1 Bomambo 17
17
Nlebesambeli Elija ne bhamba
1 #
Jakubo 5:17
Nlebesambeli Elija we N'tishibhe mu Giliyadi Kadwa Mambo Ahabu kati, “Mu zina la Yahwe Ndzimu unotjila we Iziraela, wandinoshingila, akutowobe ne khawa kene vula inona kwe makole matatu kuzhe kwe ndaleba.” 2Dama la Yahwe likazha kakale ku nlebesambeli Elija liti, 3“Milika ipapa utendebukile ku bhezhuba, unobgwata mu Nkuku we Kherithi, ku bhezhuba kwe gwizi gwe Jorodani. 4Unong'wa vula mu nkuku, ngono ndalaula makungubo kuti akupe zojiwa.”
5Elija kathama tjaadwiwa ndi Yahwe, kanogala pa Nkuku we Kherithi ku bhezhuba kwe gwizi gwe Jorodani. 6Makungubo kanzhisila tjiwunga ne nyama mangwanana ne madekwana, eng'wa vula mu nkuku. 7Shule kwe mazhuba nkuku ukapkhwa, ngobe vula yakabe isingane mu shango.
Nlebesambeli Elija na Zarefati we tjilikadzi
8Dama la Yahwe likazha kakale ku nlebesambeli Elija liti, 9#Luke 4:25, 26“Milika ngwenu, uyende ku Zarefati we Sidoni unogala ko. Bona, ndalaula tjilikadzi ikweno kuti ikupe zojiwa.” 10Ndizo Elija kamilika kayenda ku Zarefati, ngono kati eswika pa nkoba we nzi nkulu, bona, kawana tjilikadzi ishaka hwuni. Ngono kaidwa kati, “Ndokumbila vula inong'wiwa.” 11Ngono kukati tjilikadzi itjayenda kunotola vula, kaidana kati, “Mundizhile ne tjiwunga.” 12Ngono tjilikadzi ikandabila iti, “Ndotuna na Yahwe, Ndzimu uwo unotjila, andina tjandabhika, ndina bgwisa mu tjilongo gungapelela mu luboko ne mafuta asimuni mu ikuyu. Ndawoshaka hwuni ipapa, kuti ndinobhika ndipeleledza ndibe ndija ne nkololo wangu. Zowobe zwili izo zojiwa zwedu zwe bupelo, towobe togala zhala kudzina tifa.”
13Ngono Elija kadwa tjilikadzi kati, “Usitje, yenda unothama sekwa waleba, koga kutanga ubhikile imi tjiwunga tjitukununu muna kwaunako, ndiko ukowozwibhikila ne nkololo uwo. 14Ngoti Yahwe, Ndzimu we Iziraela baleba beti, ‘Bgwisa gumu tjilongo agutowopela, ne mafuta amu ikuyu angamiminike, kudzina zhuba liswika Yahwe benisa vula mu shango.’ ”
15Tjilikadzi yakayenda ikanothama sekwa yadwiwa ndi Elija, ngono iye na Elija ne be nsha uwe bakabe ne zojiwa zwabakaja mazhuba manjinji. 16Bgwisa gukasipele mu tjilongo ne mafuta kasimiminike mu ikuyu, kuyendidzana ne dama la Yahwe labakaleba betuma Elija.
17Shule kwe mazhuba nkololo we tjilikadzi iyeyi mweni we ng'umba, kagwala, bugwele gukantshambilidza kapela meya. 18Tjilikadzi ikadwa Elija ikati, “Apa unogwilani nami nthu we Ndzimu? Wakazha pandili kuwondikumbuludza tjibi tjangu ne kuthama kuti nkololo wangu afe kene?”
19Elija kandwa kati, “Undipe nkololo uwo.” Ngono katola mbisana pa ifuba tja mmeyabe, katathila naye ku ng'umba ipezhugwi kwaakabe egala, kaswika eladzika mbisana pa bulawo gugwe. 20Kamilidzila hwi lile kuna Yahwe etembezela eti, “Imwi Yahwe Ndzimu wangu, apa mazhisa zogwadza zwingapa mu nkadzi iwoyu we tjilikadzi wandigele panli ngobulaya mwana uwe kene?” 21#2 Bomambo 4:34, 35Ipapo Elija katshibama pezhugwi kwe mwana katatu, kamimilila kuna Yahwe etembezela eti, “Imwi Yahwe Ndzimu wangu, ndokumbila kuti meya ye mwana uwoyu ibgwilile munli.” 22Ngono Yahwe bakateedza hwi la Elija, meya ye mwana ikabgwilila munli, akathudza. 23Elija katola mwana kadelukila naye ku ng'umba ipasi, kayisa mbisana kuna mmeyabe, kabadwa kati, “Bona, nkololo uwo unotjila.”
24Ngono nkadzi kadwa Elija kati, “Ngwenu ndoziba kuti u nthu we Ndzimu ne kuti dama linodwa mu nlomo uwo malebeswa, i dama la Yahwe.”
Kalanga Bible © Bible Society of Botswana, 2008, 2018.