1 Samuele 8
8
Bathu banokumbila mambo
1Kwakati Samuele atjikwegula kabiga bakololo babe basumikilisi mu Iziraela. 2Nkololo uwe we mbano wakabe eyi Jowele, ngono thobeledzi iye ili Abija, ndibo bakabigwa basumikilisi mu Bheerisheba. 3Koga bakololo babe abazotshamba thambo dza tate babo, bakabe bakakombamila mu kushaba nge bupitipiti, beamutjila zwizwimba nlomo, bekombamisa ndulamo.
4Ndizo bakulu bose be Iziraela bakazwikubunganya bakazha kuna Samuele ku Rama. 5#Matama 17:14Bakandwa bakati, “Bonani, imwi makula, ngono bakololo benyu abatotshamba mu thambo dzenyu, ndizo ngwenu, mutibigile mambo kutibusa koga se zwitjaba zose.” 6Koga bakati beti, “Mutipe mambo kuti atibuse,” kuthu ikoku kukasishathise Samuele, ndizo katembezela kuna Yahwe. 7Ngono Yahwe bakadwa Samuele bakati, “Teedza tjimwe ne tjimwe tjabanokudwa, ngoti abazolamba iwe, koga balamba imi kuti ndibe mambo wabo. 8Koga se kwabakathama mundili, kudwa mu zhuba landakabadusa mu Egipiti kuswikila nasi, bandilasha beshingila midzimu ipoga, ndizo nawebo banokuthama beijalo. 9Ndizo ngwenu thama tjabanoshaka, koga ubatjenjedze wakasimisa, kakale ubazibise tjinowoshingwa ndi mambo unowobabusa.”
10Ndizo Samuele kabudza bathu bakabe bekumbila mambo munli matama wose alebgwa ndi Yahwe. 11Wakabadwa kati, “Eyi ndiyo zila ya mambo yaanowomubusa ndiyo: Unowotola bakololo benyu kabathama bashingi be mbizi ne koloyi dzidze dze ngwa, ngono banowolabuka bali mbeli kwe koloyi iye ye ngwa. 12Bamwe unowobathama balauli be bali zwiwulu ne balauli be bali makumi mashanu, ngono bamwe banowolima bakavuna minda iye, bebuya bethama zwibhayano zwizwe zwe ngwa ne zwishingisiwa zwe kara dzidze. 13Unowothama bakololokadzi benyu bathami be zwizholo zwinonuhwa zwinozipa ne babhiki be zwiwunga. 14Unowotola minda yenyu yakanaka ne minda ye mizhambi ne mitoba ebe eipa bashingi babe. 15Unowotola kwe bugumi kwe mathunde enyu ngekwe minda ye mizhambi kakupa makulukota ne bashingi babe. 16Balandalume ne balandakadzi benyu ne ng'ombe dzenyu mbuya kwazo ne madonki mabuya unozwitolegwa izo kuzwishingisa. 17Unowotola zwe bugumi zwe ngubi yenyu, ngono imwi mowobe balanda babe. 18Ngono mu zhuba ilelo alaswika, mowodoroma ngekwa mambo wenyu wamunowobe mazwishalulila, koga Yahwe abatowomudabila mu zhuba ilelo.”
19Koga bathu bakalamba teedza Samuele, bakandwa bakati, “Atidi! Toshaka mambo atibuse, 20kuti ndizo naswibo tifanane ne zwimwe zwitjaba, kuti mambo wedu atibuse, atitungamile atigwile mu ngwa dzedu.” 21Kwakati Samuele asinohwa matama wose e bathu, kaabudza Yahwe kakale. 22Yahwe bakadwa Samuele bakati, “Ubateedze ngono ubabigile mambo.” Ndizo Samuele kadwa bathu be Iziraela kati, “Mmwe ne mmwe ngaabgwilile ku nzi wa kanyi kwabo.”
Kalanga Bible © Bible Society of Botswana, 2008, 2018.