SALMOS 48
48
I t'ojol jax Sion
1Ñuc lac Yum. Yom cabʌl mi' sujbel i ñuclel.
Chumul Dios ti Jerusalén am bʌ ti ch'ujul bʌ wits i c'aba' Sion.
2I t'ojol jax ya' ba c'ʌcʌl ti chan bʌ wits, i c'aba' Sion ti' tojel norte.
I tijicñʌyelʌch pejtel pañimil,
I tejclum jini ñuc bʌ Rey.
3Ya' ti colem otot tac am bʌ ti Sion
Dios tsi' pʌsʌ i bʌ. Jiñʌch la caj Coltaya.
4Awilan tsi' tempayob i bʌ jini reyob.
Temel tsa' tiliyob ti' contra Israel.
5Che' bʌ tsi' q'ueleyob Sion tsa' toj sajtiyob i pusic'al.
Tsi' cha'leyob bʌq'uen. Tsa' puts'iyob majlel.
6Tsiltsilñayob tsi' cha'leyob bʌq'uen.
Tsi' yubiyob wocol lajal bajche' x'ixic mu' bʌ i cha'len bajq'uel.
7Che'ʌch ma' jem tac colem barco i cha'an Tarso.
Ma' jem yic'ot jini ic' loq'uem bʌ ba' mi' pasel q'uin.
8Lajal bajche' tsa cubi lojon tsa'ix j q'uele lojon ti' tejclum lac Yum Dios,
Ti' tejclum i Yum Panchan yic'ot Pañimil.
Dios mi caj i xuc'chocon cha'an mach jilic ti pejtelel ora.
9Ya' ti mal a Templo, c Dios, mic ña'tan lojon bajche' c'ux ma' wubiñon lojon.
10Baqui jach mi' cʌjñel a c'aba'
Mi' sujbel a ñuclel ti pejtelel pañimil,
Come tojatax pejtel chuqui ma' mel.
11La' i yubiñob tijicña año' bʌ ti wits i c'aba' Sion.
La' i yubiñob tijicña año' bʌ ti' tejclum tac Judá,
Come toj ma' cha'len meloñel.
12Cha'lenla xʌmbal ti Sion, joy xʌñʌla.
Tsiquila jini chan bʌ q'ueloñib ya' ti' ts'ajquil.
13Wen q'uelela jini wa'chocobil bʌ mu' bʌ i joy mʌctan
Yic'ot jini ts'ajquibil tac bʌ otot,
Cha'an mi la' suben la' walobilob.
14Come Dios jiñʌch lac Dios ti pejtelel ora.
Mi caj i toj'esañonla majlel c'ʌlʌl jinto mi lac chʌmel.
Currently Selected:
SALMOS 48: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.