1 CRONICAS 17
17
Albil bʌ i t'an Dios ti' tojlel David
(2 S. 7.1-29)
1Che' ya'ix chumul David ti' yotot, tsa' caji i suben jini x'alt'an Natán: Joñon chumulon ti otot melbil bʌ ti ch'ujte', pero jini Arca i yejtal bʌ i trato lac Yum an jach ti pisil bʌ otot, che'en. 2Che' jini Natán tsi' sube: Uts'at ma' mel pejtelel chuqui woli a ña'tan, come an a wic'ot lac Yum, che'en.
3Ti jini jach bʌ ac'ʌlel lac Yum tsi' sube Natán: 4Yom ma' suben c winic David: “Jatet ma'anic mi caj a wa'chocobeñon cotot cha'an mic cha'len chumtʌl. 5Come che' bʌ tsac loc'sa jini israelob ti Egipto c'ʌlʌl wʌle ma'anic ba' ora tsa' chumleyon ti otot. Cojach tsa' ajniyon ti pisil bʌ otot. 6Baqui jach tsa' ñumiyon quic'ot jini israelob, ma'anic ba' ora tsac sube mi juntiquilic i yum jini israelob cha'an mi' melbeñon c Templo ti ch'ujte'. Joñon tsac wa'chocoyob cha'an mi' cʌntañob c tejclum Israel”, che'en.
7Yom ma' suben c winic David: “Lac Yum am bʌ ti panchan woli' yʌl: Joñon tsac pʌyʌyet che' xcʌnta tiñʌme'et cha'an ma' wochel ti yumʌl ti' tojlel c tejclum Israel. 8Ti pejtelel ora tsa' chʌn ajniyon a wic'ot baqui jach tsa' ñumiyet. Pejtelel a contrajob tsac jisayob ti a tojlel. Mi caj cʌc' ti q'uejlel ti ñuc a c'aba' che' bajche' i c'aba' jini ñuco' bʌ ti pañimil. 9Che' ja'el mi caj cʌq'ueñob i lum jini israelob ba' mi' chumtʌlob ti pejtelel ora. Ma'anix mi caj i chʌn loq'uelob. Ma'anix mi caj i chʌn jisʌntelob cha'an jontol bʌ tejclum tac che' bajche' ti yambʌ ora, 10c'ʌlʌl che' bʌ tsi' cha'leyob i ye'tel jini juezob. Mi caj c jisʌbeñob i p'ʌtʌlel pejtelel a contrajob. Mic subeñet ja'el mi caj c wa'chocobeñet a p'olbal cha'an mi' yochelob ti rey. 11Che' ma' chʌmel, mi caj c wa'chocon juntiquil a walobil cha'an mi' ch'ʌm a yumʌntel. 12Jini mi caj i wa'chocobeñon cotot. Mi caj c wa'chocoben i yumʌntel c'ʌlʌl ti pejtelel ora. 13Mi caj i tatiñon. Mi caj i yochel ti calobil. Ma'anic ba' ora mi caj c wis cʌye' che' bajche' tsaj cʌyʌ Saúl. 14Ti pejtelel ora mi caj c buchchocon ti cotot. Ma'anic i yujtibal i ye'tel mu' bʌ caj cʌq'uen. Ti pejtelel ora mi caj i yajñel i yumʌntel”. Che' tsi' yʌlʌ lac Yum, che'en Natán.
15Natán tsi' cha' sube David pejtelel chuqui tsa' subenti ti lac Yum. 16Che' jini tsa' ochi majlel ti mal i yotot lac Yum jini rey David. Tsa' caji i pejcan Dios ti oración: C Yum Dios, ¿chuqui to que'tel, yic'ot chuqui to i c'ʌjñibal c pi'ʌlob cha'an tsa' wʌq'ueyon pejtelel iliyi? che'en. 17Wen ñuc jini tsa'ix bʌ a mele tic tojlel. Pero jini tsa' bʌ a subeyon ñumen ñuc che' bajche' tsa'ix bʌ a mele. Che' ja'el c Yum Dios, tsa' wʌlʌ mi caj i yochelob ti rey c p'olbalob. 18C Yum, ¿chuqui to mi mejlel cʌl? A wujil ma'anic j c'ʌjñibal. Pero tsa'ix a wʌq'ueyon c ñuclel. 19Tsa'ix a wʌq'ueyon pejtelel ili c ñuclel, cha'an ti' caj tsa' wen c'uxbiyon, cha'an che'ʌch a wom. 20C Yum, ma'anic yambʌ lajal bʌ bajche' jatet. Ma'anic yambʌ Dios ti pañimil. Ma'anic ba' tsa cubi lojon yambʌ. 21¿Am ba yambʌ tejclum ti pañimil che' bajche' a tejclum Israel? Tsa'ix a pʌyʌyob loq'uel ti Egipto cha'an ma' wʌc' ti tsictiyel a p'ʌtʌlel ti' tojlelob. Tsa'ix a jisayob jini año' bʌ ti Canaán che' bʌ tsa' chajpʌbeyob i tejclum a cha'año' bʌ. 22Jatet tsa' wa'choco a tejclum Israel cha'an mi' yochel ti a tejclum ti pejtelel ora. Jatet c Yum tsa'ix ochiyet ti' Dios.
23Jini cha'an wʌle c Yum, yom ma' ts'ʌctesan jini t'an tsa' bʌ a subeyon yic'ot c p'olbal cha'an mic cha'len lojon yumʌntel. La' ujtic che' bajche' tsa' wʌlʌ. 24La' chʌn ñuq'uesʌntic a c'aba' ti pejtelel ora, cha'an mi' chʌn subob: “I Yum panchan jiñʌch i Dios israelob”, che'ob. Jini cha'an la' chʌn ajnic ti uts'at ti a wut jini calobilob yic'ot c p'olbalob. 25Wʌle ti' xuc'tʌlel c pusic'al mic pejcañet ti oración, come jatet c Yum tsa' subeyon mi caj a wʌc' ti q'uejlel ti ñuc jini c p'olbal. 26Jini cha'an c Yum, jatet Diosetʌch tsa' bʌ a subeyon ili t'an. 27La' aq'uenticob i yutslel a t'an c p'olbalob ti pejtelel ora. Come che' ma' wʌc' i yutslel a t'an mi' yajñel c'ʌlʌl ti pejtetel ora. Che' tsi' cha'le oración David.
Currently Selected:
1 CRONICAS 17: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.