1 Bomambo 18
18
Elija ne balebesambeli ba Bhaale
1Shule kwe tjibaka tjilefu, mu gole le butatu kuli bhamba, dama la Yahwe likazha kuna Elija liti, “Yenda unozwilakidza kuna Ahabu, ngono ndowonisa vula mu shango.” 2Ndizo Elija kayenda kunozwilakidza kuna Ahabu.
Ipapo bhamba lakabe lakula kwazo mu Samariya. 3Ngono Ahabu kadana Obhadiya wakabe ali nlauli we ng'umba ye bushe. (Obhadiya wakabe etja Yahwe kwazo. 4Kwakati Jezebele ebulaya balebesambeli ba Yahwe, Obhadiya katola balebesambeli bali zana (100) kabathubukanya nge makupo mabili, kabasumbika mu makuwu mabili, guwu limwe ne limwe bali makumi mashanu (50), kabapila zojiwa ne vula ko.) 5Ahabu kadwa Obhadiya kati, “Ngati palame shango tiyende mu misenya yose ne mikuku yose, pamwe tingawanila mbizi ne moulo dzedu fulo, kuti tisitongodwa tifigwa nge zwimwe zwithuwo zwedu.” 6Ndizo bakazwikoba nge shango bubili gwabo kuipalama, Ahabu kayenda ega ku imwe mbizho, Obhadiya katolabo imwe mbizho ali egabo.
7Kwakati Obhadiya atji mu zila, kashangana na Elija, ngono Obhadiya kanziba, kathigama kakotamisa nsholo kambhuzwa kati, “Apa ndimwi tetshi wangu Elija kene?” 8Elija kan'dabila eti, “Ee ndimi. Yenda unobudza tetshi uwo mambo kuti ndi ipapa.”
9Obhadiya kabe eti, “Apa ndakatjinyani kwaungadza ukandilonga mu maboko a Mambo Ahabu kuti ndibulawe? 10Ndotuna na Yahwe, Ndzimu wenyu banotjila, akuna itjaba kene mbuso nakuto bali tetshi wangu kwabasakatongo mutumila bathu kunomushaka. Ngono ha bezha beti, ‘Amutoboneka,’ Mambo Ahabu kakumbila mbuso kene itjaba itjetjo kuti batune, kuti amuzowang'wa. 11Apa ngwenu mondidwa muti, ‘Yenda unobudza tetshi uwo uti, “Bonani, Elija upano.” ’ 12Apa ha kungati ndidwa pamuli Meya ya Yahwe ibe imutola imuyisa kwandisingazibe, ndibe ndizha ndimushaya ngono ndabudza Mambo Ahabu kuti mu ipapa, ebe ezha emushaya, unondibulaya. Zibani kuti imi nlanda wenyu, kudwa mu butjetjana gwangu ndotja Yahwe. 13Apa tetshi wangu amuzohwa tjandakathama mu tjibaka Jezebele tjaakabe ebulaya balebesambeli ba Yahwe kene? Ndakasumbika balebesambeli ba Yahwe bali zana mu makuhwu mabili, limwe ne limwe lina bali makumi mashanu (50), ndibuya ndibapa tjiwunga ne vula. 14Apa mungandidwa muti ndiyende ndinobudza tetshi wangu nditi, ‘Elija uipapa kene?’ Unowondibulaya!” 15Ngono Elija kadabila eti, “Ndotuna na Yahwe Masimbawose banotjila, bandimile mbeli kwabo, nasi tjoselele ndowonozwiyisa mbeli kwa Mambo Ahabu.”
16Ndizo Obhadiya kayenda kanobudza Ahabu, ngono Ahabu kamilika kanoshangana na Elija. 17Kukati Ahabu ebona Elija, kandwa kati, “Apa ndiwe dumbu, iwe unodziyidza Iziraela?”
