1 CRONICAS 16
16
1Tsi' ch'ʌmʌyob tilel jini Arca i cha'an bʌ lac Yum. Tsi' yotsayob ti Tabernáculo chajpʌbil bʌ i cha'an David. Ya'i tsi' pulbeyob tsʌnsʌbil bʌ i majtan tac Dios. Tsi' yʌq'ueyob ja'el majtañʌl tac cha'an i tijicñʌyel i pusic'al. 2Che' ujtemix i yʌc' pejtelel jini majtañʌl tac, David tsi' yʌq'ueyob i yutslel i t'an pejtelel jini winicob ti' c'aba' lac Yum. 3Tsa' caji i pucbeñob jujump'ejl caxlan waj pejtelel winicob x'ixicob. Che' ja'el tsi' yʌq'ueyob we'elʌl yic'ot tiquin bʌ ts'usub.
4David tsi' wa'choco yajcʌbil bʌ levíjob cha'an mi' yʌq'ueñob wocolix i yʌlʌ lac Yum i Dios Israel ya' ti' tojel jini Arca i cha'an bʌ lac Yum, cha'an mi' c'ajtibeñob Dios i yutslel i t'an ti' tojlel winicob x'ixicob. 5Jini Asaf jiñʌch i yum jini yujilo' bʌ música. Jini mu' bʌ i coltañob jiñʌch iliyi: Zacarías, Jeiel, Semiramot, Jehiel, Matatías, Eliab, Benaía, Obed Edom, Jeiel. Tsi' ñijcayob salterio yic'ot arpa. Jini Asaf tsi' ñijca címbalo. 6Che' ja'el jini motomaj Benaía yic'ot Jahaziel tsi' wusuyob trompeta ti' tojel jini Arca i cha'an bʌ lac Yum.
Salmo i cha'an David cha'an mi' suben wocolix i yʌlʌ Dios
(Sal. 105.1-15; 96.1-13; 106.47-48)
7Ti jim bʌ ora David tsa' caji i yʌc' ti c'ʌyintel coro tac ti Tabernáculo cha'an mi' c'ʌyibeñob wocolix i yʌlʌ lac Yum. Asaf tsi' pʌsbeyob c'ay jini motomajob cha'an mi' tem cha'leñob c'ay.
8Subenla wocolix i yʌlʌ lac Yum, pejcanla ti' c'aba'.
Pucbenla i melbal lac Yum ya' ti' tojlel winicob x'ixicob ti pejtelel colem tejclum.
9Cha'lenla c'ay ti' tojlel lac Yum. C'ʌyibenla i ñuclel.
Subula pejtelel jini ñuc bʌ i melbal.
10Ñuq'uesan la' pusic'al cha'an ch'ujul i c'aba' lac Yum.
Yom tijicña mi' yubiñob jini mu' bʌ i sajcañob lac Yum.
11Sajcan lac Yum am bʌ i p'ʌtʌlel. Ñochtanla ti pejtelel ora.
12Ña'tʌbenla i yejtal tac i p'ʌtʌlel, jini bʌbʌq'uen tac bʌ
Tsa' bʌ i mele yic'ot jini t'an tsa' bʌ i yʌc'ʌ ti' contra egiptojob.
13Jatetla i p'olbaletla Abraham i winic lac Yum. I yalobiletla Jacob, i yajcʌbaletla Dios.
14Jiñʌch lac Yum Dios, i Yumʌch winicob x'ixicob ti pejtelel pañimil.
15Ti pejtelel ora ña'tʌbilix i cha'an i t'an tsa' bʌ i yotsa ti trato,
Jini t'an tsa' bʌ i subeyob winicob x'ixicob yic'ot i yalobilob ti lajm ti lajm cha'an mi' chʌn ña'tañob ti pejtelel ora.
16Jiñʌch tsa' bʌ i yʌq'ue Abraham, jini xuc'ul bʌ t'an tsa' bʌ i yʌq'ue Isaac,
17Jini jach bʌ t'an tsa' bʌ i yʌq'ue Jacob ti mandar.
Mach jilic ti pejtelel ora jini xuc'ul bʌ i t'an lac Yum aq'uebil bʌ Israel.
18Tsi' yʌlʌ lac Yum: “Mi caj cʌq'ueñet i lumal Canaán cha'an a cha'añʌch”, che'en.
19Che' maxto cabʌlic lac pi'ʌlob, che' ñumel jach tsa' ñumiyob ya'i, come mach i cha'añobic jini lum,
20Tsi' cha'leyob xʌmbal ñumel ti jujump'ejl colem tejclum.
Tsa' loq'uiyob ti jump'ejl colem tejclum, tsa' cha' ochiyob ti yambʌ.
21Lac Yum Dios ma'anic tsi' yʌc'ʌyob ti tic'lʌntel,
Tsi' tiq'ui reyob tsa' bʌ i ñaxan tic'layob.
22Tsi' yʌlʌ: “Mach mi la' mʌctan jini yajcʌbilo' bʌ c cha'an,
Mach mi la' tic'lan jini x'alt'añob c cha'an”, che'en.
