1 Bomambo 19
19
Elija ali pezhugwi kwe Dombo le Sinai
1Ahabu kabudza nkadzi uwe Jezebele tjimwe ne tjimwe tjakathamwa ndi Elija, nenge sekwa akabulaya balebesambeli ba Bhaale nge thumo. 2Ipapo Jezebele katuma ntumwa kuna Elija kunon'dwa eti, “Dzene midzimu ingandiloba ipaphulula, ha kungati mangwana nge tjibaka itjetji abe ndisakubulayabo sekwa wakabulaya balebesambeli.” 3Elija katja, kamilika katizhila ku Bheerisheba umu Juda ne nlanda uwe.
Kasiya nlanda uwe ko. 4#Jona 4:3Elija wakayenda mu tjilambanyika zhuba lose, kaswika pa nsu kagala mu ntutshi wawo, katembezela eti, “Ngwenu kwatjilizana, Yahwe, dusani butjilo gwangu ngoti anditoyita pana botate bangu!”
5Kalala pasi mu ntutshi we nti, ngono tjinyolotjo ntumwa we Ndzimu ukankutha ukandwa ukati, “Muka uje.” 6Ngono kati elinga kabona tjiwunga tjakagotjiwa pa masimbe ne hajana ye vula ku misholo iye. Ngono katola tjiwunga kaja, kang'wa vula, kayizela kakale. 7Ngono ntumwa wa Yahwe kazha kammusa gwe bubili kandwa kati, “Muka uje, ngoti gwendo gowokukulila.” 8Elija kamuka kaja kang'wa, zojiwa zwikampa simba kayenda siku ne sikati mazhuba ali makumi manna (40) kunoti ku Horebu, Dombo le Ndzimu. 9Ipapo kangina mu guwu, kagala mukati busiku gose.
Ngono bonani, dama likadwa kuna Yahwe likambhuzwa liti, “Elija, unothamani ipapa?”
10 #
Baroma 11:3
Kashandula eti, “Ndakagwa fupa ngekwa Yahwe, Ndzimu Masimbawose, ngoti bana be Iziraela bakabe balasha tjidumano tjenyu, bakapkhwanya zwibeso zwenyu zwe zwibhayilo bebuya bebulaya balebesambeli benyu bose nge thumo. Ngono ndimi ndoga ndakasala pafa, ngono banoshaka kundibulaya!”
11Yahwe bakadwa Elija bakati, “Bhuda unoma pezhugwi kwe dombo mbeli kwangu.” Ipapo Yahwe bakapinda, ngono phepo isishoma ikazha nge masimba ikatjakanyula shongwe mbeli kwabo, koga Yahwe bakabe basi mu phepo, ngono shule kwe phepo, kukabe ne kutengenyeka kwe shango, koga Yahwe bakabe basi mu kutengenyeka kwe shango. 12Shule kwe kutengenyeka kwe shango, kukabe moto, koga Yahwe bakabe basi mu moto. Ngono shule kwe moto kukabe hwi dukununu lakadzikama. 13Ngono Elija kati ehwa hwi kazwizwimba buso nge hazu iye kabhuda kanoma pa nkoba we guwu. Ipapo hwi likazha kunli liti, “Elija, unothamani ipapa?”
14Ngono kadabila eti, “Ndakagwa fupa ngekwa Yahwe, Ndzimu Masimbawose ngoti bana be Iziraela bakalasha tjidumano tjenyu, bakapkhwanya zwibeso zwenyu bebuya bebulaya balebesambeli benyu nge thumo. Ndimi ndoga ndakasala pafa, ngono banoshaka kundibulaya.”
15 #
2 Bomambo 8:7-13
Yahwe bakandwa bakati, “Yenda, shandukila ku tjilambanyika tje Damasiko, unowoti uswikako ukazhodza Hazaele kube mambo we Aramu. 16#2 Bomambo 9:1-6Ube uzhodza Jehu nkololo wa Nimishi kube mambo we Iziraela. Kakale uzhodze Elisha nkololo wa Shafati we Abelimehola kube nlebesambeli mu bumo gugo. 17Ngono unowopudzumuka mu thumo la Hazaele unowobulawa ndi Jehu, unowopudzumuka mu thumo la Jehu Elisha unowombulaya. 18#Baroma 11:4Nenguba kwakajalo ndowosiya bathu bali zwiwulu zwili kutendeka 7 000 mu Iziraela betjila basakatongo thigamila kene kuli kuputa Bhaale.”
Kudang'wa kwa Elisha
19Ndizo Elija kabhuda ipapo kanowana Elisha nkololo wa Shafati elima. Kwakabe kuna zwipani zwili gumi lina tjing'ompela (11) mbeli kukwe, Elisha iye elima nge tje bugumi lina zwibili (12). Elija kapinda pana Elisha kambula tjiambalo tjitje katjiambadza Elisha. 20Ngono Elisha kasiya ng'ombe kalabuka shule kwa Elija ngono kandwa kati, “Imani ndinowoneka mme na tate, ndizo ndikomutobela.”
Elija kanshandula eti, “Shandukazo, ndabe ndakuthamani?” 21Ndizo Elisha kasiya Elija kashandukila shule. Kaswika ebhaya mangabe ebe etola majokwe ebesa moto ndiwo, ebe ebhika nyama epa bathu beja. Ndizo ebe emilika etobela Elija kunoshinga ali mbhatshi uwe.
Kalanga Bible © Bible Society of Botswana, 2008, 2018.