18Ngono Elija kan'dabila eti, “Imi andizotongo dziyidza Iziraela, koga iwe ne nsha wa tate babo ndimwi badziyidzi be Iziraela, ngobe makalasha milayo ya Yahwe mukatobela ya bo Bhaale. 19Ndizo ngwenu tjituma bathu banodana Baiziraela bose banoshangana nami ku Dombo le Karimeli ne balebesambeli ba Bhaale bali zwiwulu zwili zwinna (400) ne bali zwiwulu zwili zwinna (400) be ndzimukadzi Ashera, banoja na Mambokadzi Jezebele pa tafuli.”
20Ipapo Ahabu kadana Baiziraela bose ne balebesambeli ba Bhaale kunoshangana nabo ku Dombo le Karimeli. 21Ngono Elija kasedzela ku Baiziraela kabadwa kati, “Apa kowodza kukabe lini mudzungayila muli pakati kwe mikumbulo mibili kene? Ha Yahwe bali Ndzimu, mubatobele, koga ha Ndzimu ali Bhaale, muntobele!” Koga Baiziraela bakashaya dama labangadabila Elija ndilo. 22Ndizo Elija kadwa Baiziraela kati, “Ndimi ndoga nlebesambeli wa Yahwe wakasala, koga balebesambeli ba Bhaale ba mazana ali manna ana makumi mashanu (450). 23Ndokumbila kuti tipiwe mikono mibili, ibo bazwishalulile ng'ompela baubhaye bautjekelele nge mitezho baubige pezhugwi kwe hwuni, koga basitongo ulonga moto. Ngono imi ndowobhaya mmwe awutjekelela awubiga pezhugwi kwe hwuni, ngono anditowoulonga moto. 24Ngono mudwe balebesambeli ba Bhaale batembezele ndzimu wabo, imi ndowotembezela Yahwe, ngono Ndzimu unowodabila nge kutuma moto, ndiwo Ndzimu.”
Bathu bose bakadabila beti, “Waleba zubuyanana.” 25Ndizo Elija kadwa balebesambeli ba Bhaale kati, “Muzwishalulile nkono nng'ompela muubhaye imwi kutanga, ngoti mubanjinji, mube mudana zina le ndzimu wenyu, koga musitongo longa moto muuli.”
26Balebesambeli ba Bhaale bakatola nkono wabapiwa, bakaubhaya bakautjekelela bakadana zina la Bhaale kudwa mangwanana kunoti masikati beti, “Imwi Bhaale, mutidabile!” Koga kukasibe ne hwi, kene dabilo ing'ompela. Ngono bakazana bepoteleka tjibeso tjinopisigwa zwibhayilo tjabakabe bathama. Koga kukasibe ne dabilo.
27Kukati kwabe masikati makulu, Elija katangisa kubadadila eti, “Tembezelani nge mahwi apezhugwi, ngoti ndzimu. Pamwe utjaalakana zwimwe kene kuna kwaayenda. Pamwe watola gwendo, pamwe akayizelazwe, makafanila kuumusa.” 28Bakatembezela nge mahwi apezhugwi, bakazwitjeka bezwipalulanya, kuyendidzana ne tjilenje tjabo, kudzina malopa ewunga edwa mubali. 29Ngono kukati kwabe masikati e mateuko, bakaleba ngodzadzanya beleba dama yeli beletja, kudzina kuswika tjibaka tjekuyisa tjibhayilo tje madekwana. Koga kusina hwi linohwika kene dabilo yabanowana.
