SALMOS 47
47
Dios i Reyʌch pejtel pañimil
1Winicob x'ixicob ti pejtelel lum, ñuq'uesanla Dios.
La' tsictiyic i tijicñʌyel la' pusic'al cha'an tsa' mʌjli i cha'an Dios.
2Come lac Yum jiñʌch C'ax Ñuc Bʌ yom bʌ mi lac bʌc'ñan.
Mi' cha'len yumʌl ti pejtelel pañimil.
3Mi' yʌc' ti lac wenta winicob x'ixicob ti mojt ti mojt.
Mi' yotsañonla ti yumʌl ti jujump'ejl tejclum.
4Mi' yajcʌbeñonla chuqui tac mi' yʌq'ueñonla,
Jiñʌch mero wen bʌ lum tsa' bʌ i yʌq'ueyob c'uxbibilo' bʌ i cha'an.
5Tsa' letsi majlel Dios, tsa' mʌjli i cha'an.
Tsa' letsi lac Yum ti' tojlel trompeta tac woli bʌ ti t'an.
6C'ʌyibenla i ñuclel Dios, c'ʌyibenla i ñuclel.
C'ʌyinla salmo tac ti' tojlel lac Rey, c'ʌyinla salmo tac.
7Come Dios jiñʌch Rey ti pejtelel pañimil.
I t'ojol jax yom mi la' c'ʌyiben i ñuclel ti Salmo.
8Dios mi' cha'len yumʌl ti' tojlel jujunmojt winicob x'ixicob.
Buchul Dios ti' yumʌntel ti ch'ujul bʌ i buchlib.
9Ya' mi' tempañob i bʌ jini yumʌlob loq'uemo' bʌ ti yan tac bʌ lum,
Cha'an mi' yochelob ti' winicob Dios, i Dios Abraham.
10I cha'añob Dios jini yumʌlob ti pañimil,
Come wen ñuc Dios.
Currently Selected:
SALMOS 47: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.