23C'ʌyinla lac Yum pejtelel añet bʌ la ti pañimil.
Subula ti jujump'ejl q'uin bajche' mi' coltañonla.
24Subula i ñuclel lac Yum ti' tojlel winicob x'ixicob ti pejtelel pañimil.
Subula jini uts'at bʌ i melbal ti' tojlel pejtelel winicob x'ixicob.
25Come ñucʌch lac Yum, yom mi' wen sujbel i ñuclel.
Yom mi lac wen bʌc'ñan Dios ñumen bajche' mi' bʌc'ñʌntelob dioste' tac.
26Come dioste' jach pejtelel i dios tac winicob x'ixicob mach bʌ anic mi' cʌñob Dios.
Pero lac Yum tsi' mele panchan.
27Cabʌlʌch i c'uxbintel yic'ot i ñuclel ti' tojel i wut.
I t'ojol jax jini ch'ujul bʌ i yajñib ba' mi' pʌs i p'ʌtʌlel.
28Ch'ujutesanla lac Yum pejtel winicob x'ixicob ti jujunmojtetla.
Subenla i ñuclel yic'ot i p'ʌtʌlel.
29Subenla i ñuclel i c'aba' lac Yum che' bajche' yom mi' subentel.
Ch'ʌmbenla tilel i majtan, ochenla ti' pam i yotot.
Ch'ujutesanla lac Yum ti sʌq'uesʌbil bʌ la' pusic'al.
30Yom tsiltsilñayetla ti' tojlel lac Yum pejteletla añet bʌ la ti pañimil.
Wa'chocobilix jini pañimil, mach mejlic ti ñijcʌntel.
31La' i yubin tijicña jini panchan, la' i yubin tijicña jini pañimil.
Subula ti' tojlel jini sajtemo' bʌ: “Mi' cha'len yumʌl lac Yum”.
32La' i cha'len c'am bʌ t'an jini colem ñajb yic'ot i bʌl.
Yom tijicña jini cholel yic'ot pʌc'ʌbʌl.
33Pejtelel jini te'el ti jujuntejc mi' cajel ti c'ay yilal ti' tojlel lac Yum, come tal i melob jini año' bʌ ti pañimil.
34Subenla wocolix i yʌlʌ lac Yum, come uts'atʌch.
Come mach jilic i yutslel ti pejtelel ora.
35C Yum Dios lojon, coltañon lojon.
Tempañon lojon loq'uel ba' chuculon lojon ti yan tac bʌ lum,
Cha'an mic subeñet lojon wocolix a wʌlʌ come ch'ujul a c'aba',
Cha'an mi' ñuc'an lojon c pusic'al che' mic sub lojon a ñuclel.
36C Yum, la' ch'ujutesʌntiquet c'ʌlʌl ti pejtelel ora.
I Diosetʌch israelob mach bʌ anic a cajibal mi a jilibal.
Che' tsi' cha'leyob c'ay. Tsi' yʌlʌyob, Amén, pejtelel winicob x'ixicob. Tsi' subuyob i ñuclel lac Yum.
Tsa' cʌle jini Arca ti' wenta jini levíjob cha'an mi' chʌcʌ q'uelob
37David tsi' wa'choco cʌytʌl Asaf temel yic'ot i pi'ʌlob cha'an mi' chʌn q'uelob ti jujump'ejl q'uin chuqui tac yom melol ya' ti Tabernáculo. 38Tsa' wa'choconti ja'el Obed Edom (i yalobil Jedutún) yic'ot Hosa, yic'ot waxʌctiquil i chʌnc'al (68) i pi'ʌlob cha'an mi' cha'leñob cʌñʌn.
39Tsi' chʌn ch'ujutesayob lac Yum ya' ti ñoxi' Tabernáculo am bʌ ti Gabaón. David tsi' cʌyʌ ya'i jini motomaj Sadoc, yic'ot i pi'ʌlob ti motomajiyel cha'an mi' melbeñob i ye'tel lac Yum. 40Jiñobʌch mu' bʌ i tsʌnsañob alʌc'ʌl cha'an mi' pulbeñob i majtan lac Yum ti pulʌntib ti jujump'ejl sʌc'ajel yic'ot ti ic'ajel che' bajche' lac Yum tsi' wʌn subeyob israelob ti mandar. 41David tsi' wa'choco Hemán, yic'ot Jedutún, yic'ot cha'tiquil uxtiquil yaño' bʌ cha'an mi' yʌq'ueñob wocolix i yʌlʌ lac Yum cha'an i c'uxbiya yic'ot i yutslel i t'an am bʌ ti pejtelel ora. 42Tsi' ñijcayob trompeta tac yic'ot címbalo tac che' bʌ tsi' cha'leyob c'ay. Tsa' wa'chocontiyob ti xcʌntayajob i yalobilob Jedutún.
43Che' jini pejtelel jini israelob tsa' cajiyob ti sujtel ti' yotot. David tsa' cha' sujti majlel ti' yotot cha'an mi' yʌq'ueñob i yutslel i t'an i pi'ʌlob.
Currently Selected:
1 CRONICAS 16: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.