1 Samuele 11
11
Saulo unokunda Baamoni
1Nahashi we Ammoni katathila kunokomba Jabeshi we Giliyadi nge ngwa. Ngono balume bose be Jabeshi bakandwa bakati, “Thama tjidumano naswi, ngono towokushingila.”
2Koga Nahashi we Ammoni kashandula eti, “Ndowothama tjidumano namwi koga ha ndakopola zhisho le mmwe ne mmwe le luji, kuti ndizo ndizhise kulengudzika mu Iziraela yose.”
3Batungamili be Jabeshi bakandwa bakati, “Mutipe mazhuba ali kutendeka, kuti tilobe lukombo mu Iziraela yose, ngono akusina ungatitjidza, towozwipa mu muli.”
4Kwakati batumwa beswika ku Gibiya nzi wa Saulo, betula matama iyawa mu bathu, bose bakamimila belila. 5Saulo wakabe atjaswika edwa ku minda ali shule kwe mangabe awe, ngono kabhuzwa eti, “Bathu bayita tjini abelila wali?” Ndizo bakambudza thawu dzadwa ku bathu be Jabeshi. 6Saulo wakati ehwa matama abo, meya ye Ndzimu ikadelukila munli nge masimba, ngono kazhala bushongola bukulu kwazo. 7Katola mangabe mabili, kaatemelela kabe zwitibhutibhu, katumila zwitibhu zwe nyama ku mituthu yose ye Iziraela nge batumwa, eti, “Iye usingowobhuda etobela Saulo na Samuele, ikoku ndiko kunowothamwa mu mangabe awe!”
Ndizo kutjisa kwa Yahwe kukawila mu bathu, ngono bakabhuda nge moyo nng'ompela. 8Kwakati Saulo ebabala ku Bhezeki, bakabe bedwa ku Iziraela bakabe bali zwiwulu zwili mazana matatu (300 000) ne bakabe bedwa ku Juda bali zwiwulu zwili makumi ali kutendeka (70 000). 9Bakadwa batumwa bakabe bazha bakati, “Mudwe balume be Jabeshi we Giliyadi muti, ‘Mangwana nge tjibaka tje zhuba lipisa mowowana sununguko.’ ” Kwakati batumwa beswika bebikila bathu be Jabeshi, bakashatha. 10Bakadwa Baamoni bakati, “Mangwana towozwipa mu muli, ngono mukathama tjamunowobe mubona tjakamunakila.”
11Tjimuka Saulo kathubukanya balume nge makoko ali matatu. Kwakati nge mazhokuyedza bakangina mu bushanganilo gwe Baamoni bakababulaya kuswikila zhuba lipisa. Ibaba bakatjila bakapalala, kukasibe ne babili bakasala bali bose.
12Bathu bakabhuzwa Samuele bakati, “Apa ndiboani bakabe beti, ‘Apa Saulo ungatibusa kene?’ Mutipe ibo kuti tibabulaye.”
13Koga Saulo kati, “Akuna ungabulawa nasi, ngobe nasi Yahwe basunungula Iziraela.” 14Ndizo Samuele kadwa bathu kati, “Izhani tiyende ku Giligali tinomusidzila bumambo.” 15Ndizo bathu bose bakayenda ku Giligala, ngono bakabiga Saulo mambo mbeli kwa Yahwe. Ipapo bakapisa zwibhayilo zwe mbakisano mbeli kwa Yahwe, ngono Saulo ne Baiziraela bose bakabe ne nzano nkulu, bakashatha kwazo.
Kalanga Bible © Bible Society of Botswana, 2008, 2018.