1 Samuele 10
10
1Samuele katola itenyana tje mafuta kaadila mu nsholo wa Saulo, kabe en'gumpatila ebe eti, “Yahwe bakubiga kube ntungamili we bathu babo Baiziraela. Unowobusa bathu ba Yahwe kakale unowobadusa mu maboko e zwita zwabo kupoteleka kose. Ngono ngwenu, etji nditjo tjinowobe tjilakidzo tjekuti Yahwe bakubiga kube ntungamili mu thaka yabo. 2Kowoti udwa pandili nasi, unowoshangana ne balume babili pa ikumbu tja Rahele mu ntuthu wa Bhenjamini ku Zeleza, banowokudwa beti, ‘Madonki awakabe wanoshaka akabong'wa, tate babo abatjadziyidzika ngekwawo koga botjidziyidzika nge kuko beti, apa banowothamani ngekwe nkololo wabo kene?’ 3Ndizo ha udwa ipapo uyendile mbeli kudzina unoswika pa nti we pakayengemala we Tabori, unowoshangana ne balume batatu ipapo, betathila ku Ndzimu ku Bhetele, mmwe akasenga mbudzana thatu, mmwe akasenga zwiwunga zwitatu, ngono mmwe akasenga gukhwa le nkumbi we zhambi. 4Banowokudumilisa bakakupa zwiwunga zwibili, ngono iwe uzwiamutjile. 5Kudwa ipapo unowonoswika ku Dombo le Ndzimu, pana kampa ye babhayani be Bafilisitiya, ngono unowoti uswika ikweno ku nzi, unowoshangana ne goko le balebesambeli bedeluka mu bugalo gu pezhugwi belidza zwilidzo zwe dende ne thamborini ne nyele ne laya. 6Ipapo meya ya Yahwe inowodelukila mukuli nge masimba, ngono unowolebesambeli nabo, ngono unowoshandugwa ukabe nthu upoga. 7Ngono zwilakidzo izwezwi zwiti zwashingikala, uthame tjaunowobe ubona tjakalingisana ngothamwa, ngobe Ndzimu unawe. 8Ngono udelukile ku Giligala kunditangila, ndizo ndokowokutobela kuwopisa zwibhayilo ne kupa zwipo zwe mbakiso, koga undimilile mazhuba ali kutendeka kuswikila ndizha ndikulakidza tjaunowothama.”
9Kwakati Saulo efupatila edwa pana Samuele, Ndzimu ukashandula moyo uwe, zwilakidzo zose izwezwi zwikashingikala mu zhuba ilelo. 10Kwakati beswika ku dombo, goko le balebesambeli likanshanganidza, ngono meya ye Ndzimu ikadelukila munli nge masimba, ngono kalebesambeli nabo. 11Kwakati bose bagala benziba bembona elebesambeli ne balebesambeli, bathu bakabhuzwana bakati, “Apa nkololo wa Kishi wanging'wa ngeni kene? Apa Saulo na iyebo upakati kwe balebesambeli kene?” 12#1 Samuele 19:23, 24Nlume wakabe egala ipapo kabe eti, “Ngono tate babo ndiani kene?” Ndizo kukabe kutangisa sumo inoti, “Apa Saulo na iyebo upakati kwe balebesambeli kene?” 13Kati apedza nge bulebesambeli, kayenda ku bugalo gu pezhugwi.
14Batatenini ba Saulo bakababhuzwa iye ne nlanda bakati, “Makabe mayenda ngayi kene?”
Saulo kadabila eti, “Takabe tanoshaka madonki, ngono takati tibona tisingaabone, tikayenda kuna Samuele.”
15Batatenini ba Saulo bakabe beti, “Undibudze kuti Samuele wakamubudzani.”
16Saulo wakadwa batatenini babe kati, “Wakatibudza kati madonki akabong'wa.” Koga ngekwe matama e bushe, akalebgwa ndi Samuele kasitongo babudza iwo.
Saulo unoamutjigwa sa mambo
17Samuele kadanila bathu be Iziraela kuna Yahwe ku Mizipha, 18ngono kabadwa kati, “Etji nditjo tjakalebgwa ndi Yahwe Ndzimu we Iziraela, ‘Ndimi ndakadusa Baiziraela mu Egipiti, kakale amusungunula mu maboko e Baegipiti ne mu maboko e mibuso yose yakabe yakamutshambilidza.’ 19Koga imwi ngwenu makalamba Ndzimu wenyu, iwo unomutjidza mu mbatsha dzenyu dzose ne mu manikano dzenyu dzose, ngono makati, ‘Atidi! Koga mutibigile mambo. Ndizo ngwenu muzwilakidze mbeli kwa Yahwe nge njudzi dzenyu nenge misha yenyu.’ ”
20Samuele kati esedzedza njudzi dzose dze Iziraela, ludzi gwa Bhenjamini gukashalugwa nge kukandila. 21Ndizo kasedzedza mbeli ludzi gwa Bhenjamini nge misha yabo, nsha wa Materi ukashalugwa nge kukandila. Gwe bupelo kwakashalugwa Saulo nkololo wa Kishi nge kukandila. Koga bakati benshaka, bakansheta. 22Ndizo bakabhuzwa Yahwe kakale bakati, “Apa nlume iwoyu watjizha ipapa kene?”
Ngono Yahwe bakadabila beti, “Bonani, wakabgwata mu thundu.”
23Bakalabukilako bakanontola, ngono wakati ema pakati kwe bathu, kadusa nsholo mu bathu bose, banontobela bemma pa thudzi. 24Samuele wakadwa bathu bose kati, “Apa mombona nlume washalugwa ndi Yahwe kene? Akuna mmwe unonga iye pakati kwe bathu bose.”
Ndizo bathu bose bakapululudza beti, “Mambo ngabalalame!”
25Samuele kabudza bathu fanilo ne mishingo ye bushe, ebuya eikwala mu lukwalo, ebe egubiga mu mabiganyilo mbeli kwa Yahwe. Ndizo Samuele kapaladza bathu kuti bayende ku mizi yabo. 26Saulo kayendabo ku nzi uwe ku Gibiya, wakapelekwa nge babhayani bakasima, bakabe bazunguziwa ne Ndzimu kuti bampeleke. 27Koga bamwe basi be tjimwe bakati, “Apa nlume uwoyu unowotitjidza tjini kene?” Bakansola kakale bakasitongonzhisila zwipo. Koga Saulo kazwinyalalilazwe.
Kalanga Bible © Bible Society of Botswana, 2008, 2018.