30Ndizo Elija kadwa bathu bose kati, “Sedzelani kundili,” ngono bakasedzela bose bakampoteleka. Elija katangisa ngomusa tjibeso tjinopisigwa zwibhayilo tja Yahwe tjakabe tjaligigwa pasi. 31Ipapo Elija #Kutangisa 32:28; 35:10katola mabgwe ali gumi lina mabili, kuyenda nge njudzi dze bakololo ba Jakubo, wakazhigwa nge dama la Yahwe lin'dwa liti, “Zina lilo lowodang'wa Iziraela.” 32Kabakila Yahwe tjibeso tjinopisigwa zwibhayilo nge mabgwe iyawo, kathama ngolo ingabhata vula ingabe tjilizanyo tje dzilitha dzili gumi lina dzili nna (14) kutjipoteleka. 33Kayilikanya hwuni pezhugwi kwe tjibeso tjinopisigwa zwibhayilo, katjekelela nkono nge mitezho kaibiga pezhugwi kwe hwuni. Kadwa bathu kati, “Zhadzani hali dzili nna nge vula muidile mu tjibhayilo tjinopisiwa ne mu hwuni.” 34Kabadwa kakale kati, “Thamani kakale gwe bubili.” Bakathama gwe bubili. Kabadwa kakale kati, “Thamani kakale gwe butatu.” Bakathama kakale gwe butatu. 35Vula ikazhala ngolo ikawunga kupoteleka tjibeso tjinopisigwa zwibhayilo.
36Kukati kuswika tjibaka tje kupisa tjibhayilo, nlebesambeli Elija kasedzela pa tjibeso tjinopisigwa zwibhayilo katembezela eti, “Imwi Yahwe, Ndzimu wa Abhurahama na Isaki na Jakubo, thamani kuti kuzibgwe nasi mu zhuba ileli kuti mu Ndzimu mu Iziraela ne kuti kuzibgwe kuti ndi nlanda wenyu ndothama zwithu zose izwezwi nge ndaulo yenyu. 37Mundidabile, imwi Yahwe, mundidabile, kuti ndizo bathu ibaba bazibe kuti imwe Yahwe mu Ndzimu, mushandulile moyo ye bathu ibaba kumuli.”
38Ndizo Yahwe bakadelusa moto ukapisa tjibhayilo ne hwuni ne mabgwe, ukawomesa pasi ubuya upkhwisa vula mu ngolo. 39Kukati bathu bose bebona tjashingikala, bakawila pasi bakakotamisa misholo bemimila beti, “Yahwe, ba Ndzimu dumbu, Yahwe ndibo Ndzimu!”
40Elija kadwa bathu kati, “Bhatani balebesambeli ba Bhaale, kushaye ne nng'ompela wapudzumuka.” Bathu bakababhata bose, Elija kabe eti bayisiwe ku Nkuku we Kishoni, banobulayigwa ko.
Bupelo gwe bhamba
41Ngono Elija kadwa Mambo Ahabu kati, “Yendani munoja mung'we, ngoti ndohwa nsindo, kwaswika vula isishoma.” 42#Jakubo 5:18Ipapo kukati Ahabu etathila kunoja ebuya eng'wa. Elija katatha Dombo le Karimeli kanogala pasi, akakotamisa nsholo uwe uli pakati kwe makumbo awe. 43Ngono kadwa nlanda uwe kati, “Yenda unolinga ku gungwa.”
Kayenda kanolinga kanshaka kazha eti, “Akuna tjandabona.” Elija kadwa nlanda katendeka eti, “Bgwilila unolinga.” 44Ngono nlanda kati ebuya gwe butendeka kadwa Elija kati, “Bonani, kuna gojana lingapa tjiazha tje nthu linomilika lidwa mu gungwa.”
Elija kadwa nlanda uwe kati, “Yenda unodwa Mambo Ahabu alibilidze alulwamise koloyi iye ayende, ngoti vula ingadwa indziba.” 45Tjinyolotjo makole kashanduka kabe matema ne phepo ikawuwudza, kukana vula isishoma. Ngono Ahabu kangina mu koloyi iye kayenda ku Jezirele. 46Simba la Yahwe likazha muna Elija kazwisunga thunji nge zwiambalo zwizwe, kalabuka ali mbeli kwa Ahabu kudzina enongina ku Jezirele.
Kalanga Bible © Bible Society of Botswana, 2008, 2018.