile mbeli kwedu.” Ngono nlanda kathama sekwa adwiwa, Samuele kabe eti, “Ima ipapa kushomanana kuti ndikuzibise dama le Ndzimu.”
Kalanga Bible © Bible Society of Botswana, 2008, 